Read Runyoro - rutooro Ezek 11 Bible Online

Ezek 11 - Runyoro - rutooro bible

Ezek 11

¹Mwoyo wa Ruhanga akampimba yantwara ha irembo erya Burugaizooba ery'Enju ya MUKAMA, erinyakuroleriire Burugaizooba. Aho haihi n'irembo eri, nkaroraho abasaija, amakumi abiri na bataano, omuli abo, nkarora Yazaaniya mutabani wa Asura na Paratiya mutabani wa Bbenaaya, abeebembezi b'ihanga ababiri.

²Yangambira ati: Weewe mwana w'omuntu, abantu banu, nubo abanyakwikara nibacika obubi, kandi nubo abanyakuhabisa abantu omu rubuga runu;

³nubo abanyakugamba bati “akasumi ak'okwombeka amaju, tikali hara; orubuga oru, niyo enyungu kacumba byokulya, kandi itwe tuli nyama erukucumbwa omu nyungu egi.

⁴Habweki, iwe omwana w'omuntu, ranga ebiribagwera, ranga.”

⁵Mwoyo wa Ruhanga yantemba yangambira ati: “Genda ogambire enju ya Isirairi oti, MUKAMA naagamba ati: nukwo orukuteekereza oti; habwokuba, mmanyire byona eby'oteekereza.

⁶Oisire abantu baingi muno omu rubuga runu, emitumbi wagigarangataniza omu nguudo zaarwo.

⁷MUKAMA Ruhanga nikyo arukugambira ati: Abantu banyu aba mwaisire mwabata hagati yarwo, egi niyo enyama, kandi orubuga runu, nikyo kinaga ey'okucumbamu; baitu orubuga runu ndirubaihamu.

⁸MUKAMA Ruhanga naagamba ati: Mukatiina empirima; empirima ei mwatiinire, niyo ndibatemesa.

⁹Ndibaiha omu rubuga runu, mbanagire abanyamahanga, kandi mbacwere omusango.

¹⁰Muliitwa empirima; mbacwere omusango ha mutaano gwa Isirairi. Obu nubwo mulimanya nkooku ndi MUKAMA.

¹¹Orubuga runu, tiruliba kinaga kyanyu eky'okubacumba kandi inywe timuliba nyama ey'okucumbamu; ndibacwera omusango ha mutaano ogwa Isirairi;

¹²obu nubwo mulimanya nkooku ndi MUKAMA; habwokuba mukanga kukwata biragiro byange, kandi mukanga kuhikiriza ebigambo byange, mukakuraatira ebigambo eby'amahanga aga muherraine nago.”

¹³Obu nkaba ninkyaranga, Peratiya mutabani wa Bbenaaya yafa. Na nyowe nukwo kujuumara hansi, nateera omuranga ningamba nti: “Ai MUKAMA Ruhanga, obu, nooyenda kumarraho kimu abaasigaireho omu Isirairi?”

¹⁴MUKAMA akangarukamu ati:

¹⁵“Iwe mwana w'omuntu, bagenzi baawe, ab'oruganda rwawe, abo aba wazaahire nabo, enju ya Isirairi yoona abo boona nubo abo, abasi ba Yerusaalemu barukugambaho bati ‘MUKAMA bakamurugaho baagenda hara; ensi enu etuhairwe ebe yaitu.’

¹⁶Habweki, gamba oti: ‘MUKAMA naagamba ati: noobu ndiba nabatwaire hara omu mahanga, kandi noobu ndiba nabararangize omunsi ezindi, baitu nkaba bwikaro bwabo okumara akasumi, omunsi ezi baagenziremu.’

¹⁷Habweki, gamba oti: MUKAMA naagamba ati: ‘ndibasorooza mbaihe omu mahanga, mbaihe omunsi ezi mwararangiiremu, mbahe ensi eya Isirairi.’

¹⁸Obu baligaruka, baliihaho ebintu ebibi byona, bamarreho kimu engeso embi zoona.

¹⁹Ndibafoora engambakamu kandi mbahe omwoyo gumu; ndibaihamu omutima gwabo ogurukuguma dai nk'ibaale, mbahe omutima omuhulizi,

²⁰nubwo balikwata ebiragiro byange, nubwo balihurra ebigambo byange babihikirize, kandi nubwo baliba bantu bange, na nyowe mbe Ruhanga wabo.

²¹Baitu MUKAMA Ruhanga naagamba ati: Abo abaamaliize omutima ha mbandwa ndibajunaana ebi baakozire.”

²²Nubwo bakerubbi baahurrukire, hamu n'enyamuziga ezikaba zibali ha rubaju; ekitiinisa kya Ruhanga owa Isirairi kyabahikaho.

²³Ekitiinisa kya MUKAMA kyaruga hagati y'orubuga kyayemerra ha rusozi orunyakuli ha bukiizi obw'emoso obw'orubuga:

²⁴Mwoyo wa Ruhanga yanyeyoleka nkooku ampimbire, yantwaara Kalidaaya, hali enzaahisibwa. Nubwo ebi nkaba nindora byambuzireho.

²⁵Nabagambira byona MUKAMA ebi yanyolekere.