Read Runyoro - rutooro Ezek 12 Bible Online

Ezek 12 - Runyoro - rutooro bible

Ezek 12

¹MUKAMA akangambira ati:

²“Iwe omwana w'omuntu, oikara n'abantu abaayemere, abanyakwina amaiso ag'okurora, baitu tibarukurora, abanyakwina amatu ag'okuhurra, baitu tibarukuhurra;

³habwokuba bantu beereme. Habweki nu, iwe omwana w'omuntu oyeteekanirize ebintu byona omuntu enzaahisibwa ebi atwara, ogende ozaahe nyamusana abantu nibarora; oruge omu kiikaro kyawe ogende omu kiikaro ekindi nk'enzaahisibwa, ogende abantu nibarora, noobu baraaba bali bantu beereme, rundi balikenga. Ebintu byawe, nk'ebintu eby'omuntu enzaahisibwa, obiturukye nyamusana abantu nibarora,

⁴kandi oturuke wenka omu kairirizi, nk'abantu abarukugenda kuzaaha oku bakora.

⁵Odubule ekisiika bakuroleriire, orabe omu kihuru eki.

⁶Ohimbe ebintu byawe obyete ha ibega nibarora, obiturukye aheeru omu mwirima; oyeswekerre ha maiso nukwo oleke kurora ensi; habwokuba, nkufoire karorwaho k'enju ya Isirairi.”

⁷Nkakora MUKAMA eki yandagiire, naturukya ebintu byange omu bwire bwa nyamusana, nk'ebintu eby'omuntu arukuzaaha kandi omu kairirizi, nadubura ekisiika n'emikono yange; naturuka ekiro, natwara ebintu byange, abantu nibarora.

⁸Nyenkya obu bwakiire MUKAMA akankaguza ati:

⁹“Iwe omwana w'omuntu, enju ya Isirairi, abantu abo abeemi, batakukaguze eki okaba nookora?

¹⁰Obagambire oti: ‘MUKAMA naagamba ati: Ebigambo binu, nibikwata hali Yerusaalemu, na hanju ya Isirairi yoona enyakuli omurubuga oru.’

¹¹Obagambire oti: ‘Eki nkozire, nikimanyisa ekiribahikaho, nkooku nkozire, nainywe nukwo mulikora; mulizaaha kandi mulinyagwa.’

¹²Omubiito arukubalema, alihimba ebintu bye abyete ha ibega ekiro, aturuke; alidubura ekisiika nikyo arabemu; alyeswekerra amaiso, nukwo aleke kurora ensi.

¹³Ndimutega omuguha omutego gwange ogu gulimukwata, ndimuleeta Bbabbulooni omunsi ey'Abakalidaaya, nayo taligirora; kandi niyo aligwamu.

¹⁴Boona abamuheriire, ndibararangya buli hantu, abakoonyezi be, n'amahe ge; ndibaronza nkwasire empirima.

¹⁵Obu ndibataabaaniza omu mahanga nkabararangya omunsi enyingi, nubwo balimanya nkooku ndi MUKAMA.

¹⁶Baitu abamu hali bo, ndibatabura okwitwa empirima, enjara na kiihe, nukwo beegarukemu ebikorwa byabo byona ebibi omu mahanga nembere bagenda kandi bamanye ngu ninyowe MUKAMA.”

¹⁷MUKAMA kandi akangambira ati:

¹⁸Iwe omwana w'omuntu, lya ebyokulya byawe nootukumira, nywa amaizi gawe nookankana, kandi nootiina muno;

¹⁹kandi ogambire abantu ab'ensi enu oti: “Binu MUKAMA nibyo arukugambaho abasi ba Yerusaalemu, abanyakuli omunsi ya Isirairi: balirya ebyokulya byabo nibatiina muno, balinywa amaizi bamazirweho enkizi, habwokuba, ensi yabo eriihwaho ebintu byayo byona ebigirumu, habw'ebibi ebinyakukorwa abo boona abanyakugiikaramu.

²⁰Kandi embuga ezinyakurumu abantu, zirihwerekerezibwa, kandi ensi erifooka kifuruka; nubwo mulimanya nkooku ndi MUKAMA.”

²¹Kandi MUKAMA akangambira ati:

²²“Iwe omwana w'omuntu rufumo ki runu, oru ohurra nirucwibwa omunsi yoona eya Isirairi, orunyakugamba ngu: ‘Ebiro bihingura, ebyarozirwe bihwaho’?

²³Habweki, ogambire abantu oti: ‘MUKAMA naagamba ati: orufumo runu, ninyija kurudibya tibaligaruka kurucwa omu Isirairi.’ Baitu obagambire oti: Akasumi kahikire, kandi ebyarangirwe nibiija kuhikirra.

²⁴Habwokuba okuruga hati omunju ya Isirairi tihaligaruka kuzookamu eby'ebisuba n'okurangamu eby'obugobya.

²⁵Baitu nyowe MUKAMA, ninyowe ndaabazaaga ekigambo, eki ndukwenda kubaza, kandi eki mbalize kiraakorwaga. Tikirigaruka kukeererezibwa, MUKAMA Ruhanga naagamba ati: Omubiro byanyu, inywe ab'enju enyereme, ndigamba ekigambo kandi nkikole.”

²⁶MUKAMA akagaruka yangambira ati:

²⁷“Iwe omwana w'omuntu, ohurre ab'enju ya Isirairi ebi barukugamba ngu: ‘omuntu ogu ebi yayolekerwe, nibiija kumara ebiro bingi, okuruga hati, kandi ngu, naaranga ebiribaho omu busumi obwa hara muno.’

²⁸Habweki, obagambire oti: MUKAMA Ruhanga naagamba ati: Busaho kintu na kimu eki ngambire ekirigaruka kukererezibwa, baitu kyona eki ndaagambaga, kiraakorwaga, MUKAMA Ruhanga nuwe arukugamba ebi.”