Read Runyoro - rutooro Ezek 16 Bible Online

Ezek 16 - Runyoro - rutooro bible

Ezek 16

²“Iwe omwana w'omuntu, manyisa Yerusaalemu ebintu ebibi ebi erukukora,

³kandi ogigambire oti: Binu, MUKAMA Ruhanga nibyo arukukugambira: Endugirro n'obuzaarwa bwawe niyo ensi y'Abanyakanaani; sso, akaba ali mw'Amooli, kandi nyoko Muhiiti.

⁴Ha kiro eki wazaaliirweho, batakusarre, batakwogye, batakusiige kisura kandi, batakufubike n'ebyaahi.

⁵Busaho muntu n'omu ayakugiriire embabazi, nukwo akukorre ebintu nk'ebi, baitu bakakuhungura omu kisaka, habwokuba okanobwa

⁶obu narabire nambere okaba oli nakubona nooyekulingura omu sagama yawe, nakugamba nti: oyomeere,

⁷kandi okule nk'ekimera eky'omu kisaka! Okakura waraiha, waba mwisiki mukuru mali, wasuna amabeere, isoke lyawe lyakura, baitu waikaraga busa otajwaire.

⁸“Obu nagarukire nakurabaho nakurora, nkasanga akasumi kawe ak'okugonza n'okugonzibwa kahikire; nukwo kukwata ekutiya yange nkagikujweka, abantu baleke kukurora enjuuro; MUKAMA Ruhanga naagamba ati: nkakunihiza nti: ninyija kukugonza, naragaana na iwe, wafooka wange.

⁹Nubwo nakwogeze nakwihaho esagama nakusiiga amagita.

¹⁰Kandi nakujweka ebyokujwara eby'obuhoiho n'enkaito zempu, nakujweka kitaani enungi na liiri.

¹¹Nkakuha ebintu ebirungi eby'okwekunisa, nakujweka empogo ha mikono, n'omukuufu omu bikya.

¹²Nkakujweka empeta ha nyindo, omumatu, n'ekondo enyakusemiire muno.

¹³Nukwo wahunzirwe oti, na zaabbu n'efeeza; ebyokujwara byawe bikaba biri bya kitaani enungi, bya liiri, by'orugoye orw'obuhoiho-oruhunzirwe; okalya obuhunga obuniinuukire, obwoki bw'enjoki, n'amagita nukwo kusemera muno oti, wasemerra kuba mugo

¹⁴kandi nukwo kurangaanwa oti omumahanga habw'okusemera kwawe, habwokuba kukahikirra habw'ekitiinisa eki nakuhaire, ebi nibyo MUKAMA arukugamba.

¹⁵“Baitu okeerora wayerigira; ekitiinisa kyawe kyakuhambiriza kwefoora mukuhya; wayehaga buli muntu ayakaijaga.

¹⁶Okakwata ebimu ha byokujwara byawe, wayekorra ebiikaro ebirungi eby'ekitiinisa, omu numwo wakuuhizaaga; ekintu nk'eki tikikabahoga kandi tikirigaruka kubaho.

¹⁷Kandi okakwata amabaale gawe ag'omuhendo amarungi muno ag'ezaabbu n'efeeza yange aga nkaba nkuhaire, wageekorramu ebisisani by'abasaija, nibyo wakuuhyaga nabyo;

¹⁸Okakwata ebyokujwara byawe ebihuunzirwe, nibyo wabisweka wabihongera amagita n'obubbaani bwange.

¹⁹Ebyokulya nakuhaire ensaano enyakuniinukire kurungi, amagita n'obwoki bw'enjoki ebi nakuliisaaga, nibyo wabihongiire, bibiboyere. Ebi nibyo MUKAMA arukugamba.

²⁰Batabani bawe na bahara bawe ab'okaba onzaaliire, abo nabo, okabibahongera, bibalye.

²¹Ikuuhya lyawe, eryakwisize abaana bange, wabahongera ebisisani, baaba kihongwa eky'okwokya, eki nookyeta kintu ky'okuzaana?

²²Obwokaba nookora ebintu ebi byona, kandi oli omu ikuuhya lyawe, otaijuke ebiro eby'obuto bwawe, rundi akasumi akawamazire otajwaire kantu oli busa kwonka, nooyekulingura omu sagama yawe.

