Read Runyoro - rutooro Ezek 1 Bible Online

Ezek 1 - Runyoro - rutooro bible

Ezek 1

¹Omu mwaka ogwa ikumi n'esatu omu kwezi okwa kana, ha kiro eky'akataano eky'okwezi oku, obu nkaba ndi n'enzaahisibwa ha kyambu Kebara, iguru likakingurwa narora Ruhanga.

²Ha kiro ekya kataano eky'okwezi oku, nubwo haahikire omwaka ogwa kataano ogw'okuzaahisibwa kw'omukama Yehoyakiini.

³MUKAMA akagambira Ezekyeri nyakatagara, mutabani wa Buuzi omunsi y'Abakaludaaya, haihi n'ekisaaru Kebara; nkahurra iraka lya MUKAMA naabaza na nyowe, n'obusobozi bwe nibumpikaho.

⁴Obu namagamagire, narora ihunga erikaba liimukire ha bukiizii bw'emoso narora n'ekicu ekikooto, kyehinguliriziibwe ekintu ekirukumuliikana, kandi nikirugwamu omurro obutalekerra kandi hagati y'omurro ogu, hakaba harumu ekintu ekirukwengeengeta, nk'omulinga.

⁵Omu ihunga hagati, nkaroramu ekintu ekirukusisana ebihangwa ebbina ebyomeezi, ebirukusisana nk'omuntu,

⁶buli kimu kikaba kiina obuso bbuna n'amapapa ana.

⁷Amaguru gaabyo gakaba gatereekeriire, kandi ebigere byabyo hansi, bikaba nibisisana ekigere ky'enyana; kandi nibyengeengeta nk'omulinga ogunyakusemeziibwe kurungi.

⁸Hansi y'amapapa gaabyo, ha mbaju zaabyo, bikaba biina emikono ey'abantu. Ebihangwa ebbina ebi, bikaba biina obuso bwabyo n'amapapa gaabyo ebirukusisana biti:

⁹Amapapa gaabyo gakaba gakwatangaine; byona byagendaga omumaiso biterekeriire, bitarukuhinduka.

¹⁰Obuso bwabyo bukaba nibusisana buti, omumaiso, buli kimu kikaba nikisisana nk'omuntu; ha rubaju orw'obulyo, nubisisana nk'entale, ha rubaju orw'obumoso, bikaba nibisisana nk'ente, kandi enyuma nibisisana nk'isamba.

¹¹Omumaiso nukwo byasisanaga biti. Amapapa gaabyo gakaba geeyanjurwire; buli kihangwa kikaba kiina amapapa abiri, ipapa ery'ekimu, likwataine n'ery'ekindi, amapapa abiri gabiswekeriire

¹²Buli kimu, kyagendaga kitereekeriire; nambere omuyaga gwateeraga nigugenda, nuho byatomaga, kandi bitarukuhinduka.

¹³Hagati y'ebihangwa ebbina ebyomeezi, hakaba harumu ekintu ekirukusisana amanda g'omurro agengere, ekirukusisana nk'ebimuli ebirukugenda omumaiso nibigaruka n'enyuma hagati y'ebihangwa ebi ebyomeezi; omurro ogu, gukaba nigumekuka, kandi omumurro ogu, haarugamu omurabyo

¹⁴Ebihangwa ebyomeezi, byaajumbuutuka, byatoma hanu na hali, nk'omurabyo oku gumulikya.

¹⁵Omukasumi ako, obunaroleriire ebihangwa ebyomeezi, narora enyamuziga ekwasire ha itaka, ebiri hagati, buli kimu hali byo, kiina enyamuziga emu.

¹⁶Enyamuziga ezi, zikaba nizisisana kandi zikozirwe ziti: Ensisana yazo, zikaba nizengeengeta nk'ibaale ry'omuhendo berulo; ebihangwa ebbina ebi, bikaba nibisisana enkora yabyo, eri nk'enyamuziga enyakutaahiibwe omu nyamuziga endi.

¹⁷Obu byabaga nibigenda, byatomaga ha habuli rumu, ha mbaju zaabyo ina, kandi byagendaga bitarukuhinduka.

¹⁸Enyamuziga ina zikaba ziina empanga ina, kandi zikaba ziina empagi; empanga zaazo, zikaba ziina obuhuru okuzeehinguliriza

¹⁹Ebihangwa ebyomeezi obu byabaga nibigenda, emyamuziga zaabigenderaga ha rubaju; kandi obu byabaga nibiimuka hansi, nazo ziimuka.

²⁰Hoona omuyaga ha gwateeraga nigutoma, ebihangwa ha byagendaga, n'enyamuziga nuho zaagendaga, hamu nabyo; habwokuba omwoyo gw'ebihangwa ebyomeezi, nugwo gukaba guli omu nyamuziga.

²¹Biri obu byagendaga, na binu bigenda; kandi biri obu byayemerraga binu nabyo byemerra; kandi biri obu byaimukaga, enyamuziga ziimuka hamu nabyo; habwokuba omwoyo ogw'ebihangwa ebyomeezi nugwo gukaba guli omu nyamuziga.

²²Eruguru y'emitwe ey'ebihangwa ebyomeezi, hakaba nihasisana nk'omwanya ogw'iguru, nihamuliikana nk'ibaale kurrisitoolo, aganjairwe ha mitwe yabyo eruguru.

²³Kandi hansi y'omwanya ogu, amapapa gaabyo, nuho gakaba geeyanjurwire garorangaine; buli kihangwa, kikaba kiina amapapa abiri agakiswekeriire omubiri.

²⁴Obu byabaga nibigenda, nahurraga okuhuuma kw'amapapa gaabyo, nikusisana nk'okuhirra kwenyanja, nk'iraka ly'Ow'obusobozi bwona, iraka ery'akoogo, nk'iraka ery'ihe; obu byayemerraga, bisirimura amapapa gaabyo.

²⁵Haahulirwaga iraka niriruga omu mwanya ogubiri haiguru ha mitwe yabyo; obu byayemerraga bisirimura amapapa gaabyo.

²⁶Eruguru y'omwanya ogwa haiguru y'emitwe yabyo, hakaba nihasisana haliyo ekitebe ky'obukama, ekirukusisana ibaale ery'omuhendo safiro, kandi ekintu ekikaba kiikaliire ha kintu ekirukusisana ekitebe ky'obukama, kikaba nikisisana ekisisani ky'omuntu.

²⁷Kandi okweyongerayo haiguru, orugire ha kintu ekikaba nikisisana ekibero ky'omuntu ogu, nkarora ekintu ekirukwengeengeta nk'omulinga, ekirukisisana omurro ogukaba guzitiriirwe; kandi ha ifo, okuruga ha kintu ekirukusisana ekibero ky'omuntu, nkarora ekintu ekirukusisana omurro, omurro gukaba nigumekuka gwehinguliriize omuntu ogu.

²⁸Okumuliikana okukaba kwehinguliriize aho, kukaba nikusisana nk'omuhangazima ogunyakuzooka omu kicu hakiro eky'enjura. Ekitiinisa kya MUKAMA nukwo kikaba nikisisana kiti. Obu nakiboine nagwa hansi njumaire; kandi nahurra iraka ly'omuntu arukubaza.