Read Runyoro - rutooro Ezek 31 Bible Online

Ezek 31 - Runyoro - rutooro bible

Ezek 31

¹Ha kiro eky'okubanza eky'okwezi okwa kasatu oky'omwaka ogwa ikumi na gumu, MUKAMA akangambira ati:

²“Wewe mwana w'omuntu, ogambire Faraaho omukama wa Misiri hamu n'abantu be oti: “N'oha arukukwingana ekitiinisa?

³Ka nkusisanize omukogoto ogwa Lebbanooni, ogwina amataagi amarungi n'ekiituuru nk'eky'ekibira, kandi oguraihire muno, amasonsolya gaagwo nigahikira kimu omu bicu.

⁴Amaizi gakagwitirra, enyanja yaguraihya yaikiriza ebisaaru byayo okugera nibyehinguliiriza ekiikaro eki gukaba gubyairwemu, nambere gukaba gubyairwe natuma ebyambu byayo bihikeho emiti yoona ey'ekibira;

⁵nikyo gwaraihiire muno guti gwakira emiti yoona ey'ekibira; amataagi gaagwo gaanyeeta kandi gaaraiha habw'amaizi amaingi agakaba gaguli omu ndokwa.

⁶Enyonyi zoona ez'omu mwanya, zaayombekaga ebiju byaazo omu mataagi gaagwo, ebisoro byona eby'omwiswa, by'azaaraga hansi y'amataagi gaagwo; kandi amahanga ag'ekitiinisa gaaswekererwaga ekiituuru kyagwo.

⁷Omuti ogu gukaba guli murungi mali, guraihire muno kandi gwina amataagi agaraihire muno, habwokuba emihama yagwo ekaba enywire amaizi maingi.

⁸Emikogoto ey'omumusiri gwa Ruhanga, ekaba etarukusobora kugwerenga, kandi emisambya ekaba etarukwingana amataagi gaagwo emyeramaino okugirengesaniza n'amataagi gaagwo, gakaba nigagikirra hara, busaho muti na gumu omumusiri gwa Ruhanga ogukaba nigusisana ogu oburungi.

⁹Ninyowe nagusemiize nti, nagutaho akaseebo k'amataagi amataagi amaingi gati emiti yoona ey'Edeni, ey'ekaba eri omumusiri gwa Ruhanga, nukwo kugukwatirwa ihali.

¹⁰“Nikyo MUKAMA arukugambira ati: Omuti ogu habw'okuraiha muno gukahika omu bicu, gwayebuza habw'okuraiha kwagwo,

¹¹habweki nguhaireyo, alikiriza omulemi ow'amaani agunyage, agukorre ekisemeriire obubi bwagwo.

¹²Abanyamahanga, abanyakukirra kimu kutiinisa omu mahanga goona, baligutema gugwe hansi bagulekeho, amataagi gaagwo galigwa hansozi, omu bihanga byona, gacwekacwekere omu mikura yoona ey'omunsi egi; abantu ab'amahanga goona ag'ensi, baliruga omu kiituuru kyagwo bagusige aho.

¹³Enyonyi zoona ez'omu mwanya, ziriija zigwikaleho, aho nambere gwagwire, kandi enyamaiswa zoona ez'omwiswa, ziriikara ha mataagi gaagwo.

¹⁴Ebi byona biribaho, nukwo haleme kubaho emiti enyakuli haihi n'amaizi erisobora kuraiha muno, rundi ogulihikira kimu omubicu, nukwo haleme kubaho emiti enyakunywire amaizi, erisobora kugingana oburaiha; habwokuba emiti egi yoona ekaheebwa Warufu, ekaheebwa nyabuyonga, hagati y'abantu ab'okufa; hamu n'abo abanyakusirimuka omukiina. Habweki, okuruga hati n'okweyongerayo, tihalibaho muti, noobu guliba gunywire guta amaizi, oguligaruka kuraiha guti, rundi ogulituruka ebicu, gukaraiha kwingana aho.

¹⁵“MUKAMA Ruhanga naagamba ati: Ha kiro eki gulisirimukiraho nyabuyonga, ndiragira enyanja emuterre empamo, ndyemereza ebisaaru byayo, amaizi maingi tigaligaruka kugera; ndinaga ekibunda ha rusozi Lebbanooni habw'omuti ogu, emiti yoona ey'omu kisaka, omu bwerre erihwa amaani habwagwo.

¹⁶Obu ndiguhungura nyabuyonga hamu n'abo abanyakusirimuka omu kiina, abantu ab'amahanga obu balihurra nigugwa balikwatwa akatukumo; emiti yoona ey'Edini, eyasoroirwe kandi erukukirra kimu emiti yoona eya Lebbanooni oburungi, egi yoona eya nyabuyonga eyanywire amaizi, erisemererwa.

¹⁷Emiti egi nayo, erisirimuka nyabuyonga hamu na guli, esange abantu bali abaisirwe empirima; ego, abo abaararaga omu kiituuru kyagwo omu mahanga, balihwerekerra.

¹⁸Iwe, omu miti y'Edeni niguha ogurukwingana ekitiinisa n'obukuru? Noija kugenda nyabuyonga, hamu n'emiti ey'Edeni; oikale n'abatasazirwe n'abaisirwe empirima. “MUKAMA Ruhanga naagamba ati: “Omuti ogu, nuwe Faraaho n'abantu be boona.”