Read Runyoro - rutooro Ezek 18 Bible Online

Ezek 18 - Runyoro - rutooro bible

Ezek 18

¹MUKAMA akagaruka yangambira ati:

²“Nimugenderra ki, kwikara nimucwa orufumo runu orurukubaza hansi Isirairi ngu: ‘Baisaabaana nubo baaliire emizabbibbu erukusarra, baitu amaino g'abaana gaakwatwa amangigina’?

³MUKAMA Ruhanga naagamba ati: Ndahiire orufumo runu tiruligaruka kucwibwa omu Isirairi.

⁴Emyoyo yoona eba yange, omwoyo ogwa ise-mwana n'ogw'omwana, omwoyo kakora bibi, gulifa.

⁵“MUKAMA naagamba ati: Omuntu kakuba aba murungi, naakora ebiragiro eki bigamba kandi ekihikire

⁶atarukuliira hansozi rundi atarukuta maiso ha bisisani by'enju ya Isirairi, atarukwohya muk'omutaahi rundi kwirra haihi omukazi anyakuli omu kasumi ak'okuzira,

⁷atarukubonesa muntu n'omu, baitu naagarurra omunyaibanja omusimbo ogu yamusimbiire, atarukwiba, anyakuliisa abajara, abarukugenda busa abajweka

⁸atahora sente nukwo atunge amagoba rundi kutwara ensaagi, anyakwetanga kukora ebibi, anyakucwera abantu emisango omu bwinganiza,

⁹anyakukwata ebiragiro byange kandi anyakutaho omutima kuhikiriza ebigambo byange ogu nuwe omurungi, kandi mazimakwo, ogu nuwe alyomeera.

¹⁰Omuntu ogu obu alizaara omwana omuhoogozi omwisi w'abantu,

¹¹atarukukora ekimu hali ebi, baitu naaliira hansozi, naayohya muk'omutaahi,

¹²naabonesa abanaku n'abaseege kandi naiba, atagarrayo musimbo, arukuramya ebisisani,

¹³anyakuhora sente nukwo atunge amagoba kandi anyakutwara ensaagi; ogu alyomeera? Nangwa, talyomeera. Akakora ebinugwa ebingaine aho mazimakwo alifa omusango guliba gumusingire.

¹⁴“Baitu omuntu ogu kakuba azaara omwana arukurora ebibi byona ise ebi yakozire, akatiina, akaleka kukora nkooku ise yakozire,

¹⁵akaleka kuliira hansozi rundi kuramya ebisisani eby'enju ya Isirairi, atoohya muk'omutaahi,

¹⁶atakora kubi omuntu n'omu, atasaba musimbo, ataiba, baitu anyakuliisa abajara akajweka n'abarukugenda busa,

¹⁷anyakwetanga kukora kubi, atatwara magoba rundi ensaagi, anyakukwata ebigambo n'ebiragiro byange; talifa habw'ebibi ebyakozirwe ise; mazima alyomeera.

¹⁸Kandi ise, habwokuba akaba ali muhoogozi, akaiba ebintu by'owanyina, kandi yakoraga abantu be eki bataragonzaaga, obubi bwe nubwo bulimwita.

¹⁹Rundi musobora kwekaguza muti: ‘Habwaki, omwana atabonesibwa habw'ebibi bya ise?’ Engarukamu niyo enu: Omwana obu alikora kandi ataireho omutima okukwata ebiragiro byange byona, mazimakwo alyomeera.

²⁰Omwoyo ogunyakukora ekibi, gulifa, omwana talibonesibwa habw'ebibi bya ise, rundi ise-mwana kubonesibwa habw'ebibi by'omwana we. Omuntu omurungi, oburungi bwe nubwo bulimuhaisa empeera, kandi omubi obubi bwe, nubwo bulimufubiza.

²¹“Baitu omuntu omubi kakuba afuuhya ebibi bye byona ebi yakozire, akakwata ebiragiro byange byona, akakora ebiragiro eki bigamba kandi ekihikire, mazimakwo alyomeera; talifa.

²²Busaho na kimu ha bibi ebi yakozire ekiriijukwa; ebirungi ebi yakozire nibyo birimwomeeza.

²³MUKAMA Ruhanga naagamba ati: Nimuteekereza, ngonza omuntu omubi afe, atacwire engeso ze, nukwo akoomeera?

²⁴Baitu omuntu omurungi kakuba aleka kukora ebirungi, akatandika kukora ebintu ebibi abantu ababi ebi bakora, alyomeera? Busaho kintu na kimu ha bintu ebirungi ebi yakozire ekiriijukwa; obugobya bwe n'ebibi nibyo birimwisa.

²⁵“Baitu inywe nimugamba muti ‘MUKAMA ebi akora tibiri by'obwinganiza.’ Mutege amatu inywe ab'enju ya Isirairi. Ninyowe nkora ebitali by'obwinganiza, rundi ninywe mukora ebitali by'obwinganiza?

²⁶Omuntu omurungi obwaleka kukora ebirungi, akatandika kukora ebibi, akafa omu kasumi ako, aitwa ebibi eby'akozire.

²⁷Kandi omuntu omubi obwaleka kusiisa akakora ebihikire kandi ebirungi, alijuna obwomeezi bwe.

²⁸Habwokuba akateekereza muno yalekera kimu ebibi byona ebi yakozire, ogu alyomeera, talifa.

²⁹Baitu enju ya Isirairi neegamba eti ‘MUKAMA ebi akora; tibiri by'obwinganiza.’ Haa, iwe enju ya Isirairi, mazimakwo ebi ndukukora tibiri by'obwinganiza? Ebi orukukora, tinibyo ebitali by'obwinganiza?

³⁰“Nikyo MUKAMA arukugambira ati: “Iwe, enju ya Isirairi, buli omu omuli-inywe, ndimucwera omusango nindorra ha bikorwa bye. Mweteere, mufuuhye ebibi byanyu byona, bitaliija kubahwerekereza

³¹mulekere kimu ebibi byona ebi mutaaha nimukora, mwetungire omutima n'omwoyo omuhyaka! MUKAMA Ruhanga naagamba ati: Bambi iwe, enju ya Isirairi, waija kufeera ki?

³²Tingonza omuntu n'omu afe, habweki nu, kubuutuka, nukwo oyomeere.”