Read Runyoro - rutooro Ezek 5 Bible Online

Ezek 5 - Runyoro - rutooro bible

Ezek 5

¹“MUKAMA akagamba ati: Iwe omwana w'omuntu, kwata empirima enyakutoire; ogyekoonyeze nk'orumoiso rw'omumwisa okyemwise isoke n'omuleju; hanyuma okwate minzaani ey'okulengesa, obaganizeemu isoke.

²Kimu kya kasatu eky'isoke eri, olyokeze omu rubuga, ebiro eby'okurugota bimazire kuhwaho; ekimu kya kasatu ekindi, okitemateme n'empirima yaawe, oyehingulirize orubuga; ekicweka ekisigaireho, okimiise omu mwanya, nukwo nsomole empirima ndikurate.

³Ha bicweka ebi, oiheho isoke like, olibohere omu mukugiro gw'ekanzu yawe.

⁴Kandi ha isoke eri, ogaruke oiheho like, olinage omu murro lihye; omu, haliimukamu omurro, gutaahe omunju ya Isirairi yoona.

⁵MUKAMA Ruhanga naagamba ati: Murole, egi niyo Yerusaalemu ei nataire hagati y'amahanga n'ensi ezigyehinguliriize.

⁶Ekagaya muno ebigambo byange okukira amahanga agandi, kandi ekagaya ebiragiro byange okukira ensi ezindi ezigyehinguliriize, neyanga ebigambo byange, kandi etarukugendera ha biragiro byange.

⁷Nikyo MUKAMA Ruhanga arukugambira ati: “Habwokuba muli beereme okukira amahanga agabeehinguliriize, kandi mutakwate biragiro byange timwahurra n'ebigambo byange, baitu mwakwata ebiragiro eby'amahanga agabeehinguliriize,

⁸habweki, nyowe MUKAMA Ow'ekitiinisa, nimbagambira nti: ndi munyanzigwa wanyu. Ndibacwera omusango, amahanga goona nigarora.

⁹Habw'ebibi byanyu ebi byona, ndibakora eki ntakakoraga, kandi eki ntaligaruka kukora.

¹⁰Habweki, baise baana, balirya abaana baabu, n'abaana balirya baise bo; ndibacwera omusango, kandi abamu omuli inywe abaliba basigaireho ndibararangya omu nsonda zoona ez'ensi.

¹¹MUKAMA naagamba ati: Mazima nkooku ndi mwomeezi, nindahira nkooku mwasiisire ekiikaro kyange ekirukwera nimukorramu ebintu byanyu ebibi, na habw'obubi bwanyu obu bwona, ndibakeehya; eriiso lyange tiririganyira, kandi tindigira mbabazi.

¹²Kimu kya kasatu omuli inywe kiriitwa endwara kandi kimarweho kiