Read Runyoro - rutooro Ezek 46 Bible Online

Ezek 46 - Runyoro - rutooro bible

Ezek 46

¹“MUKAMA Ruhanga naagamba ati: Irembo ery'ezigati ey'omunda erinyakuroleriire Burugaizooba, liikalege likingire, okumara ebiro mukaaga ebinyakukolerwaho emirimo; baitu hakiro ekya Sabbato na ha ky'emboneko y'okwezi,

²Omulemi, arabege omu kisasi eky'irembo ery'aheeru, nukwo ataahe, ayemerre haihi n'omukumirro gw'irembo, Baanyakatagara bahonge ekihongwa kye eky'okwokya n'ekyokusaba obusinge uwe aramize omu kisasi ky'irembo. Hanyuma aturuke, baitu irembo liikale likingire okuhika omu kairirizi.

³Ha Sabbato na ha mboneko y'okwezi, abantu ab'ensi baramizeege omumaiso ga MUKAMA ha mulyango gw'irembo eri.

⁴Ekihongwa eky'okwokya, omulemi eki araahongeraga MUKAMA, ibege ebyana by'entaama mukaaga, n'empaya y'entaama ebitaina kamogo;

⁵kandi ekihongwa eky'ebyokulya ekirukugenda hamu n'empaya y'entaama, habeho lita ikumi na musanju n'ekicweka ekirukugenda hamu n'ebyana by'entaama, aleete kingi muno nkooku asobora ha buli, lita ikumi na musanju ayongereho lita isatu emu ey'amagita.

⁶Ha kiro eky'okubanza, okwezi kukyali mboneko, ahongege enimi ento, ebyana by'entaama mukaaga n'empaya y'entaama ebitaina kamogo,

⁷kandi ekihongwa eky'ebyokulya, aleete efa ey'okugenda hamu n'enimi, n'empaya y'entaama; hamu n'ebyana by'entaama aleete nyingi muno nkooku arukusobora. Aleetereho na lita ikumi na musanju n'ekicweka zensaano z'amagita, agarukugendera ha buli kihongwa ky'ensaano.

⁸Omulemi obu araabaga naataaha, aleetwege ha kisasi ky'irembo, kandi nuho arabege naaturuka.

⁹“Abantu ab'ensi obu baraijaga kuramya amagenyi agaatairweho ogu arukuleetwa ha irembo erya habukiizi obw'emoso kuturuka arabe ha ly'obukiizi obw'obulyo; kandi ogu arukuleetwa ha irembo ery'obukiizi obw'obulyo, kuturuka, arabe ha ly'obukiizi obw'emoso; hatalibaho n'omu arukwikirizibwa kuturuka naaraba omu muhanda ogu arabiremu kutaaha, buli muntu atome ogw'irembo erinyakumuli omumaiso.

¹⁰Obu baraabaga nibataaha, omulemi ataahe nabo, obu baraabaga nibaturuka, aturukege nabo.

¹¹Ha biro bikuru n'omu kasumi ak'emyaka eyatairweho, ekihongwa eky'ebyokulya ekigendera hamu n'enimi ento, empaya y'entaama, kibege lita ikumi na musanju n'ekicweka kandi ekigendera hamu n'ebyana by'entaama, omuntu aleete endengo y'ensaano, nyingi muno nkooku arukusobora, ayongereho na hiihi emu z'amagita.

¹²Omulemi obu araagonzaaga kuleetera MUKAMA ekihongwa eky'okwegondeza, eky'okwokya rundi eky'okusaba obusinge, irembo erinyakuroleriire Burugaizooba limukingulirwege; ahonge ekihongwa kye eky'okwokya, rundi ebihongwa bye eby'okusaba obusinge nkooku akora ha kiro kya Sabbato. Hanyuma aturuke, amazire kuturuka, orwigi rugaruke rukingwe.

¹³“Buli kiro aleetege ekyana ky'entaama eky'omwaka gumu, kandi ekitaina kamogo, nikyo kibe kihongwa eky'okwokya eky'okuhongera MUKAMA; eki akikolege buli kiro.

¹⁴Kandi buli kiro aleeterege MUKAMA ekihongwa eky'ebyokulya, nizo kiloguraamu ibiri z'ensaano na lita emu y'amagita ag'okworobya ensaano; eki nikyo ekiragiro eky'ekihongwa eky'okwokya eky'oruteekerro.

¹⁵Ebiro byona, ekyana ky'entaama, ensaano n'amagita nikyo kihongwa eky'okwokya eky'oruteekerro, eky'okuhongeraga MUKAMA.

¹⁶“MUKAMA Ruhanga naagamba ati: “Omulemi obu araahaga omu ha batabani be ekisembo eki aihire ha bugwetwa bwe, ekisembo eki, kiriba kya batabani b'ogu kihebwa, liriba ituungo lyabo ery'obugweterano.

¹⁷Baitu kakuba akiha omu ha baheereza be kiriba ky'omuheereza ogu okuhika ha mwaka ogw'okugarrayo ebintu. Hanyuma kigarukire mukama wakyo; abaana be bonka, nubo barukwikirizibwa kusigaza ekisembo ekyaihire ha bugwetwa bwe.

¹⁸Omulemi ataligira eki atwara ha bugwetwa bw'abantu atalibabinga omu butaka bwabo; batabani be abagwetere ebintu bye nyabwe, nukwo haleke kubaho n'omu ha bantu bange arukunyagwa ebye.”

¹⁹Hanyuma omu mulyango ogukaba guliha rubaju rw'irembo ogukaba guroleriire orukarra orwa ha bukiizi obw'emoso orw'ebisiika ebirukwera ebya banyakatagara. Oku hampero y'ebisiika ebi, eya Bugwaizooba, nkarorayo ekiikaro.

²⁰Yangambira ati: “Hanu nuho banyakatagara baraacumbiraga ekihongwa eky'okwihisaaho omusango, kandi nuho baraayokezaaga ekihongwa eky'ebyokulya, nukwo baleke kubiturukya omu zigati ey'aheeru, bakeeza abantu.”

²¹Hanyuma yanturukya omu zigati ey'aheeru, yantwara ha nsonda ina ez'ezigati; kandi omu buli nsonda ey'ezigati egi, hakaba haliyo ezigati.

²²Omu nsonda ina ez'ezigati, hakaba haliyo ezigati nke, ez'obura bwa mita makumi abiri, mita ikumi naitaano obugazi; ezigati ezi, zikaba nizingana.

²³Buli emu, ekaba ezitirirweho ekisiika eky'amabaale, ina ebyoto ebyombekerwe omumaiso g'ekisiika

²⁴nubwo yangambiire ati: “Binu nibyo ebicumbiro, abo abanyakuheereza omunju ya Ruhanga ebi baraacumbiramuga.”