Read Runyoro - rutooro Ezek 36 Bible Online

Ezek 36 - Runyoro - rutooro bible

Ezek 36

¹“Wewe mwana w'omuntu, orange ebirihikaho ensozi za Isirairi noogamba oti: Inywe ensozi za Isirairi, muhurre MUKAMA eki arukugamba.

²MUKAMA Ruhanga naagamba ati: Habwokuba omunyanzigwa akababazaaho naagamba ati: ‘Otyo!’ ‘Ensozi ezi ezaira, hati zaitu,’

³habweki ranga noogamba oti: MUKAMA Ruhanga naagamba ati: Bakakufoora itongo, baakusaasangura ha mbaju zoona nukwo kutungwa amahanga agaasigaireho, wafooka kintu eky'okudiidwa abantu;

⁴habweki, inywe nsozi za Isirairi, muhurre MUKAMA Ruhanga eki arukugamba: MUKAMA Ruhanga naagambira ensozi, obuhanga n'ebihanga, amatongo n'embuga ez'ebifurukwa ezanyagirwe kandi ezirukusekerezibwa amahanga agandi aganyakuziheriire;

⁵Nikyo MUKAMA Ruhanga arukugambira ati: nimbaliza amahanga goona agasigaireho n'Edomu, amahanga agaayehaire ensi yange gagyetungire n'omutima ogw'okusemererwa muno kandi ogw'emigayo etagambwa, nukwo baginyage bagirye.

⁶Habweki, orange ebirihikaho ensi ya Isirairi, kandi ogambire ensozi n'obusozi, obuhanga n'ebihanga oti: MUKAMA Ruhanga naagamba ati: Nimbaza nyina ekiniga ekirumu ihali, habwokuba okeemera ebijumo by'amahanga;

⁷nikyo arukugambira ati: ndahiire, amahanga aganyakukuheriire, nago galijumwa.

⁸“Baitu inywe emiti eya hansozi za Isirairi, mulinaga amataagi, mwanire ebijuma abantu bange Abaisirairi; habwokuba bali haihi kugaruka omuka.

⁹Habwokuba, ndi ha rubaju rwanyu kandi ndiija nambere muli; ndikora kyona eki ndisobora baitu ensi yanyu egaruke erimwe kandi ebyarwemu ebyokulya.

¹⁰Ndibakanyisaamu abantu, enju ya Isirairi yoona yoona; embuga zirigarukwamu abantu, kandi amatongo gombekwemu buhyaka;

¹¹ndibakanyisaamu abantu n'ebisoro, ebi byombi bikanye bizaale, ndibagarramu abantu nka kara koona. Obu nubwo mulimanya nkooku ndi MUKAMA.

¹²Ego ndiikiriza abantu bange Abaisirairi bagaruke baikale omunsi egi, kandi terigaruka kubaitira abaana.

¹³MUKAMA Ruhanga naagamba ati: Habwokuba abantu babagamba ngu: muli bali b'abantu kandi ihanga lyanyu mulifubirra abaana;

¹⁴habweki MUKAMA Ruhanga naagamba ati: timukyagaruka kulya abantu, n'okufeereza ihanga lyanyu abaana.

¹⁵MUKAMA Ruhanga naagaruka naagamba ati: “tindigaruka kukwikiriza kujumwa amahanga, toligaruka kuswazibwa abantu n'okwesiitaza ihanga lyawe.”

¹⁶MUKAMA akangambira ati:

¹⁷“Wewe mwana w'omuntu, ab'enju ya Isirairi obu baikaire omunsi yabo nyabwabo bakagisiisa n'engeso zaabo n'ebikorwa byabo ebibi; engeso zaabo ezi banyolekere, mbi cuu nizisisana nk'omukazi arukuzira.

¹⁸Nukwo kubabiihirirwa muno habw'abantu aba baisire, na habw'ebisisani by'embandwa ebi baaramize.

¹⁹Nikyo nabararangiize omu mahanga, nabataabaniza omunsi: nkabacwera omusango nindorra ha ngeso, na ha bikorwa byabo.

²⁰Baitu obu baahikaga omu mahanga, hoona ha baakagendaga, baaswazaaga ibara lyange erirukwera, abantu nuho baihirraga kubabazaaho bati: ‘Banu bantu ba MUKAMA, baitu ensi ye bakagirugamu.’

²¹Baitu nyowe, ibara lyange erirukwera, Abaisirairi eri baaswaize omu mahanga, nkalituntuura.

²²“Habweki, ogambire enju ya Isirairi oti: MUKAMA Ruhanga naagamba ati: Eki ndukwija kukora tindukukikora habwanyu Abaisirairi, baitu ninkikora habw'ibara lyange erirukwera eri mwaswaize omunsi zoona ezi mwagiiremu.

²³MUKAMA Ruhanga naagamba ati: Obu ndyoleka amahanga ibara lyange ery'ekitiinisa-eri mwaswaliize omu mahanga ago, nkooku lirukwera, obu nubwo galimanya nkooku ndi MUKAMA. Ninywe ndyekoonyeza, kwoleka amahanga nkooku ndi Arukwera.

²⁴Habwokuba, ndibaiha omu mahanga, ndibasorooza omunsi zoona, mbaleete omunsi eyanyu yonyini.

²⁵Ndibamiisira amaizi amarungi, murugweho oburofu bwona, ndibogyaho oburofu bwona obwabarugiire omu kuramya ebisisani.

²⁶Ndibaha omutima omuhyaka ndibatamu omwoyo omuhyaka, kandi ndibaihamu omutima ogw'ibaale, mbahe omutima ogw'enyama.

²⁷Ndibatamu omwoyo gwange, mbasoboze kukwata ebiragiro byange n'okutaho omutima kukwata ebigambo byange.

²⁸Muliikara omunsi ei nahaire baisenkuru inywe; muliba bantu bange, nyowe mbe Ruhanga wanyu.

²⁹Ndibajuna byona ebibasiisa, ndibeereza ebyokulya bingi muno timuligaruka kugwerwa kiihe.

³⁰Emiti, n'emisiri yanyu ndigyanisa muno ebijuma timuligaruka kugwerwa kiihe ey'okubaswaliza omu mahanga.

³¹Nubwo muliijuka engeso zanyu embi, n'ebintu ebibi ebi mwakozire.

³²MUKAMA Ruhanga naagamba ati: Inywe ab'enju ya Isirairi ninyenda mumanye binu byona ebi ndukukora, nkooku ntarukubikora habwanyu, baitu ninyenda mukwatwe ensoni kandi muswale habw'ebimurukukora.

³³“MUKAMA Ruhanga naagamba ati: Ha kiro eki ndiboogezaaho obubi bwanyu bwona embuga nubwo ndizigarrramu abantu kandi n'ebiikaro byona ebyafookere matongo, biryombekwa buhyaka.

³⁴Ensi ira eyafookere itongo, eyarorwaga buli muhinguzi weena, erigaruka erimwe.

³⁵Abantu nubwo baligamba bati: Ensi enu eyabaire ihamba, efookere nk'omusiri gw'Edeni; embuga ezaabaire mahamba, matongo kandi ezaakambwirwe, hati igarukirwemu abantu, kandi zombekerwe zaaguma.

³⁶Amahanga agabaherraine, nubwo galigamba gati: Nyowe MUKAMA, ninyowe nyombekere buhyaka ebiikaro ebyakambwirwe, kandi ebi ebikaba biri matongo nagaruka nabibyaramu ebibyarwa.

³⁷“MUKAMA Ruhanga naagamba ati: Kinu nakyo, ndiikiriza abaana ba Isirairi bakinsabe nkibakorre: nukwo okukanyisa abantu baabo nk'obuhyo bw'entaama.

³⁸Baingane obuhyo obw'entaama obw'ebyonzira, baingane obuhyo obw'entaama obunyakuba Yerusaalemu omu Kasumi ak'amagenyi gaayo agaatairweho, embuga ezikaba ziri matongo, ziijule akanyanya k'abantu. Abantu nubwo balimanya nkooku ndi MUKAMA.”