Read Runyoro - rutooro Ezek 10 Bible Online

Ezek 10 - Runyoro - rutooro bible

Ezek 10

¹Nubwo naimukize amaiso narora omu mwanya ogukaba guli eruguru ya bakerubbi, hakaba haliyo nk'ekintu ekirukusisana nk'ibaale ery'omuhendo safiiro, nikisisana nk'ekitebe ky'obukama.

²Ruhanga yagambira omusaija ow'akaba ajwaire engoye eza kitaani ati: “Ogende hagati y'enyamuziga ezirukwezigisa, ezinyakuli hansi ya bakerubbi, oyooleyo amanda, ogaihe hagati ya kerubbi, oganage hanu na hali okumaraho orubuga rwona.” Namugumyaaho amaiso naagenda.

³Omu kasumi ako omusaija akayataahiiremu bakerubbi bakaba beemeriire ha bukiizi bw'enju obw'obulyo; ekicu kyabutikira ezigati ey'omunda.

⁴Ekitiinisa kya MUKAMA kyaruga omu kerubbi kyangenda ha mulyango gw'enju; enju yaijurwamu ekicu, ezigati yayengeengeta habw'ekitiinisa kya MUKAMA.

⁵Okuhirra okw'amapapa aga bakerubbi, kukahulirwa omu zigati ey'aheeru, nikusisana nk'iraka lya Ruhanga Ow'obusobozi bwona, obu aba naabaza.

⁶MUKAMA obu yaragiire omusaija ow'akaba ajwaire engoye za kitaani, kwiha omurro omu nyamuziga ezikaba nizeezigisa hagati y'abakerubbi, omusaija akataaha yayemerra haihi n'enyamuziga.

⁷Omu ha bakerubbi, akagorra omukono, yaguha omurro, yagukwasa omusaija oli ow'akaba ajwaire engoye eza kitaani omusaija yagumujuna, yaturuka.

⁸Abakerubbi, bakaba nibasisa nk'abaina ekintu nk'omukono gw'omuntu, kiri hansi y'amapapa gaabo.

⁹Nkeetegereza narora, haihi na bakerubbi, hakaba haroho enyamuziga ina, enyamuziga emu, eri haihi na kerubbi omu; kandi enyamuziga ezi, zikaba nizisisana nk'ibaale ery'omuhendo Berulo.

¹⁰Zoona zikaba nizisisana, nk'enyamuziga emu, oku yakubaire etaahiire omu ngenzi yazo.

¹¹Obu zaabaga nizigenda, zaatomaga ha mbaju zaazo ina, itarukuhinduka kandi kunu nizigenda, baitu hoona ha zaakatomaga, enyamuziga ey'omumaiso, yaikaraga eroleriire ezindi ezihondiire, ezitarukuhinduka obu zaabaga nizigenda.

¹²Empanga zaazo, empagi zaazo n'enyamuziga, zikaba ziina amaiso okwehinguliriza enyamuziga boona abbana ezi bakaba bainazo,

¹³nkooku nahuliire, enyamuziga ezi, zaayetwaga enyamuziga rwezigisa.

¹⁴Buli emu ekaba ina obuso bbuna: obuso obw'okubanza bukaba buli bwa kerubbi, obwa kabiri, bukaba buli buso bw'omuntu, obwa kasatu bukaba buli bw'entale, kandi obwa kana, bukaba buli bw'isamba.

¹⁵Abakerubbi bakahurruka baatemba omwiguru. Ebi, nibyo ebihangwa ebyomeezi, ebi naboine haihi n'ekyambu Kebara.

¹⁶Abakerubbi obu baagendaga enyamuziga nazo zaabagenderaga ha rubaju; obu baimukyaga amapapa gaabo kuhurruka omunsi, enyamuziga tizaabarugahoga.

¹⁷Bakerubbi obu baayemerraga, n'enyamuziga zeemerra obu baahurrukaga, na zo ihurruka hamu nabo; habwokuba omwoyo ogw'ebihangwa ebyomeezi, nugwo gukaba guzirumu.

¹⁸Hamyuma, ekitiinisa kya MUKAMA, nubwo kyarugire ha mulyango gw'enju, kyayemerra eruguru ya bakerubbi.

¹⁹Bakerubbi, baimukya amapapa gaabo, baahurruka baaruga omu nsi, mbaroleriire nibagenda n'enyamuziga ibali ha rubaju; baayemerra ha mulyango ogw'irembo erya Burugaizooba ery'enju ya MUKAMA; ekitiinisa kya Ruhanga owa Isirairi, kyabetoroora.

²⁰Ebi, nibyo ebihangwa ebyomeezi ebi naboine omu Ruhanga owa Isirairi, haihi n'ekyambu Kebara; kandi namanya ebihangwa ebi, nkooku bali bakerubbi.

²¹Buli omu akaba aina obuso bbuna n'amapapa ana, kandi hansi y'amapapa gaabo, hakaba nihasisana emikono y'abantu.

²²Kandi ensisana y'amaiso gaabo, bakaba nibasisanira kimu bali aba nkaba mboine haihi n'ekyambu Kebara. Boona bakagenda baterekeriire.