Read Runyoro - rutooro Ezek 28 Bible Online

Ezek 28 - Runyoro - rutooro bible

Ezek 28

¹MUKAMA akangambira ati:

²“Wewe mwana w'omuntu, gambira omulemi wa Taya oti, MUKAMA Ruhanga naagamba ati: Habw'okwekuza kwawe okuhinguraine, okagamba oti: Ninyowe ruhanga anyakusinga ha kitebe kya baaruhanga, hagati y'enyanja; nangwa, oli muntu toli Ruhanga, noobu oraaba nooyerora oli w'amagezi nka Ruhanga

³mazimakwo, oli w'amagezi okukira Daneeri tiharoho kintu ky'ensita ekinyakukuserekwa

⁴amagezi n'obwetegereza bwawe, nibyo byakutungisize, wayesorooleza ezaabbu n'efeeza, wabita omu maahurro gawe;

⁵habw'amagezi gawe amaingi omu by'obusuubuzi, okeeyongera itungo, omutima gwawe, gwahwera ha itungo eri

⁶nikyo MUKAMA Ruhanga arukubagambira ati: habwokuba okeeyeta w'amagezi nka Ruhanga,

⁷ninyija kukuleetera abanyamahanga, ihanga erirukukirra kimu amahanga goona obubi; basomole ebitara, bahwerekereze ebintu byona ebirungi ebi watungisize amagezi n'obwetegereza, basiise ekitiinisa kyawe.

⁸Balikunaga omu kiina, ofe nka boona abaitirwa omu nyanja okubafa.

⁹Obwoliba oyemeriire omumaiso g'abo ab'okukwita, abo ab'okukucumita bamazire kukwita, nabwo oligamba oti: ndi ruhanga, kandi kunu oli muntu, toli ruhanga?

¹⁰MUKAMA Ruhanga maagamba ati; oliitwa abanyamahanga, ofe nk'abatasazirwe oku bafa.”

¹¹MUKAMA akongera yangambira ati:

¹²“Wewe mwana w'omuntu, oterre omukama wa Taya empamo, kandi omugambire oti: MUKAMA Ruhanga nagaamba ati: ‘Niwe okaba oli kyokurorraho ky'oburungi oijwire amagezi kandi otarukugambwa oburungi.

¹³Waikaraga Edeni, omu musiri gwa Ruhanga; amabaale goona ag'omuhendo, nugo gaabaga kyesweko kyawe Sarudu, Topazi, Arimaasi, Berulo, Sohamu, Yasipi, Safiro, Samuragido, Kabunkulo, n'Emeraludo, ebintu byawe ebyakwatirwahoga amabaale ag'omuhendo n'ebyasarurwaga, bikaba biri bya zaabbu. Ha kiro eki wahangiirweho, nubwo byateekaniziibwe

¹⁴nkakuha malaika omukerubbi ayaseesirweho amagita: waikaraga ha rusozi rwange orurukwera orwa Ruhanga; warubatiraga hagati y'amabaale ag'omurro.

¹⁵Okuruga ha kiro eki wahangiirweho, okuhika obu watandikire kusiisa engeso zawe, zikaba ziri nungi nkaki.

¹⁶Ebintu byawe eby'obusuubuzi ebingi biti, nibyo byakuleetiire itima, nukwo kutandika kusiisa; na nyowe, nukwo kukwiha ha rusozi rwa Ruhanga, omazire kusiisikara kandi omukerubbi omulinzi nukwo kukubinga, hagati y'amabaale ag'omurro.

¹⁷Obunyamibwa bwawe, bukakuleetera okwehurra; ekitiinisa kyawe, kyakwohereza kusiisa amagezi gawe. Na nyowe, nukwo kukuteera hansi, nakusuukurra abakama bakurole.

¹⁸Habw'ebibi byawe ebingi muno ebi wakozire, nahabw'obucwangya bwawe omu mulimo gwawe ogw'okuguza ebintu, ebiikaro byawe ebirukwera okabigayisa; na nyowe nukwo kwimukya omurro hagati yawe gukusiiriize gwakusiiriiza, nakufoora iju omunsi, omumaiso g'abo boona abaakuroraga.

¹⁹Abantu boona ab'amahanga abakumanyire, obu barukukurora, nibatangaara; ofiire kubi, kandi toligaruka kubaho ebiro n'ebiro.’”

²⁰Kandi MUKAMA akangambira ati:

²¹Imukya amaiso gawe orole Sidoni, kandi orange ebirigihikaho,

²²ogigambire oti: MUKAMA naagamba ati: “Wewe, Sidoni, ndi munyanzigwa wawe, kandi ekitiinisa kyange, ninyija kukyolekera omuliiwe hagati. Obu ndigicweramu emisango, kandi nkagyolekeramu obuhikiriire bwange obu nubwo abantu balimanya nkooku ndi MUKAMA.

²³Habwokuba, ndiginagamu kagingo, esagama eseeseke omu nguudo zaayo. Kandi enju ya Isirairi, hali abataahi baabo boona abakaba nibabakora kubi, nibabooleka emigayo, tihaligaruka kubaho n'omu arukubacumita nk'amakerre, rundi arukubateera nk'amahwa.

²⁴MUKAMA akagamba ati: Tihalibaho ihanga nalimu ha mahanga aganyakwehinguliriize, agaakoraga kubi Isirairi nigamwoleka emigayo, agaligaruka kuba nk'amahwa, rundi nk'amakerre ag'okuteera Isirairi.

²⁵MUKAMA Ruhanga akagamba ati: Obu ndisorooza enju ya Isirairi, nkagiiha omu mahanga aga baararangiiremu nkaboolekeramu nkooku ndi muhikiriire amahanga nigarora, obu nubwo baliikara omunsi yabo yonyini, ei nahaire omwiru wange Yakobbo.

²⁶Baligiikaramu bagwagwane balyombeka amaju, babyale emisiri y'emizabbibbu. Obu ndicwera omusango bataahi baabo boona abaamwolekaga emigayo, nubwo baligwagwana, bamanye nkooku ndi MUKAMA Ruhanga wabo.”