Read Runyoro - rutooro Ezek 37 Bible Online

Ezek 37 - Runyoro - rutooro bible

Ezek 37

¹MUKAMA Akankwataho, yanturukya n'omwoyo gwe, yanta omu kihanga hagati; ekikaba kiijwire amagufa.

²Yagandabyamu, ekihanga eki, kikaba kiijwire amagufu maingi muno, kandi gomere kelekele.

³Yankaguza ati: “Wewe mwana w'omuntu, weza nootekereza amagufa ganu, gasobora kugaruka gakoomera?” Namugarukamu nti: “Iwe MUKAMA Ruhanga, eki niiwe, okimanyire.”

⁴Yagaruka yangambira ati: “Rangira amagufa ganu ogagambire oti: Magufa inywe agoomere, muhurre MUKAMA eki arukugamba.

⁵MUKAMA Ruhanga naagamba amagufa ganu ati: ninyija kubatamu orwoya mugaruke mwomeere.

⁶Ninyija kubataho ebinywa, mbamezeeho enyama, mbasweke orususu, mbatemu orwoya, mugaruke mwomeere; obu nubwo muraamanya nkooku ndi MUKAMA.”

⁷Naranga nkooku naragiirwe; obu nkaba ninkyaranga, nahurra haimuka akoogo, okuhuumirangana kw'ebintu; amagufa gaateerana, igufa erimu lyayeta ha lindi.

⁸Obu nkaba nkyaroleriire, amagufa gakaba gamazire ira kwijwaho ebinywa, gamezirweho enyama, garoho orususu baitu gakaba gatarumu rwoya.

⁹Hanyuma Ruhanga yangambira ati: “Wewe mwana w'omuntu, hati rangira orwoya, orurangire noogamba oti, MUKAMA Ruhanga naagamba ati: Iwe rwoya, oruge omu nsonda ina ez'ensi, oteere ha bantu abaafiire banu, nukwo bahumbuuke.”

¹⁰Nkooku yandagiire, na nyowe nukwo narangire, orwoya rwabataahamu, baahumbuuka, baimuka baayemerra, akanyanya ak'ihe ery'abantu.

¹¹Nubwo yagambiire ati: “Wewe mwana w'omuntu, amagufa ganu, nubo abantu boona ab'enju ya Isirairi. Hurra nkooku baikara nibagamba bati: ‘Amagufa gaitu gakooma gaakaranguka, amasiko gatuhoire; tukasenderwa kimu.’

¹²Habweki, barangire obagambire oti, MUKAMA Ruhanga naagamba ati: Inywe bantu bange, ninyija kwata ebituuro byanyu mbaziikulemu mbatwale omunsi ya Isirairi.

¹³Obu ndayata ebituuro byanyu nkabaziikuramu, nubwo muraamanya nkooku ndi MUKAMA.

¹⁴MUKAMA naagamba ati: Ninyija kubatamu Mwoyo wange, muhumbuuke, mbate omunsi yanyu yonyini; nubwo mulimanya, nyowe MUKAMA eki ninyowe nakigambire, kandi nkikozire.”

¹⁵Kandi MUKAMA akangambira ati:

¹⁶“Wewe mwana w'omuntu, kwata omwigo gumu, oguhandiikeho habwa Yuda na habw'abaana ba Isirairi abataahi be: kandi okwate omwigo gw'akabiri, oguhandikeho habwa Yozefu, omwigo gwa Efuraimu, na habw'enju yoona eya Isirairi abataahibe:

¹⁷emiigo egi yombi, ogiteeranize, gube mwigo gumu, gube mwigo gumu ogwokwasire omu ngaro zawe.

¹⁸Kandi abantu bawe obu balikukaguza bati: noogenderra ki omu kuteeraniza emigo egi?

¹⁹Obagarukemu oti, MUKAMA Ruhanga naagamba ati: ndi haihi kukwata omwigo gwa Yosefu ogunyakukwasirwe Efuraimu n'enganda eza Isirairi ezinyakuteerana nawe; nguteeranizeho omwigo ogwa Yuda, ngifoole mwigo gumu, nukwo ebe mwigo gumu ogu nkwasire.

²⁰Emiigo egi ebiri ogikwate ogibooleke.

²¹Hanyuma obagambire oti, MUKAMA Ruhanga naagamba ati: Abantu ba Isirairi ndibaiha omu mahanga aga baagiiremu, mbasorooze mbaihe hoonahoona, mbaleete omunsi yabo yonyini;

²²ndibafoora ihanga limu ery'omunsi yange yonyini, hansozi eza Isirairi; boona baliremwa omukama omu; tibaligaruka kuba mahanga abiri, kandi tibaligaruka kubaganizibwamu amakama abiri.

²³Tibaligaruka kwesiisa nibaramya ebisisani, kandi nibakora ebintu ebibi; ndibajuna byona ebibaleetera kugarukirra ebyabanagire omu bibi mbasemeze; nukwo babe bantu bange, na nyowe mbe Ruhanga wabo.

²⁴“Omuheereza wange Daudi, nuwe aliba mukama wabo; boona baligira omuliisa omu. Balitaho omutima okugendera ha bigambo byange n'okukwata ebiragiro byange.

²⁵Baliikara omunsi ei nahaire omuheereza wange Yakobbo, eyaikarwamuga baisenkuru inywe; bbo n'abaana baabo, na baijukura baabo, nuho baliikara ebiro n'ebiro; kandi omuheereza wange Daudi, nuwe aliba mulemi wabo ebiro byona.

²⁶Ndikora na bo endagaano ey'obusinge; hali bo, eriba ndagaano ey'ebiro n'ebiro; ndibaha omugisa mbakanyise, hagati yabo, nuho ndyombeka ekiikaro kyange ekirukwera, kibaikalemu ebiro byona.

²⁷Nubo ndaikaraga na bo; ndiba Ruhanga wabo, nabo babe bantu bange.

²⁸Ekiikaro kyange ekirukwera obu kiriba omuli bo ebiro byona, obu amahanga nubwo galimanya nkooku ndi MUKAMA anyakweza Isirairi.”