Read Runyoro - rutooro Yer 9 Bible Online

Yer 9 - Runyoro - rutooro bible

Yer 9

¹Omutwe gwange kakuba gubaire iziba, kandi amaiso gange kakuba gabaire nsoro y'amaizi, naakusiibiire kurra, ndarra kurra, habw'abantu bange abaisirwe.

²Kakuba nyina omwirungu, ekigoonyo eky'omugenzi naakurugireho abantu bange nuho ngenda; habwokuba boona nsiihani kandi, bantu ngobya.

³MUKAMA naagamba ati Endimi zaabu baigema nk'obuta; tiharoho mananu, obugobya nubwo burukulema ensi; habwokuba nibakora ekibi kimu baroleriire ekindi, nyowe tibaamanyire.

⁴Buli muntu ayerinde omutaahi, kandi aleke kwesiga owanyina; habwokuba owanyina muntu, nuwe amulimiirra, kandi buli mutaahi naagendagenda naageyageya.

⁵Buli muntu naabiiha omutaahi, busaho arukubaza amananu; endimi zaabu bakazimanyiiza kubaza ebisuba; bakora ebibi, baitu tibasobora kubizira.

⁶MUKAMA naagamba ati: “Habw'okwikara nibakora kubi abantu kandi nibacwangya, nyowe bakanga kummanya.”

⁷MUKAMA ow'amahe nikyo arukugambira ati: “Ninyija kubaagya mbaihemu ebyenga kandi mbalengese kandi abantu bange abo, ekindi nsobora kubakorra ki?

⁸Endimi zaabu musogi kaita; zibaza niicwangya; buli omu, omutaahi amubaliza kurungi, kunu omu mutima, naamucwera orw'okumwita.

⁹MUKAMA naagamba ati: Abantu abo timbafubire habw'ebintu ebi? Kandi ihanga nk'eri, tindihoole enzigu?”

¹⁰“Ninyija kurra ntemu ekyoboobo habw'ensozi, nteere omukungo habw'amaliisizo ag'omwirungu, habwokuba gafookere matongo, busaho muntu asobora kurabamu, kandi tiharukuhulirwayo nte ejuga; enyonyi ez'omu mwanya n'ebisoro, bikairuka byagenda.

¹¹Orubuga Yerusaalemu, ninyija kurufoora ntuumo y'ebikamburro, bwikaro bw'eboha; kandi embuga za Yuda, nzifoole matongo agatasobora kwikarwamu muntu.”

¹²N'oha omuntu omunyamagezi muno arukusobora kukenga kinu? N'oha MUKAMA ou yaragiire akirangirre? Kiki ekyaleeteriize ensi kukamburwa n'okufooka itongo nk'irungu, omuntu akalemwa n'okurabamu?

¹³MUKAMA yagarukamu ati: “Habwokuba abantu bakaleka Ebiragiro byange ebi nabateeriireho, baalema kumpurra, n'okukora ebiragiro byange eki biragira,

¹⁴baitu bakahondera ebiteekerezo by'emitima yabu enyakugumangaine, baaramya Baali, baisenkurubo nkooku baabeegeseze.

¹⁵MUKAMA Ruhanga owa Isirairi nikyo arukugambira ati: Abantu banu ndibaliisa omusisa, mbahe amaizi agarumu obutwa nugo banywe.

¹⁶Ndibararangiza omu mahanga, bbo na baisenkurubo agabatakamanyahoga; kandi ndaabahondezaaga empirima okuhika obu ndikabahwerekereza.”

¹⁷“MUKAMA ow'amahe naagamba ati: Muteekereze, mwete abakazi abateezi b'empamo baije; mutumeho abakazi abanyamagezi baije;

¹⁸barahuke batuterre empamo, naitwe nukwo turre, amaiso gaitu gafukumuke amaizi.

¹⁹Habwokuba empamo neehulirirwa Ziyoni ngu: ‘Ka twahwerekerra! Tuhemukire mali mali, habwokuba ensi tugirugiremu, kandi amaju gaitu bagaseesire.’”

²⁰Inywe bakazi, muhurre ekigambo kya MUKAMA, muhurre ekigambo ekyarukugamba; mwegese bahara banyu empamo, buli omu ayegese omutaahi ekizina eky'okurra.

²¹Habwokuba orufu rututaahiriire omu madirisa gaitu, rutaahire omu bikaali byaitu, niruhinjura abaana abarurukusanga omu makuute, nirutaho n'abasigazi aba rurukusanga omu butale.

²²Ogambe oti, “MUKAMA naagamba ati: ‘Emitumbi y'abantu erigwa nk'obusa okubugwa omu bwerre, nk'ensa z'oburo ezigesirwe omugesi; kandi tihalibaho muntu n'omu agisorooza.’”

²³MUKAMA naagamba ati: “Omuntu omunyamagezi, aleke kwenyumiza habw'amagezi ge, ow'amaani aleke kwenyumiza habw'amaani ge, omuguuda aleke kwenyumiza habw'obuguuda bwe;

²⁴anyakusemeriire kwenyumiza, nuwe ogu anyakunyetegereza kandi anyakuumanyire, ngu ninyowe MUKAMA ow'engonzi ezitayuga, ow'obwinganiza kandi ow'obuhikiriire omunsi; Habwokuba MUKAMA naagamba ati; ebintu ebi nibyo ngonza.”

²⁵“MUKAMA naagamba ati, akasumi aka ndifubirramu abantu abo abasazirwe omu mubiri kwonka, kandi kunu omu mwoyo tibasazirwe, kalihika.

²⁶Abantu abo nubo Abanyamisiri, Abayudaaya, Ab'edomu, batabani b'Amooni, Abamowabbu, na boona abanyakwikara omwirungu, abanyakukona hambaju isoke ryabu; habwokuba amahanga ago goona tigasazirwe, kandi enju ya Isirairi yoona, tesazirwe omu mutima.”