Read Runyoro - rutooro Ezek 35 Bible Online

Ezek 35 - Runyoro - rutooro bible

Ezek 35

¹MUKAMA akangambira ati:

²“Wewe mwana w'omuntu, oimukye amaiso gawe orole orusozi, orange ebirirubaho,

³orugambire oti: MUKAMA Ruhanga naagamba ati: Iwe rusozi Seyiri, ndi munyanzigwa wawe ninyija kukurwanisa, nkufoole kitongo kandi ihamba.

⁴Embuga zawe ninyija kwifoora bikambuuro, ofooke ihamba; obu nubwo olimanya nkooku ndi MUKAMA.

⁵Habwokuba okaikaza obunyanzigwa ha mutima, nukwo kuleka abantu ba Isirairi bakaitwa empirima mu kasumi kokubonesibwa kwabo;

⁶habweki, MUKAMA Ruhanga naagamba ati: ndahiire, okufa kwawe kuhikire, kandi tosobora kukwehugura. Okacwa omusango ogw'okwitwa, okwita kukakwomerra na iwe oliitwa nkooku waisire.

⁷Orusozi Seyiri, ndirufoora ihamba kandi kitongo; nyite boona abagendayo kandi abarugayo.

⁸Ensozi zawe, ninyija kuziijuza emitumbi ey'abantu abaisirwe; emitumbi egi ey'abantu abanyakwisirwe empirima, erigarangatana, ha busozi bwawe, omu buhanga n'omu bihanga byawe byona.

⁹Ndikufoora kitongo, kandi embuga zawe ti zirigaruka kwikarwamu omuntu. Obu nubwo nulimanya nkooku ndi MUKAMA.

¹⁰“Habwokuba okagamba oti: ‘MUKAMA noobu araaba ali oku, emahanga ganu abiri, n'ensi zinu ibiri, nitwija kuzeetungira’

¹¹nikyo MUKAMA Ruhanga arukugambira ati: ndahiire, ndikusasura habw'ekiniga, ihali n'enobi, ebi wayolekere abantu bange; kandi obu ndiba ninkucwera omusango, nubwo ndibeemanyisa.

¹²Kandi nubwo olimanya, nyowe MUKAMA nkooku nahuliire ebintu ebibi, muno ebi wabalizeeho ensozi za Isirairi noogamba oti: ‘Ikafooka matongo, ikatuheebwa twitemateme.’

¹³Mukanyenyumirizaaho n'akanwa kanyu, kandi mwambazaaho ebigambo bingi; eki nkakihurra.

¹⁴MUKAMA Ruhanga naagamba ati: Ninyija kukufoora itongo, ensi yoona nukwo ekyanganuke.

¹⁵Iwe rubuga orwa Seyiri, habwokuba okasemererwa ensi ya Isirairi obu yafookere itongo, na iwe nukwo ndukwija kukukora nti; iwe n'Edomu yoona, nimwija kufooka itongo; obu abantu nubwo balimanya nkooku ndi MUKAMA.