Read Runyoro - rutooro Ezek 26 Bible Online

Ezek 26 - Runyoro - rutooro bible

Ezek 26

¹Ha kiro eky'okubanza eky'okwezi okw'omwaka ogwa ikumi na gumu ogw'okuzaahisibwa kwaitu, MUKAMA akangambira ati:

²“Wewe mwana w'omuntu, Taya nkooku yagambire hali Yerusaalemu eti: ‘Otyo, kyakurugaha irembo ly'amahanga lihenzirwe, likinguliirwe nyowe; ninyija kwongerwaho bingi, habwokuba efoirwe kitongo,’

³nikyo MUKAMA arukugambira ati: Iwe Taya, hati omanye nkooku ndi munyanzigwa wawe, ninyija kwohereza amahanga maingi gakuseesire, nk'enyanja oku ereeta ebigonzi byayo.

⁴Galissesa ebisiika bya Taya gacwacwane eminaara yarwo; nukwo nduharagateho itaka lyarwo, ndufoole mwandara ogutaroho kantu.

⁵Ruliikara hagati y'enyanja, rube kiikaro eky'okwanikahoga obutimba, habwokuba MUKAMA Ruhanga naagamba ati: eki, nyowe MUKAMA, ninyowe nkigambire, rulinyagwa amahanga;

⁶kandi bahara baarwo aba ha mukungu baliitwa empirima. Abantu nubwo balimanya nkooku ndi MUKAMA.

⁷“Habwokuba MUKAMA Ruhanga naagamba ati: Orubuga Taya, ninyija kuruleetera Nebbukadaneeza omukama wa Bbabbulooni, omukama anyakukirra kimu boona, mwihe ha bukiizi obw'emoso, aije n'embaraasi n'ebigaali, abatembi b'embaraasi n'ihe ry'abaserikale baingi.

⁸Abantu bawe aba ha mukungu alibaisa empirima; alyombeka ekisiika eky'okukugota akikwehingulirize, alituuma entuumo y'itaka agikwehingulirize, kandi alikurwanisa akwasire engabu, naayema omu rusu.

⁹Aliseesa ebisiika byawe n'empinju kaseesa bisiika, kandi alihendahenda eminaara yawe nendyamiti.

¹⁰Embaraasi ze, ziriba nyingi muno, ecuucu ei zirukwimukya, erikusweka; obu aliba naataaha amalembo gawe, nk'omuntu oku aba naataaha orubuga orunyakuhagwirwe etoko ey'abatembi b'embaraasi, ey'ebigaali n'ebigaali, eritengeesa ebisiika byawe.

¹¹Enguudo zawe alizirubarubatirra n'enkangaasi z'embaraasi ze, abantu bawe alibaisa empirima; kandi enyomyo zawe enkooto, aliziteera hansi.

¹²Balinyaga itungo lyawe, balyaaya ebintu byawe eby'obusuubuzi; baliseesa ebisiika byawe, bacwekereze amaju gawe amarungi; amabaale gawe, embaaho zawe nitaka lyawe lyonyini, balibiseesa omu maizi.

¹³Ndiculeereza kimu ebizina byawe byona, kandi endongo zawe tizirigaruka kuhulirwa.

¹⁴Ndikufoora mwandara-musa ogutaroho kantu; oliba kiikaro eky'okwanikwahoga obutimba; tolyongera kwombekwa buhyaka; habwokuba MUKAMA naagamba ati, nyowe MUKAMA eki ninyowe nkigambire.

¹⁵MUKAMA naagambira Taya ati: Abantu obu balihurra okugwa kwawe, bakahurra abantu bawe emputa abarukusinda, ebintu ebihwerekeriire omu bisiika byawe, ebizinga tibiritengeeta?

¹⁶Omu kasumi ako, abalemi boona ab'enyanja, baliruga ha bitebe byabo eby'obukama basirimuke beyiheho busuuti zaabo, beejuule ebyokujwara byabo ebihunzirwe; balikwatwa akatukumo; baliikarra hansi, baikale nibakankana, nibahunirra muno habw'ebikubaireho.

¹⁷Balikuteeramu ekyoboobo nibagamba bati: Mawe iwe orubuga nyamurangaanwa, orukaba ruli rw'obusobozi ha nyanja, iwe hamu n'abantu bawe, abaatiinisaaga ensi yoona, k'ohoireho waruga omu mayanja goona!

¹⁸Ha kiro eky'okugwa kwawe, ebinyakuli omu nyanja birikankana, habw'okuhwerekerra kwawe, biricwekwa enkizi.

¹⁹Obu ndikufoora ihamba nk'embuga zoona ezita ikarwamu bantu, obu ndikuleetaho enziha y'enyanja, amaizi gakakumira,

²⁰obu, ndikunaga hansi ogende n'abo abanyakusirimuka, hansi omu bantu aba ira; ndikwikaza nyabuyonga omu okuzimu nukwo kugaruka kwikarwaamu, rundi kutunga ekiikaro omunsi ey'aboomeezi.

²¹Ndikufoora kintu eky'okutiinwa; tolyoomeera. MUKAMA Ruhanga naagamba ati: Abantu noobu balikuserra bata, tibaligaruka kukubona obundi.”