Read Runyoro - rutooro Ezek 48 Bible Online

Ezek 48 - Runyoro - rutooro bible

Ezek 48

¹“Ganu nugo mabara g'enganda: Okutandikira ha mutaano ogwa ha bukiizi bw'emoso, okuruga ha nyanja, okugenda n'omuhanda ogwa Heselooni okuhika ha ntaaho ya Hamasi, okugarukira Hazalenooni. (Enyakuli ha ogwa ha rubaju orw'emoso orwa Damasiko, oroleriire Hamasi), kandi nigweyongerayo okuruga Burugaizooba, okuhika Bugwaizooba. Daani, omugabo gumu,

²Aseri omugabo gumu, ogurukuteeraniza ensi ya Daani, okuruga Burugaizooba okuhika Bugwaizooba.

³Nafutaali omugabo gumu, ogurukuteeraniza ensi y'Aperi, okuruga Burugaizooba okugarukira Bugwaizooba.

⁴Manaase, omugabo gumu, oguherraine ensi ya Nafutaali, okuruga Burugaizooba okugarukira Bugwaizooba.

⁵Efuraimu, omugabo gumu oguherraine ensi ya Manaase, okuruga Burugaizooba okugarukira Bugwaizooba.

⁶Rubbeni, omugabo gumu oguherraine ensi y'Efuraimu okuruga Burugaizooba okugarukira Bugwaizooba.

⁷Yuda, omugabo gumu oguheeraine ensi ya Rubbeni, okuruga Burugaizooba, okugarukira Bugwaizooba.

⁸“Okuherrana ensi ya Yuda okuruga Burugaizooba okuhika Bugwaizooba, mubaganizeeho ekicweka ky'itaka ekirukuhikya kilomita ikumi na ibiri n'ekicweka obugazi, kandi obura ekirukwingana ekimu ha bicweka eby'itaka ebyahairwe enganda za Isirairi, okuruga Burugaizooba okugarukira Bugwaizooba, hagati yakyo, nuho habe ekiikaro ekirukwera.

⁹Ekicweka eki muliihiraho MUKAMA, kihikye obura kilomita ikumi na ibiri n'ekicweka, obugazi kilomita ikumi.

¹⁰Itaka erirukwera, ligabwe liti: Ha rubaju orw'emoso banyakatagara, batungeyo itaka erirukuhikya kilomita ikumi na ibiri n'ekicweka, ha rubaju orwa Bugwaizooba, obugazi kilomita itaano, ha rubaju orwa Burugaizooba, obugazi kilomita itaano, kandi ha rubaju orw'obulyo, obura kilomita itaano, hagati yalyo nuho habe ekiikaro kya MUKAMA ekirukwera.

¹¹Ekiikaro ekirukwera eki, kibe kyabaanyakatagara batabani ba Zadooki abaayezibwe, abaalinzire ebintu byange, abataragangaire, abantu ba Isirairi obu baagangaire nk'Abaleevi oku baakozire.

¹²Libe lyabo, guli mugabo ogw'embaganiza ogwahairwe ha mugabo gw'ensi ogurukwera, ekiikaro ekirukwera mali, ekiherraine ensi ey'Abaleevi.

¹³Kandi ha nsaro y'itaka erya banyakatagara Abaleevi batungeyo itaka erirukuhikya obura kilomita ikumi na ibiri n'ekicweka, obugazi kilomita itaano.

¹⁴Itaka linu, bataliriguzaaho rundi kulihingisaaho n'erindi; omugabo ogu ogw'ensi omurungi guti, bataliguha abanyamahanga habwokuba itaka lya MUKAMA erirukwera.

¹⁵“Eririsigaraho, erirukuhikya kilomita ikumi na ibiri n'ekicweka obugazi kilomita ibiri n'ekicweka, obura, eri abantu ab'omu rubuga balyekoonyeze nkooku barukwenda, nibaikirizibwa kulyombekamu amaju, rundi kuliriisizaamu amagana. Hagati yalyo, nuho habe orubuga;

¹⁶runu nurwo orulengo rwalyo: Ha rubaju orw'emoso, mita enkumi ibiri bibiri natano, orubaju orw'obulyo, mita enkumi ibiri bibiri n'ataano kandi orwa Bugwaizooba, narwo mita enkumi ibiri bibiri n'ataano.

¹⁷Kwehinguliriza orubaju rwona, buli rubaju halibayo omwanya ogurukuhikya mita kikumi abiri na itano kucwanganiza.

¹⁸Kandi eriraasigaraho ha bura obwa ha nsaro ey'itaka erirukwera, ha rubaju orwa Burugaizooba, libe kilomita itano, harwa Bugwaizooba, kilomita ibiri n'ekicweka kandi libe ha nsaro y'itaka erirukwera. Ebiraalimwaga omu itaka eri, nibyo biraliisaaga abakozi ab'omu rubuga.

¹⁹Abakozi ab'omu rubuga, ab'enganda zoona eza Isirairi, balimege itaka eri.

²⁰Ekicweka kyona eki muliihaho, kihikye emikono kilomita ikumi na ibiri n'ekicweka, kingane ha mbaju ina, eri niryo itaka erirukwera, otaireho n'ery'orubuga.

²¹“Eririsigaraho ha mbaju zombi ez'itaka erirukwera n'ery'orubuga libe ly'omulemi. Ha mutaano ogwa Burugaizooba, nirihikya kilomita ikumi na ibiri n'ekicweka ez'itaka erirukwera, kandi ha gwa Bugwaizooba, nayo kilomita ikumi na ibiri n'ekicweka liherraine itaka eryahairwe enganda eza Isirairi, eri libe ly'omulemi. Eri niryo itaka erirukwera, erirumu ekiikaro ekirukwera, eky'Enju ya Ruhanga,

²²kandi ery'Abaleevi n'ery'orubuga liriba hagati y'eri ery'omulemi. Itaka ery'omulemi, libe hagati y'erya Yuda n'erya Benyamiini.

²³“Linu niryo ery'enganda ezindi: okuruga ha rubaju orwa Burugaizooba okugarukira Bugwaizooba,

²⁴Benyamini omugabo gumu.

²⁵Okuruga ha rubaju orwa Burugaizooba okugarukira Bugwaizooba Isaakara omugabo gumu ogunyakuherraine n'itaka erya Simyoni.

²⁶Okuruga ha rubaju orwa Burugaizooba okugarukira Bugwaizooba Zebbuluuni, omugabo gumu, ogunyakuherraine n'itaka erya Isaakara

²⁷Okuruga ha rubaju orwa Burugaizooba okugarukira Bugwaizooba Gaadi omugabo gumu, oguherraine n'itaka erya Zebbuluuni.

²⁸Kandi okuherrana n'itaka erya Gaadi, omutaano nigwija kuruga Tama, gugarukire ha maizi ha Meribasi-kadesi, gugende n'ensaro y'ekisaaru kya Misiri, gugarukire ha Nyanja Enkooto.

²⁹MUKAMA Ruhanga naagamba ati: Egi niyo ensi muligabira enganda za Isirairi, bube bugwetwa bwabo, kandi egi, niyo emu ha migabo yabo.

³⁰“Enu niyo ey'okuturuka orubuga: ha rubaju orw'emoso, orurukwija kuhikya mita enkumi ibiri, bibiri n'atano,

³¹amalembo asatu, irembo erya Rubbeni, erya Yuda n'erya Leevi, amalembo ag'orubuga ago, garukwe rumurumu ha nganda za Isirairi.

³²Ha rubaju orwa Burugaizooba, orurukuhikya mita enkumi ibiri, bibiri n'atano emalembo asatu, irembo erya Yosefu, erya Benyamiini n'erya Daani.

³³Ha rubaju orw'obulyo orurukuhikya mita enkumi ibiri, bibiri n'atano, amalembo asatu, irembo erya Simyoni, erya Isaakara, n'erya Zebbuluuni.

³⁴Ha rubaju orwa Bugwaizooba orurukuhikya mita enkumi ibiri, bibiri n'atano, nago amalembo asatu, irembo erya Gaadi, ery'Aseeri, n'erya Nafutaali.

³⁵Omwanya ogw'okwehinguliriza orubuga rwona, eriba mita kenda. Kandi okuruga obu, orubuga oru ruraayetwaga: Yahwe-Sama Yahwe nuho ali.”