Read Runyoro - rutooro Ezek 32 Bible Online

Ezek 32 - Runyoro - rutooro bible

Ezek 32

¹Ha kiro eky'okubanza eky'okwezi okwa ikumi n'ebiri okw'omwaka ogwa ikumi n'ebiri, MUKAMA akangambira ati:

²“Wewe mwana w'omuntu; oterre Faraaho omukama wa Misiri empamo omugambire oti: “Nooyeteekereza nk'entale enyakuli omu mahanga, baitu noosisana nk'ekijoka ekinyakuli omu mayanja; obaliza omu bisaaru byawe, otabangura amaizi n'ebigere byawe, kandi osiisa ebisaaru eby'amayanja.

³MUKAMA Ruhanga naagamba ati: Abantu ab'amahanga amaingi obu balyesorooza, ndikukwasa n'akatimba kange, mbaragire bakate ha bwerre.

⁴Ndikunaga haitaka, ndikuhungura omu bwerre osomwe amanyonyi ag'omumwanya, oliibwe enyamaiswa ez'omunsi.

⁵Enyama yawe ndiginaga hansozi, kandi omutumbi gwawe ndigwijuza ebihanga.

⁶Ensi ndigijubya n'esagama yawe erukugera okuhikira kimu hansozi. Emikura yoona erikwijura.

⁷Obu ndikuhwerekereza, ndisweka iguru, kandi enyunyuuzi zalyo ndiziiraguza; izooba ndirisweka ekiho, kandi okwezi tikulijwa.

⁸MUKAMA Ruhanga naagamba ati: Ebirukwaka byona ebya haiguru Ebirukwangasana, ndibiiraguza haiguru yawe kandi ensi ndigireetamu omwirima.

⁹Obu ndiba ninkutwara oli munyagwa omu mahanga, omunsi ezi otakamanyahoga, ndisaaliza abantu baingi.

¹⁰Eki ndikukora, kirihuniriza amahanga maingi. Obu ndihungya empirima, abakama balimarwaho obutiini. Ha kiro eki oligweraho, balitukumira akasumi koona, buli omu naatunturra obwomeezi bwe.

¹¹Habwokuba MUKAMA Ruhanga naagamba ati: Empirima y'omukama wa Bbabbulooni erikuhikaho.

¹²Ndiikiriza abantu bawe, baitwe abandi ab'amaani abarukukirra kimu kutiinisa omu mahanga goona, babaise ebitara. “Abo nubo balimaramu ensi Misiri emyehembo kandi abantu baayo boona balihwerekerra.

¹³Ndihwerekereza ebisoro byayo mbimale haihi n'amaizi tihalibaho muntu n'omu aligaruka kugarubatamu akagatabangura, kandi tihalibaho bisoro ebirigaruka kugatabangura. MUKAMA Ruhanga naagamba ati:

¹⁴Hanyuma, nubwo ndisemeza amaizi gaayo ndeke ebisaaru byayo bigere nk'amagita nka kara nkooku barukwenda.

¹⁵Ensi Misiri obu ndigifoora kitongo, ebintu ebigiijwiremu byona bikagihwamu, obu abantu nubwo balimanya nkooku ndi MUKAMA.

¹⁶Egi niyo empamo eraateerwaga; abaisiki ab'amahanga, nubo baraaziteeraga nibaziterra ensi Misiri n'abantu baayo boona, MUKAMA Ruhanga naagamba ati: baraateeraga empamo ezi.”

¹⁷Ha kiro ekya ikumi na bitaano eky'okwezi okw'okubanza okw'omwaka ogwa ikumi n'ebiri MUKAMA akangambira ati:

¹⁸“Wewe omwana w'omuntu; terra empamo abantu b'ensi Misiri, baragire basirimuke, boona bahara b'amahanga ag'ekitiinisa, bagende nyabuyonga, nambere hali bali abaasirimukire omu kiina.

¹⁹Nooteekereza ngu okasemera okukira abandi? Sirimuka, oikale n'abatasazirwe.

²⁰Baligwa hagati y'abo abaisirwe empirima, abantu baayo boona baliikara na yo.

²¹Abanyoro abakuru aba nyabuyonga hagati, bali hamu, n'abakoonyezi baabo, balibabazaaho nibagamba bati; ‘Abatarasazirwe abaisirwe abaagwire omu bulemu basirimukire, bali aho tibarukwetengeesa.’

²²“Oku, nuho hali Asiriya n'ekitebe kye, ebituuro by'abantu baabo bagyehinguliriize, abo boona abaagwire omu bulemu;

²³abaaziikirwe omu bicweka ebya hara muno eby'ekiina, abantu be beehinguliriize ekituuro kye; abo boona abaagwire omu bulemu, abaatanisaaga ab'omunsi ey'aboomeezi.

²⁴“Eramu nayo nuho oku, abantu baayo boona beehinguliriize ekituuro kyayo; abo boona abaagwire omu bulemu, abaasirimukire nyabuyonga batasazirwe, abaatiinisaaga ab'omunsi ey'aboomeezi, hati nibaswazibwa hamu n'abo abanyakusirimuka omukiina.

²⁵Bamwaliire ekitabu hagati y'abo abantu be boona, ebituuro byabo bimwehinguliriize, abo boona abatarasazirwe, abaagwire omu bulemu; habwokuba, baatinisaga ab'omunsi ey'aboomeezi hati nibaswazibwa hamu n'abo abanyakusirimuka omukiina; baheebwa ekiikaro hagati y'abo abaisirwe.

²⁶Meseki na Tubali, nazo nuho ziri, n'abantu baazo boona, ebituuro by'abantu baabo bibeehinguliriize, abo boona abatarasazirwe abaagwire omu bulemu; habwokuba, baatiinisaaga ab'omunsi ey'aboomeezi.

²⁷Abo bataziikwe n'ekitiinisa nk'emanzi ezaira, abaasirimukire nyabuyonga bajwaire ebyokurwanisa, ebitara byabo babikiikire ha mabega, engabu zaabo baihagatiire. Abantu abo, ira bakaba bali b'amaani muno, nibatiinisa ab'omunsi ey'aboomeezi.

²⁸Habweki, olihendwahendwa, oikale hagati y'abatarasazirwe, abaagwire omu bulemu.

²⁹“Edomu nayo eri oku, abakama n'abalemi baayo boona, noobwakubaire bakaba bali b'obusobozi obutagambwa, hati bali hamu n'abo abaagwire omu bulemu; bali hamu n'abatarasazirwe, hamu n'abo abanyakusirimuka omukiina.

³⁰“Abalemi aba ha bukiizi bw'emoso, nabo bali oku, abo boona, n'Abaasidoni, abaasirimukire baina ensoni, hamu n'abaisirwe, noobwakubaire baatiinisaaga muno abantu habw'obusobozi bwabo; baroho aho batasazirwe, hamu n'abo abaagwire omu bulemu, nibaswazibwa hamu n'abo abanyakusirimuka omukiina.

³¹“MUKAMA Ruhanga naagamba ati: Okurora abantu abo boona baisirwe, kulihuumuza Faraaho n'ihe rye.

³²MUKAMA Ruhanga naagamba ati: Ogu, ira ayatiinisaaga ab'omunsi ey'aboomeezi yoona; hati nuwe ali n'abo abatarasazirwe abaagwire omu bulemu.”