²³“MUKAMA Ruhanga naagamba ati: Obwoliba omazire kukora ebi byona olikibona, olikibona

²⁴okekorra ekituuti, wayeyombekera buli hantu ebiikaro eby'ekitiinisa.

²⁵Ha buli ntangatangano y'enguudo okeeyombekerayo ekiikaro eky'ekitiinisa eki osiisiramu oburungi bwawe, n'ikuuhya lyawe, nooyeha wena arakaija.

²⁶Kandi okakuuhya n'Abanyamisiri abataahi bawe abanyarwanju, wayeyongerra kimu ikuuhya, wankwasa ekiniga.

²⁷Hati nu, nyimukize omukono gwange nkufubire, omugabo gwawe oguwalengiirwe ngukeeheze, nkulekiire abanyanzigwa bawe, nubo Abafirisiti abaatamirwe engeso zawe embi.

²⁸Kandi okakuuhya n'Abasiriya, habwokuba okaba otakanihire; ego, okanjuka nabo, kandi nabwo, otanihe.

²⁹Ikuuhya lyawe otaligarukize aho, kandi okakuuhya n'abantu ab'ensi ensuubuzi ey'Abakalidaaya; nabwo otanihe.

³⁰“MUKAMA Ruhanga habw'okurora okozire ebi byona, ebinyakukorwa omunyarwanju otaina nsoni;

³¹okeyombekera ekisiika ha buli ntangatangano, y'enguudo kandi wayeyombekera ekiikaro eky'ekitiinisa buli hantu. Baitu nabwo otabe nka malaaya, habwokuba wagayaga sente ezi waheebwaga.

³²Okasisana omukazi omuswerwa ensiihani, anyakugonza abasaija ab'aheeru okukira iba!

³³Abasaija, nubo baha baamalaaya boona ebisembo; baitu iwe, niiwe wahaire banywani bawe ebisembo, obatwalirize baruge handi hoona, ikuuhya lyawe, niryo lyakukoleze ebi.

³⁴Obusiihani bwawe, nukwo bwakukoleze buti, ekitakorwa abakazi abandi: Busaho musaija akuhambiriza kukora obwamalaaya, baitu niiwe obeeyetera niiwe obaha sente kandi kunu tibaikuhaire; nikyo orukwahukanira ha bakazi abandi.

³⁵Habweki, iwe omukuuhya ohurre MUKAMA eki arukugamba:

³⁶MUKAMA Ruhanga naagamba ati: Habwokuba okajuura waikiriza kurorwa oli busa, obu okaba nooyanjuka n'enganjani zaawe embi, n'ebisisani byawe ebibi, na habw'okubiha esagama y'abaana bawe,

³⁷habweki, ninyija kusorooza enganjani zawe embi zoona, abaakwesiimisaaga, boona aba wagonzaaga na boona aba wanobere; ninyija kubasorooza mbakuleetere, nkujuule bakusunge, nukwo bakumanye kurungi nkooku wamezire.

³⁸Kandi ndikucwera omusango, nk'abakazi abanyakucwa ekiragaano eky'obuswere kandi abanyakwita abantu na iwe nkwise ekiniga n'obukaya.

³⁹Ndikulekera enganjani zawe embi, baseese ekisiika kyawe, ebiikaro byawe eby'ekitiinisa; bakujuule ebyokujwara byawe, bakwiheho amabaale gawe ag'omuhendo amarungi, bakuleke oli busa otajwaire kantu.

⁴⁰Balizinisa ihe liije likurwanise, bakuteere amabaale, bakutemateme n'ebitara.

⁴¹Amaju gawe baligookya, bakucwere omusango, omumaiso g'abakazi baingi; nukwo ndikutanga nti, nukwo olekere aho obusiihani, n'okwongera kwegulirra.

⁴²Nukwo ndikwemarraho ekiniga nti mpuumule, nculeere, tindigaruka kubiihirwa.

⁴³Habwokuba okeebwa ebi nakukoliire obu okaba oli muto, kandi okakora ebintu ebirukumbiihiza; nikyo ndikukorra ebirukusisana byona ebi wakozire, MUKAMA Ruhanga nukwo arukugamba ati kiki ekyakwongiize obusiihani, ha bintu ebindi ebibi ebi wakozire?

⁴⁴Hati, buli muntu weena omucwi w'enfumo, araakucwahoga orufumo runu ati: ‘Embwa tereka misitamire ya nyinayo;’

⁴⁵Mazimakwo, okazaarwa omukazi ayanobere iba n'abaana be; okazaarwakwo na bagenzi bawe abaisiki, abaanobere baiba bo n'abaana babo

⁴⁶kandi omwisiki mukuru wawe ayaikaraga n'abahara ha rubaju rwawe orw'obumoso Musamaliya; kandi muto wawe ayaikaraga n'abahara ha rubaju rwawe orw'obulyo Musodomu.

⁴⁷Baitu iwe otagonze kukwata engeso zaabo, rundi kukora ebikorwa ebibi ebi baakoraga; omu kanya kake kati, engeso zawe, zikakira hara muno ezaabo, obubi.

⁴⁸MUKAMA Ruhanga naagamba ati: Owanyoko Omusodomu na bahara be nka iwe na bahara bawe ebi mwakozire.

⁴⁹Ogu, gukaba musango gw'owanyoko Omusodomu: uwe n'abahara, bakaba baina engeso ey'okwekuza, baina omukoijo, bagwagwaine, baitu tibaakoonyeraga abanaku n'abaseege.

⁵⁰Bakaba bali beehulizi; kandi baakoraga ebintu ebi mbaroleriire; obu naboine eki, nukwo kubahwerekereza.

⁵¹Samaliya, etakole kimu kya kabiri eky'ebibi byawe; okakora ebibi bingi okukira ebi baakozire, kandi ebikorwa ebibi ebi wakozire, bikaleetereza abaanyoko kuzooka nk'abarungi.

⁵²Hati na iwe k'oswazibwe habw'emisango ei waihireho abanyoko; habw'ebibi byawe ebi wakozire muno okukira bo, hati bo nibakukira oburungi. Habweki, kwatwa ensoni, kandi oswazibwe, habwokuba okaleetera abaanyoko kuzooka nk'abarungi.

⁵³“Ndibagarurra ebintu byabo itungo erya Sodomu n'abantu baayo, ngarre n'erya Samaliya n'abantu baayo, kandi ndikugarurra n'itungo lyawe, obeemeriire hagati,

⁵⁴nukwo oswazibwe kandi okwatwe ensoni habw'ebi ebi byona ebi wakozire, wabafookera muhuumuza.

⁵⁵Abaanyoko Abasodomu na bahara baabu, baligaruka, baligaruka omu butaka bwabo obwaira; Abasamaliya na bahara baabu, nabo baligaruka omu butaka bwabo obwaira.

⁵⁶Owanyoko Sodomu, obwokaba nookyayenyumiza,

⁵⁷obubi bwawe butakamanyirwe, tinuwe waikaraga nootebya kubi? Hati na iwe, habwa bahara b'Edomu n'abataahi be boona, na habw'abahara b'Abafirisiti, abo ab'oherraine nabo abarukukugaya, ofookere kintu ky'okujumwa.

⁵⁸MUKAMA naagamba ati: Hati sasura orwanju rwawe, n'ebintu ebibi ebi wakozire.

⁵⁹Mazimakwo MUKAMA Ruhanga naagamba ati: “Ndikukora nkoku wakozire iwe ayagayire endahiro yawe, wacwa n'endagaano.

⁶⁰Baitu nabwo, ndiijuka endagaano yange naragaine na iwe okyali muto, kandi ndikora na iwe endagaano ey'ebiro yona.

⁶¹Obu ndikwata abanyoko, bakuru bawe na bato bawe, nkabakugarurra nk'abaana, eki nkakikora hatali habw'endagaano naragaine na iwe, obu nubwo oliijuka engeso zawe okwatwe ensoni.

⁶²Ndihikiriza endagaano ei nakozire na iwe obu nubwo olimanya nkooku ndi MUKAMA,

⁶³nukwo oijuke osoberwe oburwe n'eky'okugaruka kugamba habw'ensoni, mmazire kukuganyira byona ebi wakozire.”