Read Runyoro - rutooro Ezek 34 Bible Online

Ezek 34 - Runyoro - rutooro bible

Ezek 34

¹MUKAMA Ruhanga akangambira ati:

²“Wewe mwana w'omuntu, orange ebirihikaho abaliisa ba Isirairi orange kandi obagambire oti: dara inywe abaliisa, MUKAMA naabagambira ati: Eee! Inywe abaliisa ba Isirairi, abataaha nimweriisa, omulimo gw'omulisa tinukwo kuliisa entaama?

³Mulya ebisajwa, mujwara engoye ezinyakukozirwe omu byoya by'entaama, mwita ezinyakugomokere; baitu entaama timwiriisa

⁴Enceke mutaigarremu amaani, endwaire mutaihe omubazi ogw'okwitambira endema mutaisembe, ezaahabire mutaihabule, ezaabuzire mutaiserre, kandi mukaikwata kubi, mutarukwigirra mbabazi.

⁵Nikyo zaararangiire habwokuba zikaba zitaina muliisa, zikararanga, zaaliibwa enyamaiswa ez'omu iswa

⁶Entaama zange ikararanga, ikenjeera hansozi zoona na ha buli kasozi koona akaraihire; ikataabaana omunsi yoona, hatabeho n'omu ayaiserwire rundi ayalengereho kwizoora.

⁷“Habweki, baliisa inywe, muhurre MUKAMA eki arukugamba ati:

⁸Ndahiire, entaama zange nkooku zaisirwe kandi zaaliibwa enyamaiswa zoona ez'omu kisaka, habwokuba omuliisa akaba ataroho, abaliisa bange batalengeho kuseerra entaama zange. Bakaba nibeefaaho bonka, batarukufaaho entaama.

⁹Habweki, inywe abaliisa muhurre MUKAMA eki arukugamba:

¹⁰MUKAMA Ruhanga naagamba ati: Abaliisa abo ninyija kubajunaana; igana lyange ninyija kulibaihaho, tindibaikiriza kuliriisa. Eki nikyo kiraabatanga kweriisa. Entaama zange ninyija kwibatamura, tibaligaruka kwirya.

¹¹“Habwokuba MUKAMA Ruhanga naagamba ati: Nyowe nyenka ndizikazaaho amaiso

¹²Omuliisa nkooku arolerra igana lye lyona, ayemeriire hagati y'entaama ze ezirarangire, na nyowe ezange nukwo ndiirolerra nti; obu haliba hagwire ekiho hatiire n'omwirima, ndizijuna nziihe nambere zaararangiire,

¹³ndiziiha omunsi nambere ziri; ndisorooza nziihe omumahanga, nzigarre omunsi yazo yonyini.

¹⁴Ndiziriisa obunyansi oburungi, kandi ha mitwe y'ensozi eza Isirairi, nuho ziraaliiraga; nuho ziraazaagiraga omu iriisizo erirungi, zirye obunyansi oburungi obwa hansozi za Isirairi.

¹⁵MUKAMA Ruhanga naagamba ati: Nyowe nyenka, entaama zange ninyowe ndazeeriisizaaga kandi nzizaagize.

¹⁶Ezaabuzire ndiziserra, ezahabire nzihabule emputa nzisembe, enceke nzigarremu amaani, ezigomokere kandi ez'amaani nzirolerre, ndiziriisakwo nkooku omuliisa asemeriire kuliisa.

¹⁷“MUKAMA Ruhanga naagamba ati: Ninyija kucwa omusango, entaama ebuguma nzicwere n'entaama, ebuguma, empaya z'entaama nzicwere n'empaya emburabuzi.

¹⁸Abamu omuli inywe timumazirwe kulya obunyansi oburungi, mweyongiire n'okusambirra obumutarukulya! Munywa amaizi amarungi, kandi mutabangura agamutarukunywa! Kandi kunu entaama zange ezindi zihambirizibwa kulya obunyansi oburubatiriire n'amaizi agatabangwirwe.

¹⁹Entaama zange nukwo ikalya obunyansi obu murubaatiriire, zikanywa amaizi aga mutabangwire?

²⁰“Nikyo MUKAMA Ruhanga arukugambira ati: “Nyowe nyenka, ndicwera omusango entaama ezigomokere n'ezidoodookere.

²¹Endwaire mukaisindika ha rubaju, mwaihuumira mwaziiha omu igana.

²²Igana lyange ninyija kulijuna, tiririgaruka kukorwa kubi. Entaama zange zoona ndizicwera omusango, enungi nzaahukanize n'embi.

²³Ndizikomera omuliisa omu ow'okuzirolerra, nuwe omwiru wange Daudi, nuwe araaziriisaaga; nuwe aliba muliisa wazo.

²⁴Kandi nyowe MUKAMA, ndiba Ruhanga wazo, Daudi omwiru wange, nuwe aliba mulemi wazo; eki kigambirwe nyowe MUKAMA.

²⁵“Ndikora nazo endagaano ey'obusinge enyamaiswa ez'omu kisaka nzicwe omunsi, nukwo ziikale omwirungu n'obusinge, zibyame omu bibira.

²⁶Ndiziha omugisa nzireke ziikale haihi n'akasozi kange akarukwera ndaanagaga enjura omu kasumi kaayo; kandi eriba njura ey'orweezo.

²⁷Emiti ey'omu misiri eryaana ebijuma, ensi eryeeza etemu ensaagi ziikale omunsi yazo n'obusinge; obu ndicwacwana omutahimbwa ogw'ekikoligo ekinyakuziri omu bikya, nkaziiha omunsi z'abo abakaba bazitungire nk'abairu rubaale, obu nubwo zirimanya nkooku ndi MUKAMA.

²⁸Tizirigaruka kunyagwa ab'amahanga kandi tizirigaruka kukaturwa enyamaiswa ez'omunsi. Ziriikara n'obusinge, tihalibaho muntu n'omu alizitiinisa.

²⁹Ndiziha engonjo ezinyakurumu ebyokulya, nukwo zireke kwitwa enjara ekazimara omunsi kandi tizirigaruka kujunwa abantu ab'amahanga

³⁰Obu nubwo zirimanya, nyowe MUKAMA Ruhanga wazo, nkooku ndi nazo, kandi abantu ab'enju ya Isirairi nkooku bali bantu bange.

³¹MUKAMA Ruhanga naagamba ati: Muli ntaama zange, muli ntaama ez'omu iriisizo lyange, kandi ninyowe Ruhanga wanyu.”