Read Runyoro - rutooro Ezek 3 Bible Online

Ezek 3 - Runyoro - rutooro bible

Ezek 3

¹Yangambira ati: “Iwe mwana w'omuntu, lya ekyohairwe, lya omuzingo gw'ekitabu gunu ogende ogambire enju ya Isirairi”

²nubwo nayesamire, yampa omuzingo gw'ekitabu ngulye.

³Yangambira ati: “Iwe omwana w'omuntu, lya omuzingo gw'ekitabu gunu ogu ndukukuha”, oigutire kimu; omu kanwa, kikaanurra nk'obwoki.

⁴Kandi akangambira ati: “Iwe omwana w'omuntu, ogende hanju ya Isirairi, obagambire ebi ndaakugambira;

⁵Habwokuba, totumirwe hali abantu abarukubaza engambo ey'abanyamahanga kandi eyerukuguma, baitu otumirwe hanju eya Isirairi.

⁶Totumirwe hali, abantu abarukubaza engambo ey'abanyamahanga abarukubaza ebigambo ebi otarukukenga. Mazimakwo, kakuba mbaire nkutumire hali abantu nk'abo baakutegere amatu bahurra eki orukugamba.

⁷Baitu enju ya Isirairi, terukwija kukuhurra habwokuba, noobwakubaire nyowe, tibarukwenda kumpurra; habwokuba enju ya Isirairi yoona ngumangani kandi ntahurra.

⁸Na iwe ninyija kukufoora ngumangani kandi w'amaani nkabo.

⁹Ninyija kukufoora kataihuka nk'omwandara, ogume dai nk'ibaale, oleke kubatiina, amaiso gaabo galeke kukukanga, habwokuba bantu abaayeremere.”

¹⁰Kandi akongera yangamba ati: “Iwe omwana w'omuntu, ebigambo byange ebi ndukukugambira, obitegere amatu obihurre.

¹¹Kandi genda ohikeho enzaahisibwa, hali abantu bawe obagambire oti: ‘Binu, MUKAMA Ruhanga nibyo arukugamba’; obu baraahurra rundi obu baraayanga kuhurra baitu iwe bahikeho”.

¹²Nubwo Mwoyo wa Ruhanga yampimbire, kandi ekitiinisa kye obu kikaba nikiimuka omu kiikaro kyakyo, nahurra omusisa ogw'amaani gundeesirwe enyuma;

¹³omusisa ogu, gukaba niguruga omu mapapa ag'ebihangwa ebyomeezi, obu bikaba nibihikahongana, kandi gukaba niguruga omu nyamuziga ezikaba zibiheeriire, ebi nibyo byaahuliirwe nibigamba nk'omusisa ogw'amaani.

¹⁴Obusobozi bwa MUKAMA bwanyijaho n'amaani maingi, omwoyo gwe obu gukaba niguntwara nahurra obusaalizi kandi nakwatwa ekiniga;

¹⁵aho nahika Terabbibbu, nahikaho enzaahisibwa, abakaba bali ha mukungu gw'ekyambu Kebara, nkamara oku ebiro musanju hamu nabo, ndi aho nsobiirwe.

¹⁶Ebiro musanju obu byahingwire, MUKAMA yangambira ati:

¹⁷“Iwe omwana w'omuntu, nkufoire mulinzi ow'okulindaga enju ya Isirairi; bwona obu ndaagambaga ekigambo, niiwe oraakibahikyahoga.

¹⁸Obu ndaagambiraga omuntu omubi nti: ‘Mazimakwo noija kufa’, kakuba otamuhabura rundi otamutererra kucwa engeso ze embi nukwo ajunwe omuntu omubi ogu, obubi bwe alibugwamu; baitu niiwe ndijunaana obwomeezi bwe.

¹⁹Baitu kakuba omuhabura akalemera omu bubi bwe n'omu ngeso ze embi, obubi bwe alibugwamu; iwe, obwawe oliba obujunire.

²⁰Kandi omuntu omurungi kakuba atandika kukora ebibi, na nyowe nkamuleetera ebigumire, obu otalimuhabura, alifa, habwokuba otamuhabule, aliitwa ekibi kye, kandi ebikorwa bye ebirungi ebi yakozire, tibiriijukwa; baitu obwomeezi bwe ndibukujunaana.

²¹Baitu obu olihabura omuntu omurungi aleke kusiisa, akeerinda kusiisa, mazimakwo alyomeera, habwokuba akaikiriza eki yahabwirwe; obwomeezi bwawe oliba obujunire.”

²²Nkahurra MUKAMA nandoza amaiso ge ag'obusobozi, yangambira ati: “Imuka ogende omu kyeeya oku nuho ndaabaliza na iwe.”

²³Aho naimuka nagenda omu kyeeya; oku, nkarora ekitiinisa kya MUKAMA, ekirukusisana nk'eki nkaba ndozire ha kyambu Kebara; nagwa njuumaire.

²⁴Baitu Mwoyo akantaahamu yanyimukya yanyemereza; yambaliza naagamba ati: “Genda oyekingire omunju yawe.

²⁵Kandi iwe omwana w'omuntu, noija kuteebwaho emiguha obohwe nukwo oleke kuturuka aheeru kweteeraniza omu bantu;

²⁶orulimi rwawe ndirukukwasiza omu bihangara, obe kateta kandi olemwe kubajunaana; habwokuba bantu ab'enju eyayeremere.

²⁷Baitu obu ndaabaga nimbaza na iwe, ndaakwiguraga akanwa, nukwo obagambire oti: ‘Binu MUKAMA Ruhanga nibyo arukugamba’; ogu arukugonza kuhurra ahurre; n'ogu alyanga kuhurra ayange; habwokuba bantu ab'enju eyayeremere.