Read Runyoro - rutooro Ezek 45 Bible Online

Ezek 45 - Runyoro - rutooro bible

Ezek 45

¹“Obu muliba nimugaba ensi, buli ruganda kuruha eyarwo, mwihireho MUKAMA ekicweka ky'ensi eky'obura bwa kilomita ikumi na ibiri n'ekicweka, kandi obugazi kilomita ikumi, ebege isaza erirukwera, yoona ebe nsi erukwera.

²Ha kicweka eki, habeho ekibanja ekirukwinganaingana ha mbaju ina, mita bikumi bibiri n'ataano obura n'obugazi, nikyo kibe kiikaro ekirukwera, hasigaleho omwanya gwa mita abiri na itaano okukyehinguliriza.

³Omwisaza erirukwera olengemu ekicweka ekirukuhikya obura bwa kilomita ikumi na ibiri n'ekicweka, obugazi kilomita itaano, omu kicweka eki, nuho haliba ekiikaro ekirukwera, ekiikaro ekirukwera mali.

⁴Nikyo kiraaba kiikaro ky'ensi ekirukwera; kiraaba kya banyakatagara abanyakuheereza omu kiikaro ekirukwera kandi abanyakwirra haihi MUKAMA kumuheereza. Nikyo kiribamu amaju gaabo, n'ekicweka ky'itaka eky'Enju ya Ruhanga.

⁵Ekicweka ekindi ekirukuhikya emikono emitwaro ebiri n'enkumi itaano, emikono omutwaro gumu obugazi, eki kibe ky'Abaleevi abanyakuheereza omunju ya Ruhanga, gube mugabo gwabo, nambere haliba embuga zaabo ez'okuraaramu.

⁶“Ha rubaju rw'ekicweka eki ekikomerwe kuba isaza erirukwera, mwiheho ekicweka eky'obura bwa kilomita ikumi na ibiri n'ekicweeka obugazi bwa kilomita ibiri n'ekicweka, gube mwanya gw'enju yoona eya Isirairi.

⁷“Ensi enyakuli hambaju zombi ez'isaza erirukwera, n'ebintu eby'orubuga, ha bukiizi obwa Bugwaizooba na Burugaizooba, eyerukwingana ogumu ha migabo ey'oruganda rwa Isirairi enyakugalihire okuruga ha mutaano ogwa Bugwaizooba okuhika ha gwa Burugaizooba, eriba y'omulemi.

⁸Eri niryo libe ituungo lye omu Isirairi. Kandi abalemi bange tibaligaruka kukora kubi abantu bange; baliikiriza ab'enju ya Isirairi batunge ensi, nkooku bali omu nganda zaabo.

⁹“Mukama Ruhanga naagamba ati: Inywe abalemi ba Isirairi, musiisire okumara omwanya mukooto muno. Mufuuhye obuhoogozi bwanyu n'okukora kubi abantu. Mukole ebihikire kandi eby'obwinganiza. Mutaligaruka kubinga abantu bange omunsi yabo. Nyowe MUKAMA eki ninyowe nkibagambiire.

¹⁰Buli muntu, kimuhikiriire kwekoonyeza amabaale na minzaani ey'amazima.

¹¹Efa y'ebintu ebyomere erainganaga bbafu habw'ebintu by'amaizi, bbafu eraabaga kimu kyaikumi kya Hooma [1] na Efa kimu kyaikumi kya hooma nurwo rube rulengo orw'okukuraatirwa.

¹²Sekeri [2] ehikyege geera amakumi abiri; sekeri itaano zibekwo itaano, sekeri ikumi zibekwo ikumi, kandi miina yanyu emu, ehikyege sekeri amakumi ataano.

¹³“Kinu nikyo kihongwa eki muraahongaga: Kimu kya mukaaga ky'efa, mukiihege ha buli hooma ey'engano, na kimu kya mukaaga eky'efa, kiruge ha Hooma ya sairi,

¹⁴na kimu kyaikumi kya bbafu, ekirugire ha koora, ogu nugwo omugabo gw'amagita ogwagumiibwe (koora, ingana na Hooma, erumu bbafu ikumi);

¹⁵n'entaama emu, eruge omu buli igana ery'entaama ebikumi bibiri, omu nganda za Isirairi. MUKAMA naagamba ati: Eki, nikyo kibege kihongwa eky'ebyokulya, ebihongwa eby'okwokya, n'eby'okusaba obusinge, nukwo baganyirwe.

¹⁶Abantu boona ab'omunsi, bakihege omulemi wa Isirairi.

¹⁷Gubege mulimo gw'omulemi kuzoora ebisoro eby'ekihongwa eky'okwokya, ebihongwa eby'ebyokulya n'eby'okunywa, okwezi kukyali mboneko, ha Sabbato, ha magenyi amakuru goona ag'enju ya Isirairi agaatairweho: nuwe aserrege ekihongwa eky'okuganyiza ebibi, ebihongwa eby'ebyokulya, ebihongwa eby'okwokya n'eby'okusaba obusinge, nukwo Abaisirairi baganyirwe ebibi byabo.

¹⁸“MUKAMA Ruhanga naagamba ati: Ha kiro eky'okubanza eky'okwezi okw'okubanza, otambege enimi ento etaina kamogo, nukwo oyeze ekiikaro ekirukwera.

¹⁹Nyakatagara, akwatege ha sagama ey'ekihongwa eky'okuganyiza ebibi, agisiige ha mikumirro ey'Enju ya Ruhanga, na ha burugu obbuna obw'obunyigita bw'itambiro na ha nyomyo ez'irembo ery'ezigati ey'aheeru,

²⁰Buli muntu weena atagenderiire rundi habw'obutamanya, ha kiro ekya musanju eky'okwezi, nukwo omukorrege oti; obu oraakora oti, Enju ya MUKAMA nubwo oraagiikaza neeyera.

²¹“Ha kiro ekya ikumi na bbina eby'okwezi okw'okubanza, musemezeege, ekiro kikuru eky'okwijuka Okuhingurwaho mumale ebiro musanju, nimulya emigaati etatumbisiibwe.

²²Ha kiro eki, omulemi aleete enimi ento, ey'ekihongwa eky'okuganyiza ebibi, habwe na habw'abantu ab'ensi.

²³Buli kiro, ha biro musanju ebi eby'obugenyi, aleetere MUKAMA enimi ento musanju, n'empaya z'entaama musanju ezitaina kamogo, zibe kihongwa eky'okwokya, buli, kiro ha biro ebi omusanju; n'empaya y'embuzi emburabuzi, ey'ekihongwa eky'okuganyiza ebibi.

²⁴Kandi aleete habw'ekihongwa eky'ebyokulya lita ikumi na musanju n'ekicweka habwa buli nimi lita ikumi na musanju n'ekicweka habwa buli mpaya y'entaama, na lita isatu z'amagita.

²⁵Ha kiro ekya ikumi na bitaano eby'okwezi kwa musanju, naha biro musanju eby'obugenyi, nabwo aleete ebintu nka biri ebi yaleesire okubanza, eby'ekihongwa eky'okuganyiza ebibi, ebihongwa eby'okwokya, eby'ebyokulya n'amagita.