Read Runyoro - rutooro Ezek 40 Bible Online

Ezek 40 - Runyoro - rutooro bible

Ezek 40

¹Omumwaka ogw'amakumi abiri n'etaano ogw'okuzaahisibwa kwaitu, omwaka obu gukaba nigukyatandika, ha kiro kya ikumi eky'okwezi, omu mwaka ogwa ikumi n'ena orubuga rumazire kukwatwa ha kiro eki kyonyini,

²MUKAMA akaankwata yantwara omunsi ya Isirairi anyoleke ebya Ruhanga, yanta ha rusozi oruraihire muno orukaba ruroho ekintu ekirukusisana ekyombeko ky'orubuga, orukaba rundi omumaiso.

³Obu yampikizeeyo, nkabona omusaija ow'akaba naasisana anyakukozirwe omu mulinga, akwasire omu ngaro omuguha ogw'obugoigo, n'orubingo orw'okulengesa; akaba ayemeriire omu irembo.

⁴Omusaija ogu yangambira ati: “Wewe mwana w'omuntu, ofundule amaiso, otege amatu kandi, ote omutima ha buli kintu kyona eki ndaakwoleka, habwokuba eki, nikyo waleetirwe hanu, nukwo mbikwoleke; byona ebi oraarora, obigambire enju ya Isirairi.”

⁵Eki narozire, niyo Enju ya MUKAMA, ekaba ezitiriirweho eyehinguliriziibwe ekisiika, kandi omusaija ogu, akaba akwasire orubingo orw'okulengesa, orukaba niruhikya mita isatu. Yalenga ekisiika ekibaba nikihikya mita isatu oburaiha na mita isatu omukoba.

⁶Hanyuma yagenda ha irembo eriroleriire Burugaizooba yatemba amatembero gaalyo, yalenga ekiti ky'omulyango eky'irembo, oburaiha bwakyo obwa hansi, bwaba rubingo rumu,

⁷ebisiika ebya hambaju obura orubingo rumu kandi orubingo rumu obugazi; omwanya ogwa hagati y'ebisiika ebya hambaju, mita ibiri n'ekicweka; kandi ekiti ky'omulyango ekya hairembo ekikaba kiri, hansi nambere kirukugarukira, orubingo rumu.

⁸Hanyuma yalenga ekisiika eky'irembo, kyahika mita munana;

⁹kandi emikumirro yakyo, mita emu; ekisiika eky'irembo, kikaba omunda, irembo nambere lirukugarukira.

¹⁰Kandi ha rubaju n'orubaju orw'irembo erya Burugaizooba, hakaba haroho ebisiika ebya ha rubaju bisatu; ebisiika ebi ebisatu, bikaba nibingana.

¹¹Hanyuma yalenga obugazi obw'omulyango ogw'irembo yaba mita mukaga n'ekicweka; kandi obw'irembo mita itano.

¹²Omumaiso ag'ebisiika ez'ebisiika ebya ha rubaju, hambaju zombi, hakaba haroho ekisiika, ekirukuhika centimita makumi atano habuli rubaju. Kandi ebya hambaju, byahikyaga mita isatu orubaju n'orubaju.

¹³Hanyuma, yalenga irembo, okutandikira enyuma y'ekisiika ekimu ekya ha rubaju okugarukira enyuma ey'ekisiika ekindi, omwanya ogwamita makumi abiri n'ekicweka, okuruga harwigi orumu okuhika ha rundi.

¹⁴Yalenga n'omulyango, gwahika mita ikumi; kandi enyuma y'omulyango ogw'irembo eri, nuho hakaba hali ezigati

¹⁵Okuruga omumaiso g'irembo erya ha mulyango, okuhika ha kisiika eky'omunda eky'irembo, hakaba nihahika mita abiri na itano.

¹⁶Kandi irembo likaba lyehinguliriziibwe amadirisa agafunzire omunda, nigataaha omu mikumirro yago, omu bisiika ebya harubaja, ekisasi nakyo, kikaba kiina amadirisa omunda agakyehinguliriize, kandi ha mikumirro, hakaba haroho emikindo.

¹⁷Hanyuma yantwara omuzigati ey'aheeru; hakaba haroho ebisiika amakumi asatu ebikaba byombekerwe haihi n'ekisiika eky'aheeru, kandi omumaiso g'ebisiika ebi, hakaba haroho ekiikaro ekinyakwalirirwe n'amabaale, kigalihire, kimazireyo ezigati.

¹⁸Ekiikaro eki ekikaba kyalirirwe, kikagenda ha rubaju rw'amalembo, kyainganaingana n'obura bwago; eki nikyo ekicweka ha nsi ekyayaliirwe.

¹⁹Hanyuma yalenga omwanya okuruga ha kicweka eky'omumaiso eky'omunda, okugarukira ha ky'omumaiso eky'aheeru eky'ezigati ey'omunda, mita makumi atano. Hanyuma yanyebembera, yatoma ha bukiizi obw'emoso,

²⁰oku hakaba haliyo irembo ery'ezigati, ey'aheeru, erikaba liroleriire habukiizi obw'emoso. Yalenga obura n'obugazi bwalyo.

²¹Ebisiika byalyo ebya ha rubaju, orubaju n'orubaju emikumirro n'ekisasi bikaba nibingana na biri eby'irembo ery'okubanza; obura bwalyo mita abiri na itano kandi obugazi ikumi na ibiri.

²²Amadirisa gaalyo, ekisasi kyalyo, n'emikindo yalyo, bikaba nibingana na biri eby'irembo eryarolerraga Burugaizooba; hakaba haroho amatembero musanju, agaatwaraga ha irembo eri; kandi ekisasi kikaba kiri ha rubaju orw'omunda.

²³Omumaiso g'irembo erya ha bukiizi obw'emoso, nka Burugaizooba, hakaba haliyo irembo erirukutwara omu zigati ey'omunda; yalenga omwanya oguli hagati y'irembo okuhika ha lindi, gwahika mita makumi atano.

²⁴Kandi yantwara ha bukiizi obw'obulyo, hakaba haliyo irembo; yalenga emikumirro n'ekisasi kyalyo; byainganaingana nk'eby'amalembo agandi.

²⁵Hakaba haroho amadirisa ag'ehinguliriize irembo eri n'ekisasi kyalyo, ebirukusisana amadirisa ag'amalembo agandi; obura bwalyo mita abiri na itano, obugazi mita ikumi na ibiri n'ekicweka.

²⁶Hakaba haroho amatembero musanju agarukutwara hairembo eri, kandi omukumiirro gwalyo, gukaba guli harubaju orw'omunda; ha mikumirro yalyo, hakaba haroho emikindo, omukindo gumu orubaju n'orubaju.

²⁷Kandi ha bukiizi obw'obulyo obw'ezigati ey'omunda naho hakaba haliyo irembo; yalenga omwanya okuruga hairembo erimu okuhika ha lindi, yahika mita makumi atano.

²⁸Hanyuma yantwara omuzigati ey'omunda, haihi n'irembo erya ha bukiizi obw'obulyo, yalenga irembo eri; lyainganaingana n'agandi.

²⁹Ebisiika byalyo ebya harubaju, emikumirro, n'ekisasi kyalyo bikainganaingana nk'eby'amalembo agandi; kandi hakaba haroho amadirisa agalyehinguliriize, n'agali omukisasi kyalyo; obura bwalyo bwahikyaga mita abiri na itano, obugazi, ikumi na ibiri n'ekicweka.

³⁰Hakaba haroho ebisasi ebiryehinguliriize, obura bwabyo mita abiri na itano, obugazi ikumi na ibiri n'ekicweka.

³¹Ekisasi kyalyo kikaba kiroleriire ezigati ey'aheeru, emikumirro yalyo, ekaba eroho emikindo, omuhanda ogwatwarayoga, gukaba guroho amatembero munaana.

³²Hanyuma yantwara omu zigati ey'omunda eya ha rubaju orwa Buruga izooba, yalenga irembo eri; likainganaingana amalembo agandi.

³³Ebisiika byalyo ebya harubaju, emikumiirro n'ekisasi, bikainganaingana n'eby'amalembo agandi; kandi hakaba haroho amadirisa agalyehinguliriize, n'agandi gali omu kisasi kyalyo; obura bwalyo bwahikaga mita abiri na itano, obugazi, ikumi na ibiri n'ekicweka.

³⁴Ekisasi kyalyo kikaba kiroleriire ezigati ey'aheeru, kiina emikindo ha mikumirro yakyo, omukindo gumu orubaju n'orubaju, omuhanda ogwatwarayoga, gukaba guroho amatembero munaana.

³⁵Hanyuma akantwara hairembo erya ha bukiizi obw'emoso, yalirenga, likainganaingana n'agandi.

³⁶Ebisiika byalyo ebya harubaju, emikumirro n'ekisasi kyalyo, bikainganaingana n'amadirisa, emikumirro, ebisasi ebyamalembo agandi; likaba lyehinguliriziibwe amadirisa; obura bwalyo mita abiri na itano, obugazi ikumi na ibiri n'ekicweka.

³⁷Ekisasi kyalyo kikaba kiroleriire ezigati ey'aheeru, liroho emikindo ha mikumirro yalyo n'orubaju; omuhanda ogwatwarayoga, gukaba guroho amatembero munaana.

³⁸Hakaba haroho ekisiika, kiina orwigi rurorraine n'omukumirro gw'irembo, eki nikyo kyayogezebwamuga ekihongwa eky'okwokya.

³⁹Kandi omu kisasi eky'irembo hakaba haroho emeeza ibiri orubaju n'orubaju, ezaitirwahoga ekihongwa; eky'okwokya, eky'okuganyiza ebibi, n'eky'okuganyiza omusango.

⁴⁰Aheeru y'ekisasi, ha mulyango ogw'irembo erya ha mukono ogw'obumoso, hakaba haroho emeeza ibiri; ha rubaju orundi orw'ekisasi, naho hakaba haroho emeeza ibiri.

⁴¹Emeeza ina zikaba ziri ha rubaju orw'omunda, kandi ina zindi, zikaba ziri ha rubaju orw'aheeru orw'orubaju orw'irembo, emeeza munaana zikaba ziri z'okusarraho ebyonzira.

⁴²Hakaba haroho n'emeeza ina ezindi, ezibaizirwe omu mabaale ez'ekihongwa eky'okwokya, obura bwazo centimita makumi atano, obugazi omukono gumu, obwemi centimita nsanju na itano, ezi nizo zaateebwahoga ebintu eby'okwisa ebihongwa eby'okwokya, n'ebyonzira.

⁴³Omunda hakahanikwamu ebikwaso ebirukwingana mirimita nsanju na itano emeeza ezi, nizo zaateebwahoga enyama ey'ekihongwa.

⁴⁴Hanyuma yanyiha aheeru, yantahya omu zigati ey'omunda, oku omu zigati ey'omunda, hakaba haliyo ebisiika bibiri, ekimu kiri ha rubaju orw'obukiizi obw'emoso obw'irembo, kiroleriire obukiizi obw'obulyo, ekindi ha rubaju orw'obulyo, kiroleriire obukiizi obw'emoso.

⁴⁵Yangambira ati: Ekisiika kinu ekinyakuroleriire ha bukiiza obw'obulyo, nikyo ekya banyakatagara abanyakurolerra Enju ya Ruhanga,

⁴⁶kandi ekinyakuroleriire ha bukiizi bw'emoso, eki kya banyakatagara abanyakurolerra itambiro; abo nubo batabani ba Zadooki, ogu wenka omu batabani ba Levi nuwe arukwikirizibwa kwirra haihi MUKAMA, n'okumuheereza.

⁴⁷Yalenga ezigati, obura bwayo mita makumi atano, obugazi makumi atano yainganaingana ha mbaju ina; kandi itambiro likaba liri omumaiso g'enju ya Ruhanga.

⁴⁸Hanyuma yandeeta omukisasi ky'Enju ya Ruhanga, yalenga emikumirro na kyo kyonyini, kyahikya mita ibiri n'ekicweka orubaju n'orubaju; kandi obugazi bw'irembo, bukahikya mita musanju, ebisiika eby'irembo ebya ha rubaju, bikahikya mita emu n'ekicweka orubaju n'orubaju.

⁴⁹Obura obw'ekisasi bukahika mita ikumi, obugazi mita mukaga; amatembero agatwarayoga, gakaba gali ikumi; kandi ha mikumirro orubaju n'orubaju, hakaba haroho enyomyo.