Read Runyoro - rutooro Ezek 47 Bible Online

Ezek 47 - Runyoro - rutooro bible

Ezek 47

¹Hanyuma yangarra ha mulyango ogw'Enju ya Ruhanga, narora amaizi nigaruga hansi y'ekiti ky'omulyango, ha bukiizi obwa Burugaizooba, habwokuba Enju ya Ruhanga nuho ekaba eroleriire; amaizi nigagera nigasirimuka, nigaruga hansi y'obukiizi obw'obulyo, na hansi y'ekiti ky'omulyango ogw'Enju ya Ruhanga, habukiizi bw'obulyo obw'itambiro.

²Hanyuma, yandabya irembo erya ha bukiizi obw'emoso, yanturukya ha irembo ery'aheeru, erinyakuroleriire Burugaizooba, oku nuho hakaba hali amaizi agakaba nigagera ha bukiizi bw'obulyo.

³Omusaija yagenda ha rubaju orwa Burugaizooba akwasire omuguha gwe ogw'okulengesa, yalenga mita bitaano, yaanyambura amaizi ago, gakampika omu bujwarro bw'enkwanzi.

⁴Yagaruka yalenga mita bitaano ezindi n'ago yaganyambura; ago gampika omu maju. Yayongera yalenga mita bitaano, n'ago yaganyambura; gangarukira omunda.

⁵Yayongera yalenga mita bitaano ezindi, lero ago, kikaba kisaaru eki nkaba ntarukusobora kwambuka, amaizi gakaba geeyongiire, maingi muno, omuntu agaakaba atarukusobora kwambuka, rundi buli naaziha.

⁶Aho yankaguza ati: “Wewe mwana w'omuntu, eki okiboine?” Hanyuma yandabya ha musa gw'ekisaaru, yangarrayo.

⁷Obu nkaba ningarukayo, ha musa gw'ekisaaru eki, nabonaho emiti nyingi, eri ha mbaju zombi

⁸Yangambira ati, “amaizi ganu nigagera nigatoma omunsi ya Burugaizooba, kandi nigataaha Arabba: kandi obu garaataaha omu maizi g'enyanja gali agateekere, nigaija kugasemeza.

⁹Hoonahoona ekisaaru kinu nambere kiraagenda, buli kihangwa kyona ekyomeezi ekinyakwetengeesa, kiryomeera, amaizi ganu habw'okugendayo nukwo gasemeze ag'enyanja encu zirikanya muno; habweki, hoona ekisaaru kinu nambere kirigenda, buli kintu kiryomeera.

¹⁰Abasohi b'encu baraayemerraga ha rubaju rw'enyanja, okuruga Eni-geedi okuhika Enegilaimu, kiraabaga kiikaro eky'okwanjurramu obutimba; encu zakyo, ziriba z'emiringo nyingi muno, zirisisana nk'encu ez'enyanja enkooto.

¹¹Baitu amaizi ag'ebisaaru n'ag'ebiijongo, tigaliba marungi; ago galirekwayo, gaihwemuga ekisura.

¹²Kandi ha misa y'ekisaaru eki orubaju n'orubaju, halimerayo emiti ey'emiringo yoona enyakwana ebijuma ebiribwa. Amababi gaayo tigalihotoka, kandi terihoisa, baitu buli kwezi, eraayanaga ebijuma ebirungi, habwokuba amaizi agagiitirra, garuga omukiikaro ekirukwera. Ebijuma byayo, biraabaga byokulya, amababi gaayo mubazi gw'okutamba.”

¹³MUKAMA Ruhanga naagamba ati: Enu niyo mitaano eyi mulikuraatira okubaganiriza enganda ikumi na ibiri eza Isirairi, ensi ey'obugwetwa bwabo. Yosefu atunge ebicweka bibiri.

¹⁴Mugigabe omu bwinganiza; habwokuba ensi enu eyi murukutuunga ebe bugwetwa bwanyu, nkaginihiza baisenkuru inywe.

¹⁵“Gunu nugwo omutaano gwayo: Ha rubaju orw'emoso, nigutandikira ha Nyanja Enkooto, gugenda n'omuhanda ogwa Heselooni okuhika ha ntaaho ya Hamasi, gweyongereyo okugarukira Zedadi,

¹⁶Berosa, Sibburaimu (enyakuli ha mutaano, hagati ya Damasiko na Hamasi) okuhika Hazeri-hatikooni, enyakuli ha mutaano gwa Hahuraani.

¹⁷Habweki, omutaano guruge ha nyanja, gugarukire Hazalenooni, enyakuli ha mutaano ogwa ha bukiizi bw'emoso obwa Damasiko, n'ogwa Hamasi. Oru nurwo orubaju orw'emoso.

¹⁸“Ha rubaju orwa Burugaizooba, guruge Hazalenooni hagati ya Hahuraani na Damasiko; nigugenda n'ekisaaru Yorudaani, hagati ya Giryadi n'ensi ya Isirairi; okuhika ha nyanja eya Burugaizooba n'okweyongerayo Tamari. Oru nurwo orubaju orw'emoso.

¹⁹Kandi harubaju rw'obukiizi bw'obulyo kuruga Tama kuhika ha maizi ga Kadesi-meribba. Ha bukiizi bw'obulyo kutaana n'obusaaru bwa Misiri kuhika ha Nyanja Enkoto.

²⁰“Ha rubaju orwa Bugwaizooba, Enyanja Enkooto nugwo gube mutaano, okugarukira omumaiso g'entaaho ya Hamasi honyini. Oru nurwo orubaju orwa Burugaizooba.

²¹“Ensi enu, nukwo mugyegabire muti, nimurorra ha nganda za Isirairi.

²²Mugyegabire, bube bugwetwa bwanyu, kandi bw'abanyamahanga abaikaire nainywe ababazaaliremu, abaana. Hali inywe basisane nk'abaana abaazairwe Isirairi. Nabo, bahebwe obugwetwa hamu nainywe, omu nganda za Isirairi.

²³MUKAMA Ruhanga naagamba ati: Omuruganda rwona omunyaihanga oru araabamuga, oku nuho mumuheereze obugwetwa bwe.