Read Runyoro - rutooro Ezek 38 Bible Online

Ezek 38 - Runyoro - rutooro bible

Ezek 38

¹MUKAMA akangambira ati:

²Wewe mwana w'omuntu, imukya amaiso, orole Googi, ow'omunsi Magoogi, omulemi omukuru owa Meseki na Tubbali, orange ebirimuhikaho

³noogamba oti: “MUKAMA Ruhanga naagamba ati: Wewe Googi, omulemi omukuru owa Meseki na Tubbali; ndi munyanzigwa wawe;

⁴ninyija kukuhindura nkucumite ebikwaso omunsaya, nkuleete hamu n'ihe lyawe lyona, embaraasi n'abatembi b'embaraasi, boona bajwaliire kimu eby'okurwanisa ekitebe eky'abantu abaingi, boona baina engabu enkooto n'entoito;

⁵bali hamu n'Abapaasa, Abakuusi n'Abapuuti, boona baina engabu n'enkofiira ez'ebyoma,

⁶Gomeri n'amahe goona, Besi-togaruma ayarugire omubicweka ebya hara muno ebya ha mukono ogw'obumoso hamu n'amahe ge goona amahanga maingi agaraaba hamu na iwe.

⁷“Oyeteekanize kandi oikale oyeteekaniize, hamu n'amahe gawe goona agakwesoroliizeeho, obalinde batakuseesira.

⁸Obu halihinguraho ebiro bingi, olisoroozibwa; omumyaka erukwija oliramagira ensi eyakesorolezibwemu abantu abaarugire omumahanga amaingi aga hansozi za Isirairi, eyekaba eri itongo erya buli na buli, eyagarwirwe obulemu abantu baayo nubo abo abaihirwe omu mahanga, hati boona bali kurungi bagwagwaine.

⁹Oligenda omumaiso, nohiirra nkihuunga, olisisana nk'ekicu kiswekeriire ensi, iwe namahe gaawe, n'abantu baingi abali hamu na iwe, noosisana nk'ihunga olisisana ekicu ekinyakubuutikiire ensi.

¹⁰“MUKAMA Ruhanga naagamba ati: Ha kiro eki, oliizirwa ebiteekerezo, kandi olitegeka kukora akabi

¹¹ogambe oti: Ka ngende ndamagire ensi eri enyakwina embuga ezitazitiriirwe; ngwere abantu bali abaculiire kandi abagwagwaine, boona abarukuraara nambere hatazitiriirwe, abataina bihongozo n'amalembo;

¹²nyage eminyago, ntwale eminyago; nseesire ebiikaro, ira ebyabaga matongo, hati ebinyakurumu abantu, nseesire n'abantu abaasoroziibwe omu mahanga, abanyakwina ente n'ebintu, abanyakuli hagati y'ensi yoona.

¹³Abantu aba Seeba na Dedani, n'abasuubuzi aba Tarasiisi n'embuga zaayo balikukaguza bati: Oizire kunyaga eminyago? Osoroize amahe gawe kutwara eminyago, efeeza n'ezaabbu, ente n'ebintu, kutwara omunyago ogu gwona?”

¹⁴“Habweki mwana w'omuntu, rangira Googi omugambire oti, MUKAMA Ruhanga naagamba ati: Ha Kiro kiri, abantu bange obu baligwagwana oliimukya

¹⁵oruge omubicweka eby'ensi ebya hara muno iwe n'abantu abaingi ab'oliba oinabo, boona batembere embaraasi, ihe erikooto, ihe ery'amaani;

¹⁶oliija kurwanisa abantu bange Abaisirairi noosisana ekicu ekinyakubutikiire ensi. Omubiro ebirukwija ndikwohereza orwanise ensi yange, nukwo obu ndimara kukwekoonyeza, iwe Googi okwoleka amahanga nkooku ndi muhikiriire obu nubwo galimmanya.

¹⁷“MUKAMA Ruhanga naagamba ati: nuwe ogu, ou nabalizeeho ira, ningambira omu baheereza bange abarangi ba Isirairi, omubiro ebi, abaamazire emyaka nibaranga ngu, ndikwohereza obarwanise?

¹⁸Baitu MUKAMA Ruhanga naagamba ati: Ha kiro eki, Googi eky'aliiziraho kurwanisa ensi yange Isirairi, ndibiihirwa muno.

¹⁹Kinu ninkigamba nyina ihali n'ekiniga kingi. Ha Kiro eki, ensi eya Isirairi eribamu omusisa ogutagambwa;

²⁰encu ez'omu nyanja, enyonyi ez'omu mwanya, enyamaiswa ez'omu kisaka, ebintu byona ebinyakwekurra, ebinyakwekururra haitaka, n'abantu boona abanyakuli omunsi, ebi byona obu birimbona, birikankana, ensozi zirigwa, ebiinongoro birikoonoka, ebisiika byona biryerunda hansi.

²¹MUKAMA Ruhanga nagaamba ati: Ebintu byona ebinyakutiinisa, ndibisoroolerezaaho Googi, buli muntu alikwata empirima arwanise owanyina.

²²Ndimucwera omusango, nimuleetera kagingo, ninseesa esagama ndimuteeza enjura nyingi, hamu n'orubaale n'amahe ge, n'abantu boona abanyakuli nawe, ndimunagaho omurro n'ekibiriiti.

²³Nukwo ndyeyoleka nti amahanga nkooku ndi mukuru kandi nkooku ndi Arukwera obu, abantu nubwo balimanya nkooku ndi MUKAMA.