Read Runyoro - rutooro Ezek 42 Bible Online

Ezek 42 - Runyoro - rutooro bible

Ezek 42

¹Hanyuma yantwara omuzigati ey'omunda enyakuroleriire ha bukiizi obw'emoso, yampikya ha bisiika ebikaba biri omumaiso g'Enju ya Ruhanga, ha bukiizi obw'emoso.

²Oburaiha obw'ekyombeko ekikaba kiri ha bukiizi obw'emoso, bukahika mita makumi ataano, kandi obugazi makumi abiri na itano.

³Omu kainaasatu, hakaba haliyo orubaraza orukaba ruli omumaiso g'orubaraza, orwateeranizaaga mita ikumi ey'ezigati ey'omunda, kandi orwarolerraga ekicweka ekikaba kyalirirwe amabaale.

⁴Omumaiso g'ebisiika omunda hakaba haroho omuhanda ogurukuhikya obugazi mita itaano obura obwamita makumi ataano, kandi enyigi z'ebisiika ebi, zikaba ziroleriire habukiizi obw'emoso.

⁵Ebisiika ebya haiguru, bikaba biri bifunda okukiraho habwokuba ebbaraza ekabiihaho omwanya mukooto okukira ogu zaihireho ebya hansi n'ebya hagati.

⁶Habwokuba bikaba biri omu kainaasatu, kandi bikaba bitaina nyomyo ezirukusisana ez'ezigati ey'aheeru; nikyo byafundiire okukira ebyahansi eby'okubanza, n'ebya hagati, ebinyakuli hansi y'ebi,

⁷Kandi aheeru, hakaba haliyo ekisiika, ekikaba kiri ha rubaju rumu n'ebisiika, ebya ha bukiizi obw'ezigati ey'aheeru, omumaiso g'ebisiika, ekirukuhika mita abiri naitaano.

⁸Ebisiika ebya ha zigati ey'aheeru, bikaba nibihikya mita abiri na itaano, kandi ebi eby'omumaiso g'Enju ya Ruhanga, bikaba nibihikya kikumi.

⁹Hansi y'ebisiika ebi ha rubaju orwa Burugaizooba, omuntu nambere araba kutaaha, naaruga omu zigati ey'aheeru.

¹⁰Ekisiika eky'aheeru ha kitandikira, hakaba haliyo omulyango. Ha bukiizi obw'obulyo, omumaiso g'ezigati n'agenju, naho hakaba haroho ebisiika,

¹¹omumaiso gaabyo, haroho orukuubo; bikaba nibisisana ebya ha bukiizi obw'emoso, nibingana obura n'obugazi, biina emiryango erukusisana, bitegekerwe omu mulingo gumu, kandi biina enyigi zimu.

¹²Hansi y'ebisiika, ebya ha bukiizi obw'obulyo, ha rubaju omu kikuubo hakaba haroho omulyango, kandi omumaiso gaabyo, hakaba haroho ekisiika ekirukubaganiza.

¹³Aho yangambira ati: “Ebisiika ebya ha bukiizi obw'emoso n'ebya ha bw'obulyo, omumaiso g'ezigati, nibyo ebisiika ebirukwera, banyakatagara abanyakwirra haihi MUKAMA nambere baraaliiraga ebihongwa ebirukwera muno; oku nuho batege ebihongwa ebirukukirra kimu kwera, ekihongwa eky'ebyokulya, eky'okuganyiza ebibi, n'eky'okwihisaaho omuntu omusango, habwokuba ekiikaro eki, kiikaro ekirukwera.

¹⁴Baanyakatagara obu baraataahaga omu kiikaro ekirukwera, batalituruka bakagenda omu zigati ey'aheeru, bakyaina eby'okujwara ebi bakorramu omulimo ogw'obunyakatagara. Habwokuba ebyokujwara ebi, by'okujwara birukwera, batakagenzire omukiikaro ekyesorolezibwamu abantu; abantu nambere beesorooleza bajwalege ebyokujwara ebindi.”

¹⁵Obu yamazire kulenga omunda omwanya ogw'omunda ogw'Enju ya Ruhanga, yanturukya, nandabya omwirembo eriroleriire Buturukaizooba, yalenga omwanya ogw'Enju ya Ruhanga, okugyehinguliriza.

¹⁶Obukiizi obwa Burugaizooba, akabulengesa orubingo orunyakulenga, rwahikya mita bibiri n'ataano.

¹⁷Hanyuma yakubuutuka, yalenga ha bukiizi obw'emoso, naho haahika mita bibiri n'ataano.

¹⁸Hanyuma yakubuutuka, yalenga ha bukiizi obw'obulyo, naalengesa orubingo orunyakulenga, haahika mita bibiri n'ataano.

¹⁹Yakubutuka ha rwa Bugwaizooba, naho yalengayo, haahika mita bibiri n'ataano.

²⁰Akagirenga ha mbaju zaayo ina. Ekaba ina ekisiika ekigyehinguliriize, eky'obura bwa mita bibiri n'ataano, obugazi nayo mita bibiri n'ataano, eki, nukwo kibaganize ekiikaro ekirukwera, n'eky'abantu boona.