Read Runyoro - rutooro Ezek 14 Bible Online

Ezek 14 - Runyoro - rutooro bible

Ezek 14

¹Hanyuma, nubwo haizire abamu ha bakuru ba Isirairi bakampikaho, banyikarra omumaiso.

²MUKAMA akangambira ati:

³Iwe omwana w'omuntu abantu banu, emitima yabo bagimaliize ha kuramya ebisisani kandi ebisisani ebi, nibyo birukubanaga omu kibi; abo nsobora kubaikiriza kunyekaguzaaho?

⁴Habweki, baza nabo obagambire oti MUKAMA Ruhanga naagamba ati: Omuntu weena ow'enju ya Isirairi anyakumaliize omutima ha bisisani, akabiikiriza kumunaga omu kibi, kandi hanyuma akaija kwekaguzaaho omurangi, ninyowe ndimugarukamu mmujunaane ebisisani nyamwingi ebi yayetaireho,

⁵nukwo nyetungire emitima ey'abantu ab'enju eya Isirairi, abandugireho habw'ebisisani byabo.

⁶“Hati nu, ogambire abantu ab'enju ya Isirairi oti: MUKAMA Ruhanga naagamba ati: mwegarukemu, mufuuhye ebintu ebibi ebi mutaaha nimukora.

⁷Obu haraabahoga omu ha Baisirairi, rundi omu ha banyamahanga abanyakwikara omu kitebe ky'Abaisirairi akandugaho akaramya ebisisani, kandi hanyuma akagenda kwekaguzaaho omurangi, nyowe MUKAMA ninyowe ndimugarukamu!

⁸Ndimuhakaniza ndimufoora ky'okurorraho ky'abantu, ndimwiha omu kitebe ky'abantu bange, nukwo mumanye nkooku ndi MUKAMA.

⁹Kakuba omurangi abiihwabiihwa akabaza ekigambo buli nyowe MUKAMA niinyowe mbiihire omurangi ogu, kandi ndimwiha omu bantu bange.

¹⁰Balifubirirwa hamu, omurangi n'oli kyekaguzaaho omurangi, balifubirwa omu mulingo gumu.

¹¹Obu enju ya Isirairi, nubwo etalyongera kundugaho kandi tibalyongera kw'esiisa nibakora ebibi, nubwo babe bantu bange, na nyowe mbe Ruhanga wabo, ebi MUKAMA Ruhanga nibyo arukugamba.”

¹²Kandi MUKAMA akangambira ati:

¹³“Iwe omwana w'omuntu, ensi kakuba esiisa ekaburwa obwesige hali nyowe, ndigiima ebyokulya ndinaga enjara nyite abantu n'ebisoro,

¹⁴omunsi omu noobu haakubairemu abantu banu abasatu. Noha, Daneeri na Yubbu, oburungi bwabo nubwo bwakubatabwire, ebi nibyo MUKAMA agonza.

¹⁵Kakuba ndabya ebisoro eby'omu kisaka omunsi egi, bikagisiisa, ekaba kitongo, hataroho muntu n'omu asobora kugirabamu habw'ebisoro ebi,

¹⁶abantu abasatu abo noobu baakubaire bagirumu nyowe MUKAMA Ruhanga nindahira tibaakujunire batabani baabu rundi bahara baabu; bbo bonka nubo baakujunirwe, baitu ensi yakufookere kitongo

¹⁷Rundi, kakuba nsobora ensi egi kugireetamu obulemu, nkatwekayo eby'okurwana kahwerekereza bimaleho abantu n'ebisoro,

¹⁸nyowe MUKAMA Ruhanga nindahira, tibaakusoboire kujuna noobwakubaire abaana baabu, baitu baakwejunire bonka.

¹⁹Rundi kakuba ensi egi nginagamu kagingo, nkagibiihirirwa nkaita abantu n'ebisoro,

²⁰Noha, Daneeri na Yubbu, noobu baakubaire bali omunsi egi, nyowe MUKAMA Ruhanga nindahira, tibaakujunire abaana baabu. Oburungi bwabo bwakujunire bbo bonka.

²¹“MUKAMA Ruhanga naagamba ati: Lero, kiriba kita, obu ndikorra Yerusaalemu ebintu bbina ebirukusaaliza eby'okugicwera omusango. Empirima, enjara, enyamaiswa ez'omu kisaka, na kagingo, biite abantu n'ebisoro bibimaleho!

²²Kakuba omunsi egi habaho abasigaireho ab'okwihamu batabani baabu na bahara baabu obu balikuhikaho, mukarora engeso zaabo n'ebikorwa byabo mulinanuka, ekifubiro eki nahaire Yerusaalemu nkooku kyagisemeriire.

²³Obwolirora engeso zaabo n'ebikorwa byabo, mulimanya, byona ebi nagikozire, nkooku nabikozire nyina obulyo.”