Read Runyoro - rutooro Ezek 22 Bible Online

Ezek 22 - Runyoro - rutooro bible

Ezek 22

¹Kandi MUKAMA akongera yangambira ati:

²“Wewe mwana w'omuntu, cwa omusango, gira ocwere omusango orubuga orunyakuseesa esagama nubwo orumanyise ebintu ebibi byona ebi rwakozire.

³Orugambire oti: MUKAMA Ruhanga naagamba ati: Rubuga iwe, orunyakuseesa esagama hagati yarwo; kandi orunyakwekorra ebisisani eby'okwesiisa, ngu akasumi kaarwo kahikire!

⁴Oina omusango ogw'esagama ei waseesire, kandi okeesiisa n'ebisisani ebi wakozire; ekiro kyawe okakiiriza haihi, akasumi ak'emyaka yawe akaatairweho kahikire nikyo nkufooliire kintu eky'okujumwa amahanga, kandi eky'okugaywa ensi yoona.

⁵Abantu abanyakukuli haihi n'abanyakukuli hara, nibaija kukusekeereza iwe omubi, kandi anyakurumu obwogo.

⁶“Abalemi ba Isirairi abanyakuli omuli iwe, omutima gwabo gwona gubali ha kuseesa esagama nkooku barukusobora.

⁷Baise-baana na banyina-baana abanyakuli omuli iwe nibagaywa; omunyaihanga naanyagwa na iwe oroleriire; enfuuzi n'enfaakati niikorwa kubi.

⁸Okagaya ebintu byange ebirukwera, n'ekiro kyange ekya Sabbato tokitamu kitiinisa.

⁹Omuli iwe munu, harumu abantu abarukuhangirra abandi nukwo babaise harumu abantu abanyakuliira hansozi; abanyakukora eby'orwanju obataireho eriiso

¹⁰Harumu abasaija abanyakusiihana na bakaiisebo; harumu abasaija abanyakuhambiriza abakazi abanyakuli omu kwezi

¹¹omuntu omu asiihana na muk'omutaahi ou aherraine nawe; ondi asiihana na mukamwana; ondi asiihana na munyanya, kizaarwa ise.

¹²MUKAMA Ruhanga naagamba ati: Omuli iwe harumu abantu abanyakulya enguzi nukwo baseese baite abantu; ogonza kandi oihaho abataahi ebintu ebingi n'amagoba noobanyaga ebyabo,

¹³nikyo ndukuhuniririrra habw'amagoba agatali g'amananu agawatungire, na habw'esagama eyaseesekere omuli iwe.

¹⁴Ha kiro eki ndikweteraho kutongana, oliguma, oliba n'amaani? Nyowe MUKAMA, eki ninyowe nkigambire, kandi ndikikora.

¹⁵Ndikutaabaaniza omu mahanga, ndikurarangya omunsi yoona, nukwo nkumalemu obubi bwawe obu;

¹⁶nubwo olimanya nkooku ndi MUKAMA.”

¹⁷Kandi MUKAMA akangambira ati:

¹⁸“Wewe mwana w'omuntu, enju ya Isirairi tingiinaho mugaso; nibasisana nk'ebyenga; ekibbati, ekyoma, isasi; ebinyakusigaraho, efeeza emazire kusengiijwa.

¹⁹Nikyo MUKAMA arukugambira ati: habwokuba inywena timwina mugaso, ninyija kubasorooza mbataahye omu rubuga Yerusaalemu.

²⁰Abantu nkooku basorooza efeeza, omulinga, ekyoma, isasi, n'ekibaati, bakabita omu kyooto kubijuguta bakyagye; na nyowe nukwo ndibasorooza nti, mbiihiirwe kandi nyina ekiniga, mbate omu kyoto mbaagye.

²¹Ndibasorooza mbajugute n'omurro ogw'ekiniga kyange, omu murro omu nuho mulyaagira.

²²Efeeza nkooku eyagira omu kyoto, na inywe nukwo muligwagiramu; kandi obu, mulimanya nyowe MUKAMA nkooku mbabiihiirirwe muno.”

²³MUKAMA akongera yangambira ati:

²⁴“Wewe mwana w'omuntu, gigambire oti: Oli ensi etalisemezibwa kandi etaligwerwa njura ha kiro eky'ekiniga.

²⁵Abalemi b'ensi egi abanyakugirumu, nibasisana nk'entale erukuboboita neetaagura enyamaiswa ey'isire; na bo nukwo bataagura obwomeezi bw'abantu bati; nukwo baanyagire bati ituungo n'ebintu eby'omuhendo, nukwo baakanyisize bati enfaakati omunsi egi.

²⁶Baanyakatagara baayo bakacwa ebiragiro byange, ebintu byange ebirukwera tibaabitamu kitiinisa; bataahurane ebintu ebirukwera n'ebitarukwera, kandi batabaganize ebirukuzirwa n'ebitarukuzirwa, ekiro kyange ekya Sabbato batakitemu kitiinisa, ekyaarugiremu, abantu nukwo kutantamu kitiinisa.

²⁷Abalemi baayo abanyakugirumu, nibasisana emyaaga erukutaagura enyamaiswa ey'isire, erukwita abantu, erukuhwerekereza, nukwo etunge amagoba agatali g'obwinganiza.

²⁸Abarangi baayo ebintu ebi ebibi bakabiswekerra, nibabaza eby'obudoma kandi nibaranga ebitali by'amazima; nibagamba ngu: ‘MUKAMA Ruhanga ebi nuwe abigambire’, kandi kunu MUKAMA tabigambire.

²⁹Abantu ab'ensi egi, bakeeha okunyaga n'okwiba; bakeetaho abanaku n'abaseege, bakanyaga abanyamahanga hataroho bulyo.

³⁰Nkaserra omuli bo omuntu ow'okwimukya ekisiika n'okwigara ekihuru ekikaba kindi omumaiso, nukwo arwanirre ensi agitange kuhwerekerra; baitu ntamubone.

³¹Nukwo kubabiihirirwa muno; nkabahwerekereza n'omurro ogw'ekiniga kyange; MUKAMA Ruhanga naagamba ati: Ndibasasura mbaingananganize nk'ebi baakozire.”