Read Runyoro - rutooro Ezek 4 Bible Online

Ezek 4 - Runyoro - rutooro bible

Ezek 4

¹“Ruhanga akagamba ati: Iwe mwana w'omuntu, kwata itafaali olite omumaiso gawe, oliteereho ekisisani ky'orubuga; nurwo orubuga Yerusaalemu;

²okwoleka nkooku rwagosirwe, oteereho ebisisani eby'emikura, eby'ebisiika eby'itaka, eby'enkande, n'eby'ebikunya eby'okuteeza, okwehinguliriza orubuga.

³Kandi okwate esahaani ey'ekyoma, ogyemereze nk'ekisiika, ebe hagati yawe n'orubuga; orolerre orubuga oru, nirunyagwa kandi niiwe orukurunyaga. Ako, nuko akarorwaho akalimanyisa enju ya Isirairi.

⁴“Hanyuma, obyamire orubaju rwawe orw'emoso, nukwo nkuteho ekifubiro eky'enju ya Isirairi; ebiro byona ebi olimara orubyamiire, niiwe olyetweka ekifubiro kyabo.

⁵Habwokuba, ninyija kukucwera omuhendo ogw'ebiro, ebiro bikumi bisatu n'ekyenda, ebirukwingana nk'omuhendo ogw'emyaka ey'ekifubiro kyabo; ako, nuko akasumi akolimara noofubirwa habw'enju ya Isirairi.

⁶Kandi obwolimara ebiro ebi oligaruka obyame, baitu obu obyamire orw'obulyo, ofubirwe habw'enju ya Yuda; nkucweriire ebiro makumi ana, ekiro kimu, nikibalirwa omwaka gumu.

⁷Ohange amaiso Yerusaalemu orurukunyagwa, ogoroire omukono; orange ebirigwera orubuga oru.

⁸Ndikuboha n'emiguha, olemwe kwehindura kuruga ha rubaju rumu, okagaruka ha rundi, okuhika obwolimara ebiro ebyoligoteramu orubuga.

⁹Kandi okwate engano, sayiri, ebihimba, enkoole, oburo n'omugusa, obite omu kibindi kimu, obicumbemu omugaati. Omugaati ogu, nugwo olirya omu kasumi ak'ebiro ebikumi bisatu n'ekyenda, ebyolimara obyamiire orubaju rwawe orw'emoso.

¹⁰Ebyokulya ebyoraalyaga, nibiijaga kulengwa, buli kiro sekeeri makumi abiri; buli kiro oralyaaga omurundi gumu.

¹¹Amaizi oranywaaga nago garaalengwaga oraganywaga, buli kiro omurundi gumu.

¹²Ebyokulya ebi, obiryege nka keeki eya sayiri, enyakucumbiirwe nambere abantu barukukurora, kandi enyakucumbirwe nokozesa amazi g'abantu nkenku.”

¹³MUKAMA akagamba ati: “Abaisirairi, nukwo balirya bati, omugaati gwabo ogurukuzirwa omu mahanga hoona nambere ndikababingira.”

¹⁴Nubwo nagambire nti: “Ai MUKAMA Ruhanga! Tinkeesiisaga; okuruga omu buto bwange n'okuhika hati, tinkalyaaga ekyefeera rundi ekiisirwe enyamaiswa, kandi enyama erukuzirwa tinkagitaga omukanwa kange.”

¹⁵Hanyuma Ruhanga akangambira ati: “Nkwikiriize, oyekoonyeze obusa bw'ente, omu kiikaro ky'amazi g'abantu, nubwo ocumbiseege ebyokulya byawe.”

¹⁶Kandi akongera yangamba ati: “Iwe mwana w'omuntu, ninyija kukeehya ebyokulya ebiriibwa abantu ba Yerusaalemu, baraalyaga ebyokulya ebirengerwe kandi baraabiryaga nibatiina; baraanywaga amaizi, nago agalengerwe, kandi baraaganywaga baina enkizi.

¹⁷Eki, ninyija kukikora, nukwo bahwerwe ebyokulya n'amaizi, batandike kurorangana baina enkizi, ekifubiro kyabo kibaanule.