Read Runyoro - rutooro Ezek 23 Bible Online

Ezek 23 - Runyoro - rutooro bible

Ezek 23

²“Wewe mwana w'omuntu, ira hakaba haroho abakazi babiri, abaazairwe nyinabo omu;

³Obu bakaba bakyali bato omunsi Misiri, baayeha obwamalaaya. Oku nuho amabeere gaabo gaamigiirwe, amabeere gaabo batakamanyire musaija nuho gaatugatugiirwe.

⁴Omu hali-bo omukuru, ibara lye nuwe akaba ali Ohola, kandi muto we nuwe Oholiba, nkabaswera bombi, nabazaaraho abaana aboojo n'abaisiki. Amabara gaabo: Ohola, niyo ensi Samaliya, kandi Oholiba niyo Yerusaalemu.

⁵“Ohola noobwakubaire akaba ali mukazi wange, atacwe obwamalaaya, omutima gwamwikaraga ha nganjani ze Abasiriya,

⁶abaserikale ab'amahe abaajwaraga engoye eza kahuukya, abalemi abakuru n'engabwa ez'amahe, abo boona abasaija abakaba nibaligirwa kandi abato, abatembi b'embaraasi.

⁷Abo boona akanjuka na bo, abasaija boona abakaba basemiire muno okukira boona omunsi Asiriya; kandi akeesiisa naaramya ebisisani ebya boona abakaba bamuliiremu omutima.

⁸Atafuuhye rwanju rwe oruyayehaire akiri omunsi Misiri; habwokuba obwakaba akiri mwisiki muto, abasaija nubwo baabyamire nawe, baamukwatakwata amabeere atakamanyire musaija, baamumalizaaho orwanju rwabo rwona.

⁹Na nyowe nukwo kumulekera enganjani ze Abasiriya aba yagonzaaga muno ati.

¹⁰Baamujuura, baakwata batabani be na bahara be; baamwisa empirima; kandi obu yamazire kucwerwa omusango, abakazi baatandika kumucwamu orufumo.

¹¹“Mugenzi we Oholiba noobu yaboine eki, akasiisikara okukira mukuru we, omu kugonza muno abasaija n'omu kwanjuka, akakira owanyina.

¹²Abasiriya, abalemi abakuru, engabwa ez'amahe, abaamahe abaajwaraga ebyokujwara eby'obulemu n'abatembi b'embaraasi abaagenderaga ha mbaraasi abasaija boona abaaligirwaga kandi abato, nubo baamutwaire omutima.

¹³Nkarora nawe nkooku asiisikaire, bombi bakaba baina engeso emu.

¹⁴Baitu omukuru akahinguraniza orwanju; akarora ebisisani by'abasaija bitiirwe ha kisiika, ebisisani eby'Abakalideeya ebikaba bitiirwe n'erangi erukunanata,

¹⁵biteegerwe enkoba omu makendu, biina ebitambaara ha mitwe, byona nibizooka nk'abanyoro, ekisisani eky'Ababbabbulooni, enzaarwa z'ensi eya Kalidaaya.

¹⁶Akarumisa kubirora ati, byamutwara omutima, yabitumaho abakwenda omunsi Kalidaaya

¹⁷Ababbabbulooni bakamuhikaho, baamusanga omu kitabu kye eky'orwanju, baamusiisa n'orwanju rwaabu; obu baamazire kumusiisa, yayahukana nabo abatamiirwe kimu.

¹⁸Obu yayongiire ati orwanju rwe burole, yataho n'okwejuura namutamwa nkooku natamirwe owanyina.

¹⁹Baitu akeeyongera orwanju okukira ira, yayanjuka nkooku yayanjukaga ali mwisiki, obwakaba naakora obwamalaaya omunsi Misiri:

²⁰nambere yagondiize abaaija abakaba baina orugingo orurukusisana nk'orw'enkaina, kandi nibaahugwa nk'ag'embaraasi.

²¹Oholiba, obwakaba oli mwisiki muto, Abanyamisiri obu baakukwatakwataga ekifuba, obu baakumigamigaga amabeere nukwo wagonzaaga muno orwanju oti.”

²²Oholiba, MUKAMA Ruhanga nikyo arukugambira ati: Ninyija kwimukya enganzi zawe, aba walekere omazire kubatamwa, ndibaiha buli hantu baije bakuseesire.

²³Abaabbabbuloni, Abakalideeya, Pekodi, Sowa na Kowa, baije hamu n'Abasiriya boona, abasaija abaligirwa kandi abato, abalemi abakuru n'engabwa zaabo, abanyoro n'abaserikale ab'amahe batembere embaraasi.

²⁴Nibaija kuruga ha bukiizi-bw'emoso bakuseesire baina ebigaali, bazinisize ihe ery'amahanga, balikugota bakwasire obugabu n'engabu n'enkofiira ez'ebyoma, kandi ndibaha obusobozi obw'okucwa emisango, bakucwere omusango nibagendera ha biragiro byabo.

²⁵Habwokuba ndiba nkubiihiriirwe, nabo ndibaleka bakukorre eby'ekiniga. Balikusara enyindo bakucwe n'amatu, abawe abaliba basigaireho, baliitwa empirima. Balikwata batabani bawe na bahara bawe, kandi abawe abaliba basigaireho balisiiriizibwa omurro.

²⁶Kandi balikujuura ebyokujwara byawe, batwale n'amabaale gawe ag'omuhendo amarungi mali.

²⁷Nukwo ndimaraho nti orwanju rwawe n'ikuuhya lyawe ebi warugire na byo omunsi Misiri; nubwo otaligaruka kwimukya amaiso okarora Abanyamisiri, rundi kugaruka kubaijuka.

²⁸Habwokuba MUKAMA Ruhanga naagamba ati: Ndikulekera abo aba wanobere, ndikulekera abo abawarugireho omazire kubatamwa.

²⁹Balikukorra eby'enobi, bakwiheho n'ebintu byona ebi wayekoliire, bakuleke oli busa otaina kantu, obusiihani bwawe nukwo bulyolekwa buti. Orwanju rwawe n'obusiihani bwawe,

³⁰nibyo bikuleetiire eki, habwokuba okasiihana n'amahanga n'abantu ab'amahanga wayesiisa nooramya ebisisani byabo.

³¹Habwokuba okakora nk'owanyoko oku yakozire, ninyija kukufubira nkooku namufubiire

³²MUKAMA Ruhanga naagamba ati: “Noija kunywa ha kikopo ky'owanyoko, ekikooto kandi ekimatukire. Oraikaraga noosekwa kandi noogaywa, habwokuba ekikopo eki kirumu bingi;

³³kirikutamiiza muno kandi kikuleetere obujune. Ekikopo ekinyakurumu ebintu ebirukutiinisa kandi eby'okusiisa, nikyo ekikopo eky'owanyoko Samaliya;

³⁴eki, nikyo olikubisa okyeraramire; hanyuma nukwo oyemenye isoke, oyetaagataagule amabeere: habwokuba MUKAMA Ruhanga naagamba ati: Eki ninyowe nkigambire.

³⁵Nikyo MUKAMA Ruhanga arukugambira ati: Nkooku wanyeberwe wannaga enyuma, hati k'orole orwanju n'obusiihani bwawe ebi byakuleetiire.”

³⁶MUKAMA akangambira ati: “Wewe mwana w'omuntu, gira ocwere Ohola n'Oholiba omusango. Hanyuma obajunaane ebikorwa byabo ebibi ebi baakozire.

³⁷Habwokuba bakeeha obusiihani n'obwisi-bakasiihana n'ebisisani; kandi baabitambira n'okubitambira abaana b'obwojo aba bakaba banzaaliire bibalye.

³⁸Bakongera bankora na kinu: Ha kiro eki kyonyini, bakongera baasiisa ekiikaro kyange ekirukwera kandi basiisa n'ekiro kyange ekya Sabbato.

³⁹Habwokuba obu baisire abaana baabo baabatambira ebisisani byabo, ha kiro eki kyonyini bakataaha omu kiikaro kyange ekirukwera baakisiisa. Murole, amahano aga baakozire enju yange.

⁴⁰Kandi bakatumaho abasaija baruge omunsi eza hara, baabatumira omukwenda, abasaija abo baija. Obu wahuliire nkooku baizire wayoga, wayesiiga, wayekunisa n'ebintu ebirungi;

⁴¹waikarra ha ntebe enungi ey'ekitiinisa omumaiso gaayo nambere hakaba hatairweho emeeza ei wataireho obubaani n'amagita gange.

⁴²Yahurra iraka ery'abantu abaingi, kandi omu bantu abo aba buli mulingo, hakaiziramu abatamiizi abaarugire omwirungu: baajweka abakazi enyerre ha mikono, baabajweka n'ekondo enungi ha mitwe.

⁴³“Hanyuma nubwo nagambire nti: Abasaija obu bakora nawe obwamalaaya, obu baba batarukusiihana?

⁴⁴Habwokuba baagenderaga omukazi ogu, abasaija nkooku bagendera malaaya, nukwo baagenderaga bati Ohola n'Oholiba kubanjukiraho.

⁴⁵Baitu abantu abarungi balibacwera omusango nk'ogunyakucwerwa abakazi ensiihani kandi abaisi b'abantu.”

⁴⁶Habwokuba MUKAMA Ruhanga naagamba ati: Abakazi abo, obazinisize ihe ery'okubarwanisa, kandi obafoole kintu ekirukutiinisa kandi eky'okunyagwa.

⁴⁷Ihe eri libateere amabaale kandi babatemateme n'ebitara; baite batabani baabo na bahara baabo, bookye amaju gaabo goona.

⁴⁸Nukwo ndifuuhya nti omunsi obusiihani, abakazi boona nukwo bahabuke, baleke kusiihana nkooku mwasiihaine.

⁴⁹Inywe abaisiki nyineemu ababiri, ndibafubira habw'obusiihani bwanyu, na habw'ekibi kyanyu eky'okuramya ebisisani; nubwo mulimanya nkooku ndi MUKAMA Ruhanga.