Read Runyoro - rutooro Ezek 17 Bible Online

Ezek 17 - Runyoro - rutooro bible

Ezek 17

¹MUKAMA akangambira ati:

²“Mwana w'omuntu, koikeza ekikoikyo, kandi oganikize enju ya Isirairi oruganikyo;

³obagambire oti: MUKAMA Ruhanga naagamba ati: Isamba erikooto erikaba liina amapapa amakooto kandi agaraihire, erikaba liina ebyoya eby'erangi nyingi, likaija Lebbanoni, lyanoga itaagi ery'amasonsolya ag'omukogoto;

⁴lyanoga akataagi kaagwo ak'eruguru mali omu masonsolya, akamu ha butaagi bwagwo obuto, lyakatwara omunsi ey'obusuubuzi lyakabyara omu rubuga orw'abasuubuzi.

⁵Hanyuma, lyakwata ha mbibo ey'ensi egi, lyagibyara omu itaka ery'orweezo; likagibyara nambere hakaba hali amaizi maingi muno. Likagibyara nesisana nk'akataagi ak'omukinga,

⁶yamera, yafooka omuzabbibbu omugufu, gwayagana, amataagi gaagwo gaakura goolekiize isamba, kandi emihama yagwo yaikarra. Embibo egi, nukwo yafookere muzabbibbu eti, gwanaga amataagi gwamera ebikoora.

⁷Baitu, hakaba haroho isamba erikooto, erindi, nalyo linyina amapapa makooto n'ebyoya bingi, omuzabbibbu ogu, gwalyanjururra emihama, gwaliturukiza amataagi gaagwo nukwo ligwitirre.

⁸Isamba, lyaihurra omuzabbibbu ogu, lyagwiha nambere gukaba gubyairwe, lyagutwara omwitaka erirungi, nambere hakaba hali amaizi maingi muno, nukwo gunage amataagi, gwane ebijuma, gufooke muzabbibbu gw'ekitiinisa.

⁹Obagambire oti: MUKAMA Ruhanga naakaguza ati: Omuzabbibbu ogu guliba guta? Isamba eri, tiririgumenya, emihama yagwo likagunaga ha bwerre, likagunogorraho amataagi, ebikoora byagwo byona ebibisi ebimezire juba bikahotoka? Kugwiha tikiryetaagisa omuntu ow'amaani, rundi abantu baingi,

¹⁰Obu gulimara kwihururwa, guliba guta? Obu guliteerwa omuyaga ogw'obukiizi bw'emoso, tigulihotokera kimu-gukahotokera kimu aho owagwo nambere gwakuliire?”

¹¹“Kandi MUKAMA akangambira ati:

¹²Hati, kaguza enju enyereme enu oti: Ebintu ebi, nimumanya amakuru gabyo. Obagambire oti: Omukama wa Bbabbulooni akaija Yerusaalemu, yakwata omukama n'ababiito baayo, yabaleeta Bbabbulooni.

¹³Yakwata omu, ha babiito abo, yakora nawe endagaano, ataireho n'okumurahiza. Akatwara abantu abarangwa ibara ab'ensi egi.

¹⁴Obukama nukwo bube bwa hansi, buleke kweyimukya, nukwo busobole kwikaraho kugumyaho endagaano ye.

¹⁵Baitu omukama wa Yuda akatuma engabwa omunsi Misiri, naasaba bamutungire embaraasi, bazinise n'ihe ery'amaani. Baitu alisingura omuntu anyakukora ebintu nk'ebi, akira? Asobora kucwa endagaano, kandi akakira?

¹⁶MUKAMA Ruhanga naagamba ati: Mazima, omu kiikaro eki, omukama ogu ayantaire ha ngoma ekyaikaramu, mukama w'endahiro ei yagayire yacwa n'endagaano, Bbabbulooni nuho aligwa.

¹⁷Faraaho n'ihe rye ery'amaani, n'abantu abaingi, obu balituuma entuumo, bakombeka ebisiika eby'okugota nukwo baite abantu baingi, talimukoonyera omu kasumi k'obulemu.

¹⁸Habwokuba, akagaya endahiro kandi yacwa n'endagaano baitu akataho omukono, kandi ebintu ebi byona, talikira.

¹⁹Nikyo MUKAMA Ruhanga arukugambira ati: Mazima, ndimufubira habw'endahiro yange yagayire, na habw'endagaano yange ei yacwire.

²⁰Ndimunagaho omuguha, omutego gwange gumukwate, mmuleete Bbabbulooni, nuho mucwerre omusango habw'okusiisa obwesige hali nyowe.

²¹Engabwa ez'amahe ge zoona ziriitwa ebitara, abalisaaga ho balirarangibwa buli hantu, obu nubwo mulimanya ngu: nyowe MUKAMA ninyowe nabalize.”

²²MUKAMA Ruhanga naagamba ati: “Nyowe nyenka, ninyowe ndinoga akataagi omu masonsolya g'omukogoto, nkabyale; ha butaagi obuto obw'omu masonsolya, nuho ndiiha akato, nkabyale ha rusozi orw'ekitiinisa kandi oruraihire;

²³ha rusozi rwa Isirairi orurukukirra kimu kuraiha, nuho ndikabyara, nukwo kanage amataagi, kaane ebijuma, kafooke mukogoto ogw'omugaso; ebisoro ebya buli mulingo, biraalege hansi, enyonyi eza buli mulingo ziraalege omu kiituuru ky'amataagi gaako.

²⁴Emiti yoona ey'omu kisaka nubwo erimanya ngu, nyowe MUKAMA ninyowe ngufuhaza omuti oguraihire, kandi omugufu ninyowe nguraihya, nyomya omuti omubisi, kandi ogwomere nguragira gujumba.”