Read Runyoro - rutooro Ezek 21 Bible Online

Ezek 21 - Runyoro - rutooro bible

Ezek 21

¹MUKAMA akangambira ati:

²“Wewe mwana w'omuntu, dora Yerusaalemu, teererra habiikaro ebirukwera; orange ebirigwera ensi ya Isirairi.

³Kandi ogigambire oti: MUKAMA naagamba ati: Ndi munyanzigwa wanyu. Ninyija kusomora empirima yange ngiihe omu kiraaro kyayo, mbaite inywena, abarungi n'ababi.

⁴Habwokuba ninyija kubaita inywena abarungi n'ababi, empirima yange nikyo erirugira omu kiraaro kyayo, ndwanise abantu boona, okuruga ha bukiizi obw'obulyo okuhika ha bwobumoso;

⁵nubwo balimanya nyowe MUKAMA nkooku nsomoire empirima yange omu kiraaro kyayo; tindigaruka kugyahura.

⁶Wewe mwana w'omuntu, sinda nk'anyakuhoire amasiko, sinda oina obujune, nambere abantu boona basobora kukurorra.

⁷Obu baraakukaguza bati: ‘Noosinzibwa ki?’ Obagarukemu oti: ‘Ninsindisibwa ebirukwija kubaho, obu biribaho, buli muntu alimarwaho obutiini, emikono ye eriteba; buli muntu weena amaju galiteba. MUKAMA Ruhanga naagamba ati: ebi nibiija, kandi biribaho kwo.’ ”

⁸MUKAMA akongera yangamba ati:

⁹“Wewe mwana w'omuntu, ranga noogamba oti: MUKAMA naagamba ati: Empirima eteekiirwe kandi ekunywirwe

¹⁰eteekiirwe nukwo ite, emunywirwe nukwo emyalikye nk'omurabyo! Okusemererwa tikuroho, habwokuba abantu bange bakagaya kyona eki baahabwirwe, n'ebifubiro byona.

¹¹Nukwo kwihayo empirima eyezibwe, nukwo ekole omulimo; eteekiirwe kandi eyeziibwe nukwo ekwasibwe omwisi;

¹²Wewe mwana w'omuntu, rra kandi teera empamo, habwokuba empirima enu ihiirweyo abantu bange, kandi ihiirweyo abeebembezi ba Isirairi boona nibaija kwitwa hamu n'abantu bange abandi. Weeteere ekibero.

¹³Nindenga abantu bange, kakuba bagaya okuhana kwange, ebi byona biribahikaho.

¹⁴“Habweki, wewe mwana w'omuntu, ranga kandi teera omu ngaro, onage empirima kabiri, kasatu, empirima ey'okwita abo ab'okwitwa; egi niyo empirima erukwija kwita abantu baingi, nukwo batiine muno, kandi abaingi bagwe ha malembo gaabo. Egi niyo empirima kaita, empirima katiinisa kandi katamba.

¹⁵Etiinisa abantu bange kandi ebatabaijura. Ninkanga orubuga rwabo n'empirima erukumyalikya nk'omurabyo kandi enyakweteekaniize kwita.

¹⁶Mpirima iwe enyakutoire tema ha bulyo na ha bumoso. Obwogi bwawe nambere burakatoma.

¹⁷Nanyowe ninyija kuteera omu ngaro, nyemale ekiniga, nyowe MUKAMA, eki ninyowe nkigambire.”

¹⁸Kandi MUKAMA akangambira ati:

¹⁹“Wewe mwana w'omuntu, okome emihanda ebiri, ogiteho emanyikirizo, niyo eraarabwamu omukama wa Bbabbulooni, akwasire empirima ye; emihanda egi yombi eruge omunsi enu, emihanda nambere erukutangatanganira, oteho ebyapa.

²⁰Ekyapa ekimu, ky'okwoleka omukama omuhanda ogurukutwara omu rubuga rw'Abamooni aba Rabba, ekindi nikyo kiraamwoleka omuhanda ogurukutwara Yudeya, omu rubuga orugumire Yerusaalemu.

²¹Habwokuba, omukama wa Bbabbulooni ayemeriire haihi n'ekyapa omu ntangatangano y'emihanda, nukwo aragule; naacikyacikya emyambi, naayekaguza ibaale terafimu, kandi naarora obune.

²²Omu mukono ogw'obulyo, akwasire omwambi ogunyakuroho akarorwaho ka Yerusaalemu. Nikamugambira ngu agende abyale ebyoma eby'amaani kasindika, ateere enduuru ngu obulemu bwacweka, ate ebyoma eby'amaani kasindika haihi n'amalembo, atuume entuumo, alime emikura.

²³Baitu baligamba ngu aragwire ebisuba; bakarahira endahiro ezitali z'okucwibwa; kandi hati MUKAMA naijukiza ebibi byabo nukwo bakwatwe.

²⁴“Nikyo MUKAMA Ruhanga arukugambira ati: Habwokuba muleeteriize omusango gwanyu, ogurukuzookwamu ebibi byanyu kwijukwa, habweki ebibi byanyu biraazookaga omu bikorwa byanyu byona-babwokuba mwijukirwe, mulibikwatirwamu.

²⁵MUKAMA naagamba ati: Iwe omulemi wa Isirairi omubi, anyakuhikiirwe ekiro kye, akasumi ak'okufubirwa kwawe kahikire,

²⁶oiheho ekitambaara, juura ekondo; ebintu tibirukwija kwikara nkooku biri; tumbura ogu anyakuli hansi, garra hansi ogu anyakuli haiguru.

²⁷Ndikambuura, ndirukambuura, orubuga oru ndirufoora kikambuuro, tiruligaruka kumanyirirwa ngu hali nuho rukaba ruli, okuhika ogu anyakurwinaho obusobozi obu aliija, ogu nuwe ndiruha.

²⁸“MUKAMA Ruhanga naagamba ha Abaamooni na ha kujunwa kwabu ati: Wewe mwana w'omuntu, garuka orange ogambe oti: Empirima, empirima isomoirwe ziite, zikunyurwe zimuliikane kandi zimyalikye nk'omurabyo.

²⁹Ebintu ebyorukurora by'ebisuba, kandi ebi orukuranga tibiri by'amazima. Muli babi kandi nimuleeta akabi, ekiro kyanyu kihikire, ekiro eky'ekifubiro eky'okumalirra empirima niija kubatemaho emitwe.

³⁰Ogigarre omu kiraaro kyayo, omu kiikaro eki wakangiirwemu, omunsi egi ei wazairwemu, nuho ndikucwerra omusango.

³¹Ndikwemarraho ekiniga; ndikubiihirirwa muno; kandi ndikulekera abantu abataina mbabazi, abasobora kuhwerekereza.

³²Oliba nku kahembamurro; esagama yawe eriseeswa omunsi y'owanyu; kandi toligaruka kwijukwa; habwokuba nyowe MUKAMA, eki ninyowe nkigambire.”