Read Runyoro - rutooro Emp 3 Bible Online

Emp 3 - Runyoro - rutooro bible

Emp 3

¹Ninyowe omuntu anyakumanyire amakuru ag'okufubirwa Ruhanga;

²akansindikiriza yampikya omu mwirima, nambere hatali kyererezi naakake;

³yanterra kimu okwiza obwire, atarukunganyira.

⁴Ampoogahoogere, tandekiire nyama na ruhu, kandi ampenzire n'amagufa;

⁵ankingiire omu nkomo ey'enaku n'obujune;

⁶ampambiriize okwikara omu mwirima, nk'abafu abaafiire ira.

⁷Anzitiriire orugo, nukwo mburwe h'okuraba kucwa; amboheseze enjegere ez'amaani;

⁸noobu ndukukunga nkateera omuranga ninyenda obukoonyezi, tarukumpa eki ndukumusaba;

⁹emihanda yange agikongiize amabaale agabaizirwe, obuhanda bwange aburamaize.

¹⁰Hali nyowe naasisana nk'edubu, enyakwina eky'ebyamiriire, naasisana nk'entale, enyakweserekere;

¹¹akanyiha omu muhanda ogu nkaba ndumu, yantaagataagura; yansiga nyenka;

¹²akaleega obuta bwe, nyowe yanyemereza mbe kintu eky'okuraswa emisogi.

¹³Emisogi ye ey'omufuko gwe, akagirasa omu mutima gwange;

¹⁴nfookere kintu ky'okusekwa amahanga goona, ninyowe garaasiibaga nigasekereza.

¹⁵Akansoroolezaaho obusaalizi bwona akankumiraho enaku zoona.

¹⁶Aliisize amaino gange amabaale, yampa iju niryo ndye.

¹⁷Omwoyo gwange, tigwina businge, nkeebwa n'okwebwa, amakuru ag'ekigambo omuhimbo;

¹⁸nikyo ndukugambira nti: “Ekitiinisa kyange kihoire, kandi tinyina eki ndukunihira hali MUKAMA.”

¹⁹Oijuke omuhito n'obujune bwange, eki, nikyo ekibiriizi n'endurwa!

²⁰Nyikara ninkiteekereza, obujune bwenda kunyita.

²¹Baitu, kinu nikyo kintu eki nyijuka, kandi kindeetera kunihira:

²²Engonzi za MUKAMA ezitayuga tizihwaho, kandi embabazi ze tizigira mutaano;

²³ziikara nizeeyongera bukyabukya; obwesige bwe bwingi muno.

²⁴Omwoyo gwange nigungambira guti: “MUKAMA nuwe mugabo gwange, habweki ndaamwesigaga.”

²⁵MUKAMA, murungi hali abo abanyakumwesiga, akorra kurungi omuntu anyakumuserra.

²⁶Habweki nu, kirungi muno hali itwe kutegereza nitugumiisiriza, kutegereza obujuni bwa MUKAMA.

²⁷Kirungi omuntu okwetweka ekikoligo akiri musigazi.

²⁸MUKAMA obu araabaga amubohiireho ekikoligo, omuntu ogu, aikarrege wenka aculiire;

²⁹ate eminwa ye omu cuucu oku nuho haakuba hakyali okunihira;

³⁰ategere itama kimuteera, kandi aikirize kujumwa muno.

³¹Habwokuba, ebiro byona MUKAMA talinagaija ruzaaro rw'abantu,

³²baitu noobukiraaba ngu asaaliza, habw'engonzi ze enyingi muno ezitayuga, aganyira.

³³Baitu tabonabonesa, kandi tasaaliza abantu, habw'okugonza.

³⁴Okurubaatirra hansi y'ebigerebye abanyankomo ab'ensi yoona,

³⁵okudibya obusobozi bw'omuntu n'Ogu anyakuli haiguru muno aroleriire,

³⁶okuhenderra omuntu, ebi byona MUKAMA tabyenda.

³⁷MUKAMA obu yakubaire ataragiire, ekintu, n'oha ayaakuragiire kikabaho?

³⁸Ogu anyakuli haiguru muno, tinuwe aragira ebirungi n'ebibi nukwo bikabaho?

³⁹Omuntu omwomeezi, obu afubirwa habw'ebibi bye, kiki ekimuleetera kutontorroma?

⁴⁰Tweteere turole engeso zaitu, nukwo tugaruke hali MUKAMA waitu!

⁴¹Leka twimukize emitima n'emikono yaitu, Ruhanga Ow'omwiguru, nitugamba tuti:

⁴²“Tukasiisa kandi tukeema, baitu iwe otatuganyire.

⁴³Habw'ekiniga okatwesereka, watuhiiganiza, watwita otaina kuganyira.

⁴⁴Okeesereka omu kicu, kikwasire poo, esaara yaitu eki etasobora kurabamu.

⁴⁵Otufoire kintukalegere kandi ekitaina mugaso, omu mahanga goona.

⁴⁶Abanyanzigwa baitu boona nibatuterra akakwazo;

⁴⁷obutiini bw'okutwita, tutoire obuhya, tutokomere kandi tuhwerekeriire;

⁴⁸habw'okuhwerekerra kw'abahara b'abantu bange, amaiso gange nigacukumukwamu ebyambu by'amaizi.

⁴⁹Ndiikara nindira obutalekerra, obutamara,

⁵⁰okuhika MUKAMA obu alyema omwiguru akandora;

⁵¹obu ndukurora ekigweriire abaisiki boona ab'omu rubuga rwange, nsaalirwa muno.

⁵²Abo abannobere nibantura busa, bataaha nibampiiga nk'abarukuhiiga ekinyonyi.

⁵³Bakannaga omu kiina ndi mwomeezi, bantabirrayo n'amabaale;

⁵⁴namirwa amaizi nagamba nti: ‘Mpezire’.

⁵⁵Ai MUKAMA, nkeema omu kiina okuzimu, nakukunga.

⁵⁶Okampurra ninkusaba nti: ‘Otanga kumpuliriza, nyowe arukwabura ninyenda obukoonyezi!’

⁵⁷Obu nakwesire, okairra haihi wangumya oti: ‘Leka kutiina!’

⁵⁸MUKAMA, okatongana kandi okanjuna.

⁵⁹Ai MUKAMA, okarora ebibi byona ebi bankozire, okiraanule ebigambo byange.

⁶⁰Okarora boona nkooku baahoire enzigu, okeetegereza, nkooku baayekobere kundwanisa.

⁶¹Ai MUKAMA, okahurra nkooku barukunswahiriza Okamanya byona ebi baacikire okundwanisa.

⁶²Abazigu bange abanyakunseesira izooba lyona basiibira okunteekerezaaho n'okumbazaaho.

⁶³Noobu baikarra, noobu beemerra, ninyowe mba rujali rwabo.

⁶⁴Ai MUKAMA, olibasasura obainganainganize noororra ha bikorwa byabo.

⁶⁵Obahe omutima ogukadadaire, obakyene.

⁶⁶Ai MUKAMA, obabinge obiihiirwe muno, kandi obahwerekereze obaihe omunsi.”