Read Runyoro - rutooro Ezek 20 Bible Online

Ezek 20 - Runyoro - rutooro bible

Ezek 20

¹Ha kiro ekya ikumi eky'okwezi okwa kataano, omu mwaka ogwa musanju, abamu bakuru ba Isirairi bakaija okwekaguza hali MUKAMA, banyikarra omumaiso.

²MUKAMA akangambira ati:

³“Iwe nwana w'omuntu, baza n'abakuru ba Isirairi obagambire oti: MUKAMA Ruhanga nagamba ati: Ekimwiziriire nukwo kunyekaguzaaho? MUKAMA Ruhanga naagamba ati: Mazimakwo, tindukwija kubaikiriza kunyekaguzaaho.

⁴Iwe mwana w'omuntu, bacwere omusango. Hanyuma, nukwo obamanyise ebibi baisebo ebi baakozire,

⁵kandi obagambire oti: MUKAMA Ruhanga naagamba ati: Hakiro eki nakomiireho Isirairi, nkarahira oruzaaro orw'enju ya Yakobbo, nimbeemanyisa omunsi Misiri, nkabarahira ningamba nti: Ninyowe MUKAMA Ruhanga wanyu.

⁶Hakiro eki nabarahiriireho nti: Ndibaiha omunsi Misiri, mbatwale omunsi ei nabeegombooliize ensi enyakurumu amata n'obwoki bw'enjoki, ensi erukukirra kimu zoona ekitiinisa,

⁷obu nabagambire nti: Mufuuhye ebintu ebibi ebi, inywena ebi murukwikazaaho amaiso muleke kwesiisa nimuramya ebisisani bya Misiri, ninyowe MUKAMA Ruhanga wanyu,

⁸bakaanyemera kandi batagonze n'okumpuliriza; ebintu byabo ebibi ebi baikazaahoga amaiso boona batabinage, kandi bataleke ebisisani ebya Misiri.

⁹Baitu eki ntakikole habwokuba eki kyakunsisire ibara; omu maiso g'abantu ababaikiramuga hali nkaba ndangiririire Isirairi ngu nkaba ningenda kubaiha omunsi Misiri.

¹⁰Na nyowe, nukwo kubaiha omunsi Misiri, nabaleeta omwirungu.

¹¹Nkabaha ebiragiro byange, nabagambira ebigambo byange ebinyakwomeeza omuntu anyakubikwata.

¹²Kandi ekindi, nkabateeraho ekiro kya Sabbato, ako nuko akamanyiso ak'endagaano yange nabo, akaraabaijukyaga, nkooku nyowe MUKAMA ninyowe mbeeza.

¹³Baitu enju ya Isirairi ekanyemera omwirungu: bakanga kukwata ebiragiro byange kandi bakagaya ebigambo byange ebiryomeeza omuntu anyakubikwata; kandi ekiro kyange ekya Sabbato batakitemu kitiinisa. Na nyowe nukwo kubabiihirirwa muno omu irungu, namalirra kubahwerekereza.

¹⁴Baitu eki ntakikole, habwokuba, kyakuleetiire ibara lyange kugaywa abantu ab'amahanga abandozire ninyiha Abaisirairi omunsi Misiri.

¹⁵Kandi nkabarahira omwirungu nti: Ensi ei nkaba mbahaire, enyakurumu amata n'obwoki bw'enjoki, enyakukirra kimu ensi zoona ekitiinisa, tindigibatahya,

¹⁶habwokuba bakagaya ebigambo byange, baayanga kukwata ebiragiro byange, ekiro kyange ekya Sabbato batakitemu kitiinisa; habwokuba emitima yabo bakaba bagimaliize ha bisisani.

¹⁷Baitu nkabaganyira tinabahwerekereza, kandi boona ntabaitire omwirungu.

¹⁸Nkagambira abaana baabo omwirungu nti: Mutaligendera ha biragiro bya baisiinywe, mutalyeetaho ebigambo byabo, kandi mutalyesiisa mukaramya ebisisani.

¹⁹Ninyowe MUKAMA Ruhanga wanyu; mukwatege ebiragiro byange kandi mwekambire kukwata ebigambo byange,

²⁰mutemuga ekitiinisa, ekiro kyange ekya Sabbato, niyo ebege karorwaho k'endagaano ei twakozire, kandi ebaijukyege nyowe nkooku mba MUKAMA.

²¹Baitu abaana nabo bakanyemera; baayanga kukwata ebiragiro byange, batateho omutima kwekambira ebigambo byange ebinyakwomeeza omuntu anyakubikwata; ekiro kyange ekya Sabbato batakitemu ekitiinisa. “Na nyowe nukwo kubabiihirirwa n'okumalirra kubeemarraho ekiniga omwirungu.

²²Baitu eki ntakikole, habwokuba kyakuleetiire ibara lyange kugaywa amahanga agandozire ninyiha Abaisirairi omunsi Misiri.

²³Kandi nkabarahira omwirungu nti: “Ndibataabaaniza omu mahanga, mbararangye omunsi,

²⁴habwokuba batahikirize ebigambo byange, kandi bakanga ebiragiro byange, ekiro kyange ekya Sabbato tibakitamu kitiinisa, amaiso gaabo bakagata ha bisisani ebya baisebo.

²⁵Kandi nkabaha ebiragiro ebikaba bitali birungi, nabagambira ebigambo ebikaba bitarukusobora kuboomeeza;

²⁶nkabaleka baayesiisa bonka n'ebihongwa byabo nyabwabu nabaleka baatamba abaana baabo aboojo emizigaijo. Eki nkakikora ningenderra kubafubira, n'okubamanyisa nkooku ndi MUKAMA.

²⁷“Habweki, iwe mwana w'omuntu, baliza ab'enju ya Isirairi obagambire oti: MUKAMA Ruhanga naagamba ati: Haroho ekintu ekindi baisenkuru inywe eki bambiihiizeemu, baaburwa obwesige hali nyowe, kandi kunu nkaba mbataahize omunsi ei nkaba ndahiire kubaha.

²⁸Habwokuba obu namazire kubahikya omunsi egi, orusozi hoona ha baakaroraga oruraihire, rundi omuti ogujumbire, aho nuho baatambiraga ebyonzira byabo, nuho baahongeraga ebihongwa byabo ebyankwasize ekiniga; oku nuho baayokezaaga ebintu ebirukuboya, kandi nuho baaseesaga ebihongwa byabo eby'ebyokunywa.

²⁹(Nkabakaguza nti: Ekiikaro eki mwikara nimugendamu, nikyo kiha? Baakiruka ibara Baama, amakuru gaalyo Ekiikaro ekiraihire, nukwo kyetwa okuhika na hati.)

³⁰Habweki, gambira enju ya Isirairi oti: ‘MUKAMA Ruhanga naagamba ati: Na inywe mulyesiisa nka baisiinywe, mukole ebintu ebibi?

³¹Wewe inywe ab'enju ya Isirairi, obu muraaba nimuhonga ebihongwa byanyu kandi nimutamba abaana banyu nimubokya omu murro mwayesisiisa n'ebisisani byanyu okuhika na hati. MUKAMA nagamba ati: Tindibaikiriza kunyekaguzaho.’ ”

³²“Eki murukuteekereza nimugira ngu: ‘Naitwe ka tusisane amahanga, tusisane nk'abantu ab'ensi ezindi abanyakuramya emiti n'amabaale; eki tikiribaho.’

³³“MUKAMA Ruhanga naagamba ati: Ndahiire ninyija kubalemesa amaani, obusobozi, n'ekiniga.

³⁴Ndibasorooza mbaihe omu mahanga n'omunsi ezi mwararangiiremu, mbaihiseeyo amaani, obusobozi n'ekiniga;

³⁵kandi ndibatwara omwirungu ery'emahanga, oku nuho ndibacwererra omusango niturorangana amaiso n'amaiso.

³⁶MUKAMA naagamba ati: Nkooku nacweriire baisiinywe omusango omwirungu ery'ensi Misiri, nainywe nukwo ndigubacwera nti.

³⁷Ndibakwasa amaani, nukwo muhikirize endagaano yange.

³⁸Abeemi kandi enkozi z'ebibi, ninyija kubabaihamu. Ndibaiha omu nsi ezi barumu hati, baitu tindibaikiriza kugaruka omunsi ya Isirairi, obu nubwo mulimanya nkooku ndi MUKAMA.

³⁹“Kandi iwe enju ya Isirairi, MUKAMA Ruhanga naakugambira ati: Obu muraaba mutarukumpurra okuruga hati nookweyongera omumaiso, inywena mugende muheereze ebisisani byanyu, baitu mutaligaruka kwesitaza ibara lyange, n'ebisembo n'ebisisani byanyu.

⁴⁰“MUKAMA Ruhanga naagamba ati: “Oku, enju ya Isirairi yoona, nuho erimpeerereza omunsi; oku nuho ndibaikiririza, oku nuho ndisabira emigabo yanyu n'ebisembo byanyu ebirungi muno, hamu n'ebihongwa byanyu ebirukwera.

⁴¹Obu ndimara kubaiha omunsi nambere mukaba murarangiire nkabasorooza, obu nubwo ndiikiriza ebyonzira ebi mulyokya, kandi amahanga nuho galimanyira nkooku ndi muhikiriire.

⁴²Obu ndibaleeta omunsi ya Isirairi narahiire kuha baisiinywe, nubwo mulimanya nkooku ndi MUKAMA.

⁴³Oku nuho muliijukira engeso zanyu n'ebikorwa byanyu ebimwayesiisize; mulyenoba inywenka habw'ebibi ebi byona ebi mwakozire

⁴⁴MUKAMA naagamba ati: Wewe enju ya Isirairi, obu ndibakoraho habw'ekitiinisa ky'ibara lyange, ntarukurorra ha ngeso zanyu embi na ha bikorwa byanyu ebibi, nubwo mulimanya nkooku ndi MUKAMA.”

⁴⁵Kandi MUKAMA akangambira ati:

⁴⁶“Wewe mwana w'omuntu, naga eriiso orole ha bukiizi obw'obulyo, oyegese ekirigibaho, kandi orange ekirigwera ensi ey'ekibira enyakuli Negebbu;

⁴⁷ogambire ekibira kya Negebbu oti: ohurre MUKAMA eki arukugamba ninyija kukuhembamu omurro gucwekereze emiti yoona emibisi n'enyakwomere enyakukurumu; omurro ogu busaho ekirisobora kuguraaza, kandi gulisiiriiza abantu boona aba ha bukiizi obw'obulyo n'aba ha bw'obumoso.

⁴⁸Abantu boona balimanya nyowe MUKAMA nkooku nahembere omurro ogu, kandi busaho n'omu alisobora kuguraaza.”

⁴⁹Nubwo ndigamba nti: “Ai MUKAMA Ruhanga, abantu nibambazaaho ngu: ‘Ogu, tinuwe kicwanfumo?’”