Read Runyoro - rutooro Ezek 25 Bible Online

Ezek 25 - Runyoro - rutooro bible

Ezek 25

¹MUKAMA akangambira ati:

²“Wewe mwana w'omuntu, gumya amaiso gawe hali Abamooni, orange ebiribahikaho.

³Obagambire oti: Muhurre MUKAMA Ruhanga nkooku arukugamba MUKAMA Ruhanga naagamba ati: ‘Ekiikaro kyange ekirukwera obu kyasiisirwe ensi ya Isirairi obuyafoirwe kitongo, kandi enju ya Yuda obu yazaahisiibwe’,

⁴habwokuba okagamba oti: Otyo nikyo ndaakulekerra abantu aba Burugaizooba bakutunge, balikuteeramu enkande bakwikalemu; nubo balirya ebijuma byawe, banywe n'amata gawe.

⁵Orubuga Rrabba, ndirufoora iriisizo ly'engamiya, kandi embuga z'Abamooni, ndizifoora isaazi ly'amagana obu nubwo mulimanya nkooku ndi MUKAMA.

⁶Habwokuba MUKAMA Ruhanga naagamba ati: Nkooku watiire omu ngaro, wateera emirindi, wasemererwa muno, oina itima erirukwingana aho hali ensi ya Isirairi,

⁷ninyija kukulekera amahanga agandi gakwibe kandi gakunyage, ninyija kukuhwerekerereza kimu, nukwo oleke kugaruka kwetwa ihanga, rundi kugaruka kwetungira ensi; obu nubwo olimanya nkooku ndi MUKAMA.

⁸“MUKAMA Ruhanga naagamba ati: Habwokuba Mowabbu akagamba ati: Enju ya Yuda neesisana amahanga agandi,

⁹embuga ezinyakukingura omutaano gwa Mowabbu, otairemu n'ezirukukirra kimu oburungi, nka Besi-yesimoosi, Baali-meyoni na Kiryasaimu ninyija kuzireka baiseesire.

¹⁰Ensi egi, hamu n'Abamooni, ninyija kugiha abantu aba Burugaizooba bagyetungire, ereke kugaruka kwijukwa omu mahanga,

¹¹Mowabbu nukwo ndigifubira nti, abantu bamanye nkooku ndi MUKAMA.

¹²“MUKAMA naagamba ati: Edomu nkooku yahoire enju ya Yuda enzigu, kandi yacwa omusango omukooto omu kukora ekintu eki.

¹³Hati nu, na nyowe, ninyija kufubira Mowabbu, nyite abantu n'ebisoro ebinyakugirumu. Ndigifoora ihamba okuruga ha rubuga Temani, okugarukira Dedani, kandi abantu baayo baligwa omu bulemu.

¹⁴Okuhoora Edomu enzigu, ndyekoonyeza abantu bange Abaisirairi, nubo balikoraho Edomu, nibaroorra ha kubiihirwa na ha kiniga kyange. Abantu nubwo balimanya ngu: Oku nukwo kuhoora enzigu kwange.

¹⁵“Abafirisiti nkooku baakozire nibagenderra kuhoora enzigu kandi baagihoorakwo, baina omutima ogw'itima, ogw'okuhwerekereza, ogw'obunyanzigwa obutali bw'okucwekera,

¹⁶nikyo MUKAMA Ruhanga arukugambira ati: Ninyija kuseesira Abafirisiti mbamaleho. Ninyija kuhwerekereza boona abaliba basigaire omu kyeya kyabo.

¹⁷Kandi ndihoora enzigu naamaani hali bo nokuhana kwekiniga; kandi balimanya ngu ninyowe MUKAMA.”