Read Runyoro - rutooro Ezek 30 Bible Online

Ezek 30 - Runyoro - rutooro bible

Ezek 30

¹MUKAMA akangambira ati:

²“Wewe mwana w'omuntu, ranga noogamba oti: MUKAMA Ruhanga naagamba ati. Muteere empamo, ‘ekiro eki, nikikaigale!’

³Habwokuba ekiro kiri haihi; ekiro kya MUKAMA nikirra haihi kiriba kiro ky'ekibunda nuko kaliba kasumi ak'okuhwerekerra kw'amahanga.

⁴Obulemu bulicweka omunsi Misiri, kandi Suudani eriba omu muhito ogutagambwa. Ensi Misiri, eriitwamu abantu baingi; Ensi erinyagwa, esigale eri bikambuuro.

⁵Esopiya na Puuti na Luudi, Arabbiya yoona, na Libbiya n'abantu boona omunsi ezikwataniza baligwa nabo habw'empirima.

⁶MUKAMA naagamba ati: abo abarukusagika Misiri, nibaija kufa n'obusobozi bwayo obunyakugyehuliza, nibwija kukeeha MUKAMA Ruhanga naagamba ati: Okuruga Migidooli okuhika Siyene, abantu baligwa omu bulemu.

⁷Ensi egi, niyo erikirra kimu kuba kitongo omunsi yoona, kandi embuga zaayo zirisigara ziri bikambuuro bisa.

⁸Obu ndimara kwokya Misiri, abakoonyezi baayo, bafiire abantu nubwo balimanya nkooku ndi MUKAMA.

⁹“Ha kiro eki, ndituma abakwenda abarukwanguha bagende batiinise Ab'esopiya abakaba bataina eki barukuteekereza; kandi ha kiro Misiri eki ericwererwaho omusango nubwo balihikwaho omuhito; habwokuba, eky'okusaalirwa ekiro eki kiri haihi kwija!

¹⁰“MUKAMA Ruhanga naagamba ati: Ninyija kwekoonyeza Nebbukadeneeza omukama wa Bbabbulooni, mpwerekereze ituungo lya Misiri.

¹¹Omukama ogu hamu n'abantu be, ihanga erikirra kimu kutiinisa omu mahanga goona, nuwe aliija kuhwerekereza ensi; balisomora ebitara byabo barwanise Misiri, bagiijuze emitumbi.

¹²Ekisaaru Kiira ndikyomya ensi ngiguze abantu ababi; ndireka abanyamahanga bahwerekereze ensi, na byona ebinyakugirumu, nyowe MUKAMA, ninyowe nkigambire.

¹³“MUKAMA Ruhanga naagamba ati: Ndicwacwana ebisisani eby'embandwa mmaleho ebisisani eby'omunsi Nofu; omunsi Misiri, tihaligaruka kubayo omulemi; ensi nukwo ndigitiinisa nti.

¹⁴Pasiroosi ndigifoora kitongo, Zowani ngicumike omurro, kandi Tebbesi ngifubire.

¹⁵Ndibiihirirwa muno Siini, ekigo kya Misiri ntemateme endurundu y'ebintu ebya Tebesi.

¹⁶Kandi ndyokya Misiri; Siini nukwo esaalirwe muno; Tebbesi baligidubura kandi ebisiika byayo biriseeswa.

¹⁷Abasigazi ab'Areeni baligwa omu bulemu, kandi abakazi balinyagwa.

¹⁸Obundiihaho obusobozi bwa Misiri, nkamaraho n'amaani agaabeehulizaaga, Tehapaneheesi eriteerwamu omwirima, abantu balinyagwa, hamu n'embuga zaayo zoona.

¹⁹Nukwo ndifubira Misiri nti, abantu nukwo bamanye nkooku ndi MUKAMA.”

²⁰Ha kiro ekya musanju eky'okwezi okw'okubanza okw'omwaka ogwa ikumi na gumu, MUKAMA akangambira ati:

²¹“Wewe mwana w'omuntu, Faraaho omukama wa Misiri, mmuhenzire omukono; kandi tigukabuyirwe nukwo gukire habw'okusembwa n'ekikoba nukwo gusobole kuba gw'amaani, kukwata empirima.

²²Nikyo MUKAMA Ruhanga arukugambira ati: Nindwanisa Faraaho omukama wa Misiri, kandi ninyija kumuhenda emikono yombi, omukono omwomeezi, na guli ogwahendekere; nukwo mmunagise empirima.

²³Abanyamisiri, ninyija kubararangya omu mahanga, mbataabanize omunsi ezindi.

²⁴Emikono y'omukama wa Bbabbulooni, ndigifoora y'amaani, mmukwase empirima yange; baitu Faraaho ninyija kumuhenda emikono, alisindira omumaisoge, nk'omuntu anyakuhutaire obuhuta obw'okumwita.

²⁵Emikono y'omukama wa Bbabbulooni ndigifoora y'amaani, baitu eya Faaraho ndigicekya. Abantu nubwo balimanya nkooku ndi MUKAMA. Obu ndikwasa omukama wa Bbabbulooni empirima, alirwanisa ensi Misiri;

²⁶Abanyamisiri ndibararangya omu mahanga, mbataabaanize omu nsi ezindi. Abantu nubwo bamanye nkooku ndi MUKAMA.”