Read Runyoro - rutooro Emp 4 Bible Online

Emp 4 - Runyoro - rutooro bible

Emp 4

¹Mawe, ezaabbu k'esiisikaire ezaabbu enungi k'ehindukire! Amabaale agarukwera, gararangire omu ntangatangano ez'amakuute goona.

²Batabani ba Siyoni, ab'omuhendo nke'zaabbu erukukirra kimu oburungi, mahano, hati nubo barukulengesanizibwa n'ebinaga ebinyakubumbirwe omubumbi!

³Nobwakubaire eboha, ziihayo amabeere, zonkya ebyana byazo, baitu bahara b'abantu bange b'omwaga nka maaya ez'omwirungu, tibaina mbabazi ha baana baabo.

⁴Habw'iroho, orulimi rw'omwana enkerembe rukwatiire omu bihangara, abaana abakuruho nibasaba ebyokulya, baitu busaho muntu n'omu, ow'okubaha akaragalika.

⁵Abantu abaalyaga ebyokulya ebirukukirra kimu oburungi, enjara, nubo erukunaga omu makuute, abo abaayoroirwe nibajwara engoye eza kahuukya, hati nubo barukubyama ha ntuumo z'iju.

⁶Habwokuba, ekifubiro ky'abantu bange, kikakiraho obukooto eky'abantu ba Sodomu, eyahwerekereziibwe omu kacu kake kati, kunu hataroho agikwasireho.

⁷Abanyoro baayo, bakaba barungi okukira ebirika, nibeera okukira amata; emibiri yabo ekaba neezokwamu obwomeezi okukira amabaale aga korali, enzooka yabo, nesisana nk'eyibaale ly'omuhendo safiiro.

⁸Hati, ha maiso nibairagura okukira omunyali, omu makuute, tibasobora kumanyirirwa; tibakyaina rususu, rukaboomera ha magufa, bakoomangana nk'ekiti.

⁹Abaisirwe empirima, bakaba nibasemererwa okukira abaisirwe enjara, abaafiire nibeegomba ebijuma eby'emisiri.

¹⁰Omu kasumi ak'okuhwerekerra kw'abantu bange, abakazi ab'embabazi, bakacumba abaana baabo bonyini aba baazaire; nubo baalya.

¹¹MUKAMA nukwo kubiihirwa muno, yakwatirwa kimu ekiniga kye, ekinyakwaka nk'omurro; yahemba omurro omu rubuga Siyoni gwarwokya gwasiiriiza emisingi yarwo.

¹²Abakama ab'ensi, noobwakubaire abantu ab'ensi yoona, bataikirize, omuntu arukubonabonesa, rundi omunyanzigwa, ngu alisobora kutaaha amalembo ga Yerusaalemu.

¹³Eki, kikarugirra omu bibi eby'abarangi baayo, kandi kikaleeterezibwa ebibi by'abanyakatagara baayo, abaagiseesiremu esagama y'abantu abataina musango.

¹⁴Baayenjeeraga omu makuute nk'abahimbaara, basiisirwe muno esagama, hataroho n'omu asobora kukwata ha bijwaro byabo.

¹⁵Abantu baabaterra akoogo nibagamba bati: “Murugeho! Inywe abatasemeziibwe!” “Murugeho! Murugeho! Mutatukwataho!” Nukwo baafookere bati ntaratazi kandi enjaikijaiki; abantu omu mahanga, nukwo kugamba bati: “Abo, tibaligaruka kwikara na itwe!”

¹⁶MUKAMA wonyini, nuwe yabararangize, taligaruka kubeegarurra; Abantu batagaruke kutamu baanyakatagara ekitiinisa, kandi batagaruke kufaaho abarangi.

¹⁷Tukaikara tuhangire amaiso, tutegeriize okukonyerwa, kandi kunu tikuliyo; noobu twakaikaire tutegeriize, tukategereza ihanga eritasobora kutujuna naakake.

¹⁸Omunyanzigwa yatwikazaahoga eriiso; twalemwa n'okurubata omu nguudo, empero yaitu ekairra haihi; ebiro byaitu, bikaba nibibarwa; habwokuba, empero yaitu ekaba ehikire.

¹⁹Abakaba nibatubinga, bakaba nibanguha, okukira amasamba ag'omu mwanya, baatwirukizaaga hansozi, baatubundarraga omwirungu.

²⁰Ensoro ey'obwomeezi bwaitu, Omukama MUKAMA ou yakomere, ou twagiraga tuti nuwe alitulinda atujune weena alituseesira, ogu nuwe baakwasire.

²¹Iwe muhara w'Edomu, iwe ayaikaire omunsi Uzi; kyanganuka kandi semererwa hansi noija kuhikwaho ekikopo, onywe otamiire, oyejuule.

²²Iwe muhara wa Siyoni, ekifubiro eky'ebibi byawe kihoire, MUKAMA taligaruka okukwikaza omu kuzaahisibwa; baitu iwe muhara w'Edomu, alikufubira habw'obubi bwawe, alisuukura ebibi byawe.