Read Runyoro - rutooro Ezek 27 Bible Online

Ezek 27 - Runyoro - rutooro bible

Ezek 27

¹MUKAMA akangambira ati:

²“Wewe mwana w'omuntu, oterre Taya empamo,

³kandi ogigambire oti: MUKAMA Ruhanga naagambira abantu abanyakuli ha ntaaho y'enyanja, abarukusuuburrana n'amahanga aga ha bizinga ebingi ati: Wewe Taya, okagamba oti: ‘Ninyowe omurungi ataina kamogo’

⁴Emitaano yawe eri omunyanja hagati; abaakwombekere, bakakwombeka kurungi muno.

⁵Embaaho zoona ezibaakwombekeseze bakaisara omu miti emisambya eya Sairi omukogoto ogwa Lebbanooni, nugwo baakukoliiremu omurongooti.

⁶Omu mihomozi eya Basini bakakukorramu engahi, embaaho ezikwaliriire, ezitabwirwemu amasanga bakazikora omu miti eya ha misa ya Kupuro.

⁷Ebendera yawe, eyekaba eri karorwaho kawe ekakorwa omu kitaani enungi enyakuhunzirwe eyarugire omu nsi Misiri; engoye zawe ez'amadirisa, ezaarugire ha misa y'Erisa, ekaba eri ya bburu na kahuukya.

⁸Abantu abasi ba Sidoni n'Aruraada, nubo baakugoyaga omu maato; abasaija ab'amagezi aba Zeemeri, nubo bakwikaramuga, kandi nubo bakaba bali barungiki b'emeeri zawe.

⁹Abakuru aba Gebbali n'abantu baayo ab'amagezi baakwikaramuga, nibaigarra enyatika zawe; emeeri zoona ez'omu nyanja hamu n'abalimba baazo, baakwikaramuga, nimugurrana ebintu, noobaha ebyawe, nabo nibakuha ebyabo.

¹⁰Abantu aba Paasa, Luudi na Puuti, bakaba bali omu ihe ryawe, bali baserikale bawe baakuhanikahoga engabu n'enkofiira, baakutamuga ekitiinisa.

¹¹Abaserikale ab'Aravaadi, nubo baalindaga ebisiika byawe, kandi aba Gamedi, baalindaga eminaara yawe; engabu zaabo, baazihanikaga ha bisiika byawe okubyehinguliriza, nubo baakusemeriize kimu.

¹²“Tarasiisi, yasuuburranaga na iwe, habw'obuguuda bwaawe obutagambwa kandi obwa buli mulingo; efeeza, ekyoma ibaati, n'isasi, nibyo baakuhaga, na iwe obaha ebintu ebyawe ebindi.

¹³Yavani, Tubbali na Meseki, nabo baasuuburranaga na iwe; bbo, baaleetaga abantu, n'ebintu eby'omulinga, nukwo obahe ebintu ebyawe.

¹⁴Besitogarama, yo yaleetaga embaraasi, embaraasi ez'obulemu, n'enyumbu.

¹⁵Abasaija Rodesi nabo mwasuuburranaga; ebizinga bingi bikaba biri butale bwawe obumanyirwe; baakuleeteraga amasanga g'enjojo n'emifunjo.

¹⁶Edomu nayo, yasuuburranaga na iwe, habwokuba n'ebintu ebingi ebirukwingana aho, abo baakuleeteraga amabaale ag'omuhendo emerarudo, engoye eza kahuukya ezihunzirwe kitaani enungi, amabaale ag'omuhendo karoli n'agate.

¹⁷Yuda n'ensi eya Isirairi, nazo zaasuuburranaga na iwe; ab'ensi ezi, baakuleeteraga engano, emizaituuni, emitini ekiri nto obwoki bw'enjoki, amagita ag'okulya, nag'okwihamu omubazi.

¹⁸Damasiko nayo, ekasuuburrana na iwe, habw'ebintu byawe ebingi biti, habw'itungo lyawe eritagambwa, erya buli mulingo; eviini eya Heribboni, ebyoya by'entaama ebirukwera,

¹⁹n'eviini eyarugaga Uzali, ebi nibyo baa leetaga nukwo batwara ebintu byawe; ekyoma ekirukuguma muno, kasiya na karamo, nibyo baaleetaga nukwo batwara ebintu byawe eby'obusuubuzi.

²⁰Dedani, nayo ekasuuburrana na iwe, neereeta engoye ez'okuta ha ntebe, ezinyakwikalirwaho abatembi b'embaraasi.

²¹Arabbiya n'abalemi boona aba Kedara, bakaba bali basuubuzi bawe ab'ekitiinisa, abaaleetaga: ebyana by'entaama, entaama empaya n'embuzi; ebi nibyo baagurranaga na iwe.

²²Abasuubuzi aba Sebba na Raama, nabo baasuuburranaga na iwe, abo baaleetaga ebintu ebirukirra kimu kuboya kurungi ebya buli mulingo, amabaale goona ag'omuhendo na zaabbu, nukwo batwara ebintu byawe.

²³Harani, Kane, Asihura, na Kirumaadi, ensi ezi zoona baasuuburranaga na iwe.

²⁴Abo baasuuburranaga na iwe, nibaleeta ebyokujwara ebirungi muno, engoye eza bbururu kandi ez'amabara agacwerraine, n'ebirago ebinyakurukirwe omu bintu ebinyakuhindwirwe n'erangi, biboherwe n'emiguha bya aguma; ebi nibyo baasuuburranaga na iwe.

²⁵Emeeri eza Tarasiisi, zaayambukaga amayanja ziija kusuubura ebintu byawe, nukwo waikaire oti omu mayanja hagati, watunga watungurra, waba w'ekitiinisa.

²⁶Abalimba bawe, bakuhikize omu nziha. Omuyaga ogwa ha bukiizi bw'obumoso, nuho gukucwacwaniire. Ha Kiro eki olihwerekererraho,

²⁷itungo lyawe, ebintu byawe, ebintu byawe ebi wasuuburaga, abalimba bawe n'abarungika b'emeeri zawe, abaigarraga ebihuru, abaaguraga ebintu byawe eby'obusuubuzi, abaserikale bawe boona, abakwikaramu, hamu n'abantu bawe abo ab'oikara nabo, ebi byona biriborogota omu nyanja.

²⁸Abantu obu balihurra abarungiki bawe nibateera omuranga, ensi eritengeeta,

²⁹boona abaliba nibarungika emeeri, balizirugamu. Abalimba n'abarungiki boona, balyemerra ha musa gw'enyanja,

³⁰balikuterra omuranga, kandi balitaabaana, Balyeseesa ecuucu omu mitwe, beekulingule omu iju;

³¹balikwemwera isoke balijwara ebitengo balikulirirra nibasaalirwa muno omwoyo nigubasarra kandi nibateera empamo.

³²Balicwererra ekizina eky'okuziika, balikuterra empamo nibagamba bati: ‘N'oha arahwerekereziibwe omu nyanja hagati nka Taya?

³³Ebintu byawe eby'obusuubuzi obu byarugaga omu mahanga bikaija, amahanga goona wagahaga ebi garukwetaaga, okatungisa abakama ab'ensi, n'itungo lyawe eritagambwa, n'ebintu byawe eby'obusuubuzi ebingi ebirukwingana aho.

³⁴Hati, niiwe ocwacwaniirwe omu nyanja, omu nziha; ebintu byawe eby'obusuubuzi n'abantu bawe boona abakora ha meeri yawe, badikiire hamu na iwe.

³⁵Abantu boona abanyakwikara omu bizinga, obu barukurora ekinyakukuhikireho, nibahuniirra; kandi bakama baabo obutiini bw'okubaita, nibubazooka na ha maiso.

³⁶Abasuubuzi abakuru ab'amahanga, tibarukwenda n'okukurora; ofiire kubi, kandi toligaruka kubaho ebiro byona.’ ”