Read Runyoro - rutooro Ezek 33 Bible Online

Ezek 33 - Runyoro - rutooro bible

Ezek 33

¹“MUKAMA akangambira ati:

²Wewe mwana w'omuntu, baza n'abantu bawe obagambire oti: Obu ndireeta obulemu omunsi, abantu ab'ensi egi, bakome omuntu omu omulibo, bamufoole mulinzi wabo;

³omulinzi ogu obu araabonaga omunyanzigwa nairra haihi ateerege engwara ahabule abantu;

⁴Kakuba omuntu ahurra engwara erukumuhabura akalema kuhabuka, omunyanzigwa akaija akamwita, ogu buli ayeyisire wenka.

⁵Habwokuba akahurra engwara neegamba, tiyahabuka. Kakuba yataireho omutima kuhaburwa, obwomeezi bwe, yaakubaire abukirize.

⁶Baitu omulinzi kakuba abona omunyanzigwa naija akalema kuteera engwara ahabule abantu be, omunyanzigwa akaija akaita omu omulibo, okufa kw'omuntu ogu, ndikujunaana omulinzi.

⁷“Habweki iwe mwana w'omuntu, nkufoire mulinzi w'enju ya Isirairi; obu orakahurraga nagamba ekigambo, obamanyiseege eki ngambire.

⁸Kakuba ngambira omuntu omubi nti: iwe muntu iwe omubi, mazimakwo noija kufa, okalema kugambira omuntu ogu akahinduka akazira aligwa omu bibi bye kandi okufa kwe niiwe ndikujunaana.

⁹Baitu kakuba ohabura omubi akalemera omu bubi bwe, alibugwamu, baitu iwe obwomeezi bwawe oliba obujunire.

¹⁰“Iwe mwana w'omuntu, ogambire abantu ab'enju ya Isirairi oti: Mugambire muti: ‘Ebibi byaitu n'ensobi zaitu, nibitulemeera muno, bitwanwire. Tusobora kwomeera tuta?’

¹¹Obagambire oti: MUKAMA Ruhanga naagamba ati: ndahiire, tingonza omuntu omubi afe, baitu ngonza ayeteere nukwo ayomeere; mweteere mweteere, mucwe engeso zanyu embi; inywe ab'enju ya Isirairi Kufa nimukugondeza ki?

¹²Kandi iwe omwana w'omuntu, gambira abantu bawe oti: Omuntu omurungi obwasiisa ebirungi ebi yakozire, tibirimujuna; omuntu omubi kakuba afuuhya obubi bwe, tibulimwita, kandi omurungi kakuba atandika kusiisa, ebirungi ebi yakozire ira, tibirimwomeeza.

¹³Noobu ndaaba ngambire nti omurungi alyomeera, baitu kakuba ayesiguzibwa oburungi bwe akakora ekibi, busaho na kimu ha bikorwa bye ebirungi ekiriijukwa; kandi obubi obu yayehaire alibugwamu.

¹⁴Kandi noobu ndiba nagambire omubi nti ‘mazimakwo olifa’; baitu kakuba alekera aho kusiisa akakora Ebiragiro eki biragire kandi ekihikire,

¹⁵kakuba agarrayo omusimbo abantu ogu baamusimbiire, kakuba agarrayo ebi yaibire, akakwata ebiragiro eby'obwomeezi, akalekera kimu kusiisa, ogu alyomeera, talifa.

¹⁶Ha bibi ebi yakozire, busaho na kimu ekirimujunaanwa; habwokuba akakora Ebiragiro eki biragira kandi ekihikire, ogu mazimakwo alyomeera.

¹⁷“Baitu abantu bawe nibagamba bati: ‘MUKAMA ebi akora tibihikire’; kandi kunu bbo ebibarukukora, nibyo ebitahikire.

¹⁸Omuntu omurungi obu alireka kukora ebirungi, akatandika kukora ebibi, eki kirimurugiramu kufa.

¹⁹Kandi omuntu omubi obu alifuuhya obubi bwe, akakora Ebiragiro eki biragira kandi ebihikire, eki kirimwomeeza.

²⁰Baitu nabwo nimukyagamba ngu: ‘MUKAMA ebi arukukora tibihikire.’ Inywe ab'enju ya Isirairi, buli omu omuli inywe, ndimucwera omusango nindorra ha bikorwa bye.”

²¹Omu mwaka ogwa ikumi n'ebiri ogw'okuzaahisibwa kwaitu, ha kiro ekya kataano eky'okwezi kwa ikumi, omusaija ow'akaba acwire Yerusaalemu akampikaho yangambira ati: “Orubuga ruhambirwe”

²²orwebagyo orwayebembiire, omusaija ayacwire ogu atakaizire, omu kasumi ako MUKAMA akaba amazire kuunyigura akanwa, nkaba ntakyali mufu w'omunwa.

²³MUKAMA akangambira ati:

²⁴“Wewe mwana w'omuntu, abantu abanyakuli omubitongo eby'omunsi ya Isirairi, nibaikara nibagamba bati: ‘Abburahamu akaba ali muntu omu wenka ati, baitu akalya ensi, lero kaaswa itwe abaingi?’ Ensi mazimakwo niija kutuheebwa tugirye.

²⁵Habweki obagambire oti, MUKAMA Ruhanga naagamba ati: Mulya enyama, mugiriiraniramu esagama yayo, muramya ebisisani, kandi mwita abantu; obu niinywe musemeriire kulya ensi?

²⁶Mwesiga empirama, mukora ebintu ebibi muno, kandi buli omu omuli inywe asiihana na muk'omutaahi; obu niinywe musemeriire kulya ensi?

²⁷Obagambire oti: MUKAMA Ruhanga naagamba ati: Mazima ndahiire, abo abanyakuli omubitongo, baliitwa empirima; ogu anyakuli omu bwerre ndimuhiira enyamaiswa nizo zimujunjubule; kandi abo abanyakuli omu bigo, baliitwa kagingo.

²⁸Ensi ndigifoora kitongo kandi ihamba; amaani gaayo agaagyehulizaaga galihwaho; ensozi eza Isirairi, zirisigarra kimu kyonka, tihaligaruka kurabayo muntu n'omu.

²⁹Ensi obu ndimara kugifoora kitongo kandi ihamba, habw'ebintu ebibi ebi baakozire, obu abantu nubwo balimanya nkooku ndi MUKAMA.

³⁰“Kandi iwe mwana w'omuntu, abantu bawe abo abaikara nibakubazaaho haihi n'ebisiika na hamiryango y'amaju, nibagambirangana buli omu naayeta owanyina, nibagamba bati: ‘Mwije muhurre MUKAMA eki arukugamba.’

³¹Bakuhikaho nkooku abantu bakora bakwikarra omumaiso nk'abantu bange, bahurra eki orukugamba, baitu tibakikora; habwokuba engonzi zaabo enyingi za hakalimi kwonka, baitu omutima gwabo guhwerire haamagoba.

³²Eee, iwe hali bo, noosisana nk'omuntu anyakwina iraka erirungi, arukuteera kurungi enanga naazina ebizina ebirukubaza ha ngonzi, habwokuba, bahurra eki ogamba, baitu tibakikora.

³³Baitu ebi byona obubirikahikirra kandi mazima kwo birihikirra, nubwo balimanya, omuli bo nkooku hakaba harumu omurangi.”