Read Runyoro - rutooro Emp 2 Bible Online

Emp 2 - Runyoro - rutooro bible

Emp 2

¹Murole, MUKAMA habw'ekiniga kye, nkooku abuutikiire Siyoni omwirima! Ekitiinisa kya Isirairi, akiihire omwiguru yakinaga hansi. Ha kiro eki yabiihiriirweho, ataijuke n'akatebe ak'ebigere bye.

²MUKAMA ahwerekeriize ebiikaro bya Yakobbo byona ataina kuganyira; ekiniga kimuseesize ebigo eby'abantu ba Yuda; obukama aburubaatiriire, hamu n'abalemi baabwo, yabaswaza

³Habw'ekiniga ekingi amaliireho kimu amaani goona aga Isirairi; akanga kubakoonyera, omunyanzigwa obu yabaseesiire; abiihiriirwe muno Yakobbo, yayaka nk'orulimi rw'omurro kahwerekereza byona ebinyakuba haihi.

⁴Nk'omunyanzigwa weena, atuteebere emisogi ye, aturase; omukono gwe ogw'obulyo, agugumiize kimu tigurukutengeeta; aitiire kimu ebintu byona eby'omu heema ey'abantu ba Siyoni, ebinyakuseremeza amaiso gaitu; Itwe aba Yerusaalemu, tuhuliire ekiniga kye, nikyaka nk'omurro.

⁵MUKAMA afookere nk'omunyanzigwa yahwerekereza Isirairi; acwekeriize ebikaali byayo byona, aseesire ebigo byayo byona; muhara wa Yuda amwongiire okuganya n'okuteera empamo.

⁶Orukande rwe aruseesire nk'arukuseesa ekirindiro ky'omusiri, yaseesa ekiikaro ekisemerezibwamu ebiro bikuru ebyatairweho; Siyoni agiihiremu ebiro ebikuru ebiragiirwe na Sabbato habw'ekiniga kye ekingi, asenzire omukama na nyakatagara.

⁷MUKAMA agayire itambiro lye, anugire ekiikaro kye ekirukwera; ebisiika eby'ebikaali byakyo, abirekiire omunyanzigwa; obwogo bukaimuka omunju ya MUKAMA, nk'obunyakuhulirwa ha kiro eky'ekiro kikuru ekyatairweho.

⁸MUKAMA akamalirra kuseesa ekisiika eky'abantu ba Siyoni; akakirengesa omuguha; atahinye omukono gwe, okuhika obu yakagihwerekereriize kimu. Ekigo n'ekisiika, yabireetera kuteera empamo, amaani gabihweriiremu hamu.

⁹Amalembo gaayo gakadikira omu itaka; ebihongozo byayo akabicwacwana yabimaraho; omukama n'abalemi baayo bali hagati y'abantu abatamanyire Ruhanga. Ebiragiro tibikyaroho, kandi abarangi baayo, MUKAMA takyabooleka kantu.

¹⁰Abakuru b'abantu ba Siyoni, baikaliire hansi bagwirwemu akahuno beesesire ecuucu omu mutwe kandi bajwaire eguniya bahara ba Yerusaalemu bajuumaire.

¹¹Habw'okurra amaiso gampohere, ntuntwire; omutima gwange gwijwire obujune, habw'okuhwerekerra okwa bahara b'abantu bange, obujune buraaliire kunyita, habwokuba, abaana abato n'enkerembe, ensazi ebanagire omu nguudo z'orubuga.

¹²Habw'enjara n'iroho, nibalirirra baanyinabo, nibagamba bati: “Mutuhe omugaati n'eviini biri nkaha?” Nibagwa omu nguudo nk'abanyakuhutaziibwe, nibacwekanira omu mikono ya baanyinabo.

¹³Inywe abantu ba Yerusaalemu; mbagambire ki? Mbaleengesanizeeho ki? Iwe muhara wa Siyoni empikirre, nkusisanize na kintu ki, nukwo nkuhuumuze? Obujune bwaawe bwingi muno, nibulengesanizibwa n'enyanja; n'oha asobora kukujuna?

¹⁴Abarangi baawe, tibaina kintu na kimu ekyamazima, eki baakugambiire bakakubiiha ebisuba, nibyo byonka; ebi baayegesaaga, bikakuhabisa, bitarukusuukura kibi kyawe, nibyo byakuleetiire kuteekereza oti: torukwetaaga kukizira.

¹⁵Abantu boona abanyakuraba omuhanda gunu obu bakurora beekwata haitama nibeesiimuza kandi bahungya emitwe okurora iwe muhara wa Yerusaalemu; beekaguza bati: “Mara runu nurwo orubuga oru baagambaga ngu nurwo rukirra kimu embuga zoona, orwasemezaga ensi yoona?”

¹⁶Abanyanzigwa baawe boona batandika kukujunaana; beesiimuza, kandi banena obugigo, batoka nibagamba bati: “Tumuhwerekeriize! Otyo, kinu nikyo ekiro eki tukaba tutegeriize; hati tukihikireho; tukiboine!”

¹⁷MUKAMA akozire eki yategekere, ahikiriize eki yagambire nkooku yahayire ira, ahwerekeriize atarukuganyira aikiriize omunyanzigwa kukwebugira, kandi abazigu baawe, abongiire amaani.

¹⁸Terra MUKAMA empamo, iwe muhara wa Siyoni! Siiba norra kandi raara norra, amaizi ag'omumaiso gaawe gagere nk'ekyambu! Oteehuumuza, kandi otaganyira amaiso gaawe!

¹⁹Ekiro, abalinzi nambere batandikira kulinda, oimukege oteere omuranga! Omutima gwaawe gwona, gwanjururre MUKAMA nkooku oseesa amaizi Omwimukize emikono omwesengereze aganyire abaana baawe, abarukwitwa enjara, omu ntangatangano ez'enguudo zoona.

²⁰Ai MUKAMA, orole kandi oteekereze! N'oha ou orakozire oti? Abakazi, basobora kulya abaana baabo aba bagonza muno? Nyakatagara n'omurangi, basobora kwitirwa omu kiikaro kya MUKAMA ekirukwera?

²¹Abato n'abakuru, babyamire omu cuucu y'enguudo; abaisiki n'abasigazi bange, bakaitwa empirima; ha kiro eki wabiihiriirweho, niiwe wabaisire, wabaita otaina mbabazi.

²²Okandeetera ebintu ebirukutiinisa wabiiha hoonahoona, nk'arukuraaliza abantu kwija ha kiro eky'obugenyi ekyatairweho; kandi ha kiro MUKAMA eki yabiihiriirweho, hatabeho n'omu ayatabukire rundi ayasaagireho, abo aba nalezire kandi aba nayoroire, omunyanzigwa wange akabahwerekereza.