Read Runyoro - rutooro Ezek 44 Bible Online

Ezek 44 - Runyoro - rutooro bible

Ezek 44

¹Hanyuma yangarra ha irembo ly'aheeru ly'ekiikaro ekirukwera eriroleriire Burugaizooba; likaba likingire.

²Yangambira ati: “Irembo linu liikaleege likingire; litalikingurwa; kandi hatalibaho omuntu n'omu alirabamu; habwokuba likarabwamu MUKAMA Ruhanga owa Isirairi, habweki, liikalege likingire.

³Omubiito wenka aliikarremuga, aliire omugaati omu maiso ga MUKAMA, obu araabaga naataha, atwarwege omuhanda ogwaha kisasi eky'irembo kandi nugwo gumuturukyege.”

⁴Hanyuma, yandabya omuhanda ogw'irembo erya Burugaizooba yantwara omumaiso ag'Enju ya MUKAMA; namagamaga, narora Enju ya MUKAMA ijwire ekitiinisa; kye nukwo kugwa njuumaire.

⁵MUKAMA yangambira ati: “Wewe mwana w'omuntu, oyetegereze ofundule amaiso, otege amatu, ohurre kurungi byona ebi ndaakugambira ebirukukwata ha bigambo naha biragiro eby'enju ya Ruhanga; kandi oyetegereze abantu abasemeriire kwikirizibwa kugitaaha, n'abo abatarukwikirizibwa.

⁶Kandi ogambire ab'enju ya Isirairi enyereme oti, MUKAMA Ruhanga naagamba ati: Iwe nju ya Isirairi mufuuhye ebintu ebibi byona ebi mutaaha nimukora,

⁷noikiriza abanyamahanga, abatasazirwe omu mutima n'omu mubiri okutaaha omu kiikaro kyange ekirukwera, obu muba nimumpongera ebyokulya, ebisajwa n'esagama, bakakisiisa. Ha bintu ebibi ebi mukora, mwongiireho n'okucwa endagaano yange.

⁸Ebintu byange ebirukwera, mutabirolerre; baitu mukataho abanyamahanga nubo babirolerre omu kiikaro kyange ekirukwera.

⁹“Nikyo MUKAMA Ruhanga arukugambira ati: Hatalibaho omunyaihanga n'omu atasazirwe omu mutima n'omu mubiri, ha banyamahanga boona abanyakuli omu bantu ba Isirairi, alitaaha omu kiikaro kyange ekirukwera.

¹⁰MUKAMA akangambira ati: Abaleevi abo abandugireho hamu n'abantu ba Isirairi abandi, baaramya ebisisani, ninyija kubafubira.

¹¹Nubo baliba baheereza omukiikaro kyange ekirukwera, barolerre amalembo ag'Enju yange kandi nibagiheerezaamu; nubo baitege ebisoro eby'ebihongwa eby'okwokya n'eby'okusaba obusinge, n'eby'ebyonzira, kandi baikalege haihi n'abantu, nukwo babaheereze.

¹²MUKAMA Ruhanga naagamba ati: Habwokuba bakabaheereza omu maiso g'ebisisani byabo, baaleetereza enju ya Isirairi okugwa omu bubi mbarahiriire, tibaligurukwa kifubiro.

¹³Batalinyirra haihi kumpeereza nibakora omulimo ogw'obunyakatagara, rundi kwirra haihi ebimu ha bintu byange ebirukwera, rundi ebintu ebindi byona ebirukwera. Batalimpeereza nibakora omulimo ogw'obunyakatagara, rundi kwirra haihi ekintu kyange ekirukwera, rundi kutaaha omu kiikaro kyange Ekirukwera mali eki nikyo ekifubiro eky'ebintu ebibi ebi baakozire.

¹⁴Baitu nabwo ndibakoma barolerrege Enju ya Ruhanga, bakolege, baheerezeege kandi bakolege buli mulimo gwona ogurukwetagwa kukorwamu. Bakolege kyona ekirukwetaagwa kukorwa.

¹⁵“MUKAMA Ruhanga naagamba ati: Baitu Baanyakatagara, abo ab'oruganda rwa Leevi, baijukuru ba Zadooki, abantu ba Isirairi abandi obu bandugireho bbo bakongera kumpeereza n'obwesige omunju ya Ruhanga. Habweki, hati nubo basemeriire kumpeereza, kwija omumaiso gange, bampongere ebisajwa n'esagama y'ebyonzira;

¹⁶nubo bataahe omu kiikaro kyange ekirukwera, bairre haihi emeeza yange, bampeereze kandi barolerre ebintu byange.

¹⁷Obu baraabaga nibataaha amalembo ag'ezigati ey'aheeru, bajwalege ebyokujwara obu baraabaga nibaheereza ha malembo ag'ezigati ey'omunda, n'omunda yayo, batalijwara ekintu na kimu eky'ebyoya by'entaama:

¹⁸Bajwalege ha mutwe ebitambaara ebya kitaani, omunda bajwalege empale, nazo za kitaani; batalyeteega ekintu ekinyakuleetereza kutuutuka.

¹⁹Kandi obu baraabaga nibagenda omu bantu, ha zigati ey'aheeru, bajuulege eby'okujwara ebi babaire nibaheererezaamu, babite omubisiika ebirukwera; bajwale ebyokujwara ebindi, bataliija kweza abantu n'ebijwaro biri ebirukwera ebyokujwara byabo ebirukwera bireke kukora abantu akabi.

²⁰Batalyemwa isoke kandi batalirikuza; kyonka baikalege nibalikehya.

²¹Nyakatagara obwaraabaga naataaha ezigati ey'omunda, atalinywa amarwa.

²²Bataliswera omufaakati, rundi omukazi anyakwahukaine naiba, baswerege omwisiki empikirre yonka kandi ow'orulyo rw'enju, eya Isirairi, rundi omufaakati ow'akaba ali muka nyakatagara ondi.

²³Beegese abantu bange enyahukana ey'ebintu ebirukwera n'ebya butoosa. Babaragiirre okwahurana ebirukuzira n'ebitarukuzira.

²⁴Obu haraabahoga empaka nubo baicwemuga, nibarorra ha ncwa yange. Bahikirizeege ebiragiro byange n'ebigambo byange omu magenyi gange goona agaatairweho, kandi basemezeege ekiro kyange ekya Sabbato.

²⁵Batalyesiisa nibakwata ha mutumbi; baitu kakuba guba gwaise rundi gwanyina, gw'omutabani rundi gw'omuhara, gw'omwojo owanyina rundi gwamunyanya ataswirwe, obu nibaikirizibwa kwesiisa.

²⁶Obu alimara kusiisikara, ayebarre (ebiro musanju) ebiro musanju obu birihwaho, buli takyazira.

²⁷MUKAMA Ruhanga naagamba ati: Ha kiro nyakatagara ogu ekyalitaahiraho omu kiikaro ekirukwera omu zigati ey'omunda kuheereza, ahonge ekihongwa kye eky'okwokya.

²⁸“Batalitunga obugwetwa: ninyowe bugwetwa bwabo. Kandi mutalibaha ituungo omu Isirairi, niyowe ituungo lyabo.

²⁹Ekihongwa eky'okuganyiza ebibi n'eky'okwihisaaho omusango, nibyo balyege; n'ebintu byona Abaisirairi ebi baraahongaga bibege byabo.

³⁰Emiganuro ey'okubanza ey'ebintu byona ebya buli mulingo, ebege ya banyakatagara, kandi mubahege ensaano yanyu ey'omuganuro, nukwo enju yanyu etuunge omugisa.

³¹Batalirya ekintu na kimu, ekinyonyi rundi ekisoro ekinyakwefeeriire rundi ekitaagwirwe.