Read Runyoro - rutooro Ezek 29 Bible Online

Ezek 29 - Runyoro - rutooro bible

Ezek 29

¹Ha kiro ekya ikumi na bibiri eky'okwezi okwa ikumi okw'omwaka ogwa ikumi ogw'okuzaahisibwa kwaitu, MUKAMA akangambira ati:

²“Wewe mwana w'omuntu, oimukye amaiso gawe, orole Faraaho omukama wa Misiri, orange ebirimuhikaho, kandi ebirihikaho Misiri yoona;

³omugambire oti: MUKAMA Ruhanga naagamba ati: “Iwe Faraaho omukama wa Misiri, ndi munyanzigwa wawe, ekijoka ekikooto ekinyakwikara nikyegaranjura omu byambu byaakyo, ekinyakugamba kiti: ‘Ekisaaru Nairo eki kyange ninyowe nakihangire.’

⁴Ninyija kukusimba amarobo omu nsaya, encu ez'omu byambu byawe, nzikwasize ha bigaragamba byawe, nukwo nkucunde hagati y'ebyambu byawe, hamu n'encu zoona ez'ebyambu ebi, zikwatiire ha bigaragamba byawe.

⁵Nkuhungule omwirungu hara, iwe n'encu zoona ez'omu byambu byawe; oligwa omu bwerre peregecu, kandi aho, toliihwaho okaziikwa, nkakuha enyamaiswa ez'omunsi ikulye, amanyonyi ag'omu mwanya gakusome.

⁶“Obu abasi boona aba Misiri, nubwo balimanya nkooku ndi MUKAMA. MUKAMA akagamba ati: Abaisirairi bakeesiga inywe Abanyamisiri ngu mulibasagika baitu mukasisana nk'omwigo ogutaina maani ogw'orubingo.

⁷Obu baakukwatahoga, obacwekera omu ngaro, ozihutaaliza kimu zoona; kandi obu baakwigamiire nabwo wacweka, baasigara bataina bugumizo.

⁸Nikyo MUKAMA Ruhanga arukugambira ati: Ninyija kwimukiriza abantu bakuseesire bakwasire ebitara, baite abantu n'ebisoro byawe.

⁹Ensi Misiri erifooka kitongo kandi ihamba, nubwo balimanya nkooku ndi MUKAMA. “Habwokuba okagamba oti: ‘Ekisaaru Kiira eki, kyange, ninyowe nakihangire;’

¹⁰habweki, ndi munyanzigwa wawe, kandi ndi munyanzigwa w'ebyambu byawe, ensi ya Misiri, okurugirra Migidooli okuhika Siyene ha mutaano ogw'Esopiya, ninyija kugifoora ihamba kandi kitongo.

¹¹Tihaligaruka kurabamu muntu, kandi tihaligaruka kurabamu kisoro; erimara emyaka amakumi ana etakaikarwamuga kintu.

¹²Ensi Misiri, ndigifoora kitongo hagati y'ensi ezindi ezafookere bitongo; kandi embuga zaayo zirimara emyaka amakumi ana, hagati y'embuga ezaahwerekereziibwe.

¹³“Habwokuba, MUKAMA Ruhanga naagamba ati: Obu halihinguraho emyaka amakumi ana, ndisorooza Abanyamisiri, mbaihe omu mahanga nambere baararangiire;

¹⁴abanyagwa ndibagarra omunsi Pasiroosi, ensi ey'obuzaarwa bwabo; oku nuho baliikara, obukama bwabo tibulimanywa.

¹⁵Buliba bukama oburukukirra kimu okuba bwa hansi ha makama agandi; kandi tibuligaruka kwenyumirizaaho amahanga ebiro n'ebiro; ndibakeehya muno, tibaligaruka kulema amahanga agandi ebiro byona.

¹⁶Isirairi, taligaruka kubeesiga ngu balibakoonyera ebiro byona. Ekikorwa Misiri eki yakozire, kiraijukyaga Isirairi nkooku kyabaire kibi kubeesiga. Obu nubwo Isirairi alimanya nkooku ndi MUKAMA Ruhanga.”

¹⁷Ha kiro eky'okubanza eky'okwezi okw'okubanza, MUKAMA akangambira ati:

¹⁸“Wewe mwana w'omuntu, Nebukadeneeza omukama wa Bbabbulooni, azinisize ihe ery'okuseesira Taya; abaserikale be akabeetwekesa ebintu ebirukulemeera muno, boona nukwo kucweka empara n'okunyubuka amabega baitu noobu baatalibaine bata, omukama n'abaserikale, batagire ekibaasaswirwe.

¹⁹Nikyo MUKAMA arukugambira ati: Ensi Misiri, ninyija kugiha Nebbukadeneeza omukama wa Bbabbulooni, atwale ituungo lyayo, aginyage kandi agyaye; egi, niyo eriba mpeera ey'okusasura ihe rye.

²⁰MUKAMA Ruhanga naagamba ati: Ninyija kumuha ensi Misiri habw'emirimo ye ei yakozire, habwokuba ihe rye, likaba nirikorra nyowe.

²¹“Eki obu kiribaho, abantu ba Isirairi ndibafoora b'amaani, kandi iwe Ezekyeri, ndikwikiriza obaze muno, boona bakuhurre, nubwo balimanya nkooku ndi MUKAMA.”