Read Runyoro - rutooro Ezek 2 Bible Online

Ezek 2 - Runyoro - rutooro bible

Ezek 2

¹Omuntu ogu yangamba ati: “Iwe mwana w'omuntu imuka oyemerre, nukwo mbaze na iwe.”

²Obwakaba naakyabaza, omwoyo gwa Ruhanga gwantaahamu, gwanyimukya, gwanyemereza; namuhurra nambaliza.

³Yangamba ati: “Iwe omwana w'omuntu, nakutuma hali abantu ba Isirairi, omwihanga ery'abaanyemiire; boona baisenkurubo, bakanyemera okuhika na hakiro kinu ekya hati.

⁴Kandi abantu abo, b'emigayo kandi nsookoomi: Abo nubo ndukukutumaho; ogende obagambire oti: ‘MUKAMA Ruhanga naagamba ati’:

⁵Kandi obu balihurra rundi obu balyanga kuhurra (habwokuba bantu b'enju eyayemere) balimanya nkooku bahikirweho omurangi.

⁶Iwe omwana w'omuntu, otabatiina, noobu oraaba nooraba omu emyeramaino n'amahwa kandi oikaliireho enge; otatiina ebi barukugamba, kandi otakangwa amaiso gaabo, habwokuba, bantu b'enju eyayeremere.

⁷Kandi obagambire ebinkuragiire, noobu baraahurra, noobu baraayanga kuhurra; habwokuba, bantu b'enju eyayeremere.

⁸“Baitu iwe omwana w'omuntu, ohurre eki ndukukugambira; otalyema nk'enju egi eyayemere; wesame olye ekindukukuha.”

⁹Obu namagamagire narora omukono ogugoroliirwe nambere ndi kwija kurora, dara omuzingo gw'ekitabu oguhandiikirwe guli omu mukono ogu;

¹⁰omuntu ogu yakinyanjururra, kikaba kihandiikirweho omu maiso n'enyuma, kikaba kihandiikirweho ebigambo eby'okurra, eby'empamo kandi eby'enaku.