Read Runyoro - rutooro Ezek 39 Bible Online

Ezek 39 - Runyoro - rutooro bible

Ezek 39

¹“Wewe mwana w'omuntu, orange ebiribaho Googi noogamba oti, MUKAMA Ruhanga naagamba ati: Iwe Googi omulemi mukuru wa Roosi Meseki na Tubbali, ndi munyanzigwa wawe;

²ninyija kukukubuutura, nkutwale omumaiso, nkwihe omu bicweka by'ensi ebya hara muno ebya ha bukiizi obw'obumoso, nkwebembere nkutwale hansozi za Isirairi;

³hanyuma nteere obuta bwawe buruge omumukono gwawe ogw'emoso bugwe, emyambi yawe eruge omumukono gwawe ogw'obulyo, nayo egwe.

⁴Iwe, amahe gawe goona n'abantu boona abaliba hamu na iwe, mulifa mugwe hansozi eza Isirairi; ndikuhiira amanyonyi aga buli mulingo gakusome, n'enyamaiswa ikujunjubule.

⁵MUKAMA Ruhanga naagamba ati: Oligwa omu bwerre; habwokuba, ninyowe nkigambire.

⁶Ndiragira omurro gwokye Magoogi n'abo abali kurungi omu mazinga; obu abantu nubwo balimanya nkooku ndi MUKAMA.

⁷“Nditaho amaani, abantu bange Abaisirairi, bamanye ibara lyange erirukwera; kandi tindiikiriza lyongere kujumwa, obu, amahanga nubwo galimanya nkooku ndi MUKAMA, Ogu Arukwera owa Isirairi.

⁸MUKAMA Ruhanga naagamba ati: Ebi byona birihikirra. Kinu nikyo ekiro eki narangire.

⁹“Abo abanyakwikara omumbuga za Isirairi nubwo balituruka, basorooze eby'okurwanisa ebinyakunagirwe, nibyo bafoole nku. Nibyo binu: engabu enkooto n'entoito, obuta n'emyambi, ebibango n'amacumu, ebi nibyo baraahembesaaga omurro, okumara emyaka musanju;

¹⁰nubwo batalyetaaga kusenya enku omukisaka, rundi kutema emiti ey'omu kibira, habwokuba omurro baraaguhembesaaga ebyokurwanisa; MUKAMA Ruhanga naagamba ati: Balinyaga abo abaabanyagire, kandi balyaya abo abaabaayire.

¹¹“Ha kiro eki, nubwo ndiha Googi ekiikaro eky'okuziikwamu omu Isirairi, nikyo ekihanga eky'abahinguzi ha Burugaizooba bw'enyanja; abahinguzi obu baraahikaga ha kihanga eki bagaruke enyuma habwokuba omu, Googi n'abantu be boona nuho baliziikwa; ekihanga eki, kiraayetwaga ekihanga kya Hamona-Googi, nukwo kugamba ngu: Akanyanya k'abantu aba Googi.

¹²Abaisirairi, balimara ameezi musanju okuziika emitumbi yoona, nukwo basemeze ensi.

¹³MUKAMA naagamba ati: Abantu boona ab'omunsi balikoonyera Abaisirairi kuziika abantu abo, kandi ha kiro eki ndyolekeraho ekitiinisa kyange, eki kiribarugiramu ekitiinisa.

¹⁴Obu halihinguraho ameezi musanju, halikomwa abantu barabangane omunsi, bazoole emitumbi etakaziikirwe bagiziike, ensi nukwo esemere.

¹⁵Abantu abo obu baraabaga nibarabanganamu hakabaho ayabona igufa ly'omuntu, alitehoga emanyiikirizo abaziiki nukwo baije baliziike omu kihanga ekya Hamona-Googi.

¹⁶(Orubuga oru, rurukwe ibara Hamona). Ensi nukwo baligisemeza bati.

¹⁷“MUKAMA Ruhanga naagamba ati: Wewe mwana w'omuntu, gambira enyonyi zoona n'enyamaiswa zoona ez'omu kisaka oti: musorrokane, muruge hoona hoona, mwije ha bugenyi obw'ekyonzira obu ndukubateekaniriza, mwije ha bugenyi obw'ekitiinisa obunyakuli hansozi za Isirairi, nimwija kulya enyama, munywe n'esagama.

¹⁸Nimwija kulya enyama ey'ab'obusobozi, munywe n'esagama ey'abalemi ab'ensi, boona nibaija kwitwa nk'ebyana by'entaama, nk'embuzi emburabuzi rundi enimi endaawa eza Basani.

¹⁹Ha bugenyi obundukubateekaniriza nimwija kulya ebisajwa okuhika obu murakaiguta, munywe esagama, okuhika obu murakatamiira.

²⁰MUKAMA naagamba ati: Ha meeza yange, nimwija kulya embaraasi n'abatembi baazo, mulye abantu ab'obusobozi n'abaserikale abarwani aba buli mulingo.

²¹“Nukwo ndyoleka nti, amahanga ekitiinisa kyange, ngooleke nkooku nyekoonyeza obusobozi bwange, okuhikiriza eby'obulyo ebi mbancwiremu.

²²Okuruga obu enju ya Isirairi, nubwo erimanya nkooku ndi MUKAMA Ruhanga wayo.

²³Kandi amahanga nubwo galimanya enju ya Isirairi nkooku yanyagirwe. Habw'ebibi byabo, habwokuba, batabe beesigwa hali nyowe na nyowe nukwo kubaitira eriiso, nabalekera abazigu baabo, boona baabaisa ebitara.

²⁴Nkabakorra eki basemeriire, habw'obubi bwabo, na habw'ebibi byabo nabaitira eriiso.

²⁵“Nikyo MUKAMA Ruhanga arukugambira ati: Hati, ninyija kugarurra Yakobbo obusinge enju ya Isirairi yoona ngigirre embabazi.

²⁶Obu baligwagwana omunsi, hataroho n'omu arukubatiinisa,

²⁷obu ndimara kubagarra, nkabaiha omumahanga, nkabasorooza nkabaiha omunsi ey'abanyanzigwa baabo, ndibeekoonyeza okwoleka amahanga obuhikiriire bwange balyebwa ensoni zaabo, na byona ebi baangobiize.

²⁸Obu, nubwo balimanya nkooku ndi MUKAMA Ruhanga wabo, habwokuba nkabaleka baazaahisibwa omumahanga, hanyuma nabasorooza, nabagarra omunsi yabo yonyini, tindireka n'omu omuli bo kugaruka kwikara omumahanga.

²⁹MUKAMA Ruhanga naagamba ati: Obu ndiseesira Mwoyo wange enju ya Isirairi, tindigaruka kubaitira eriiso.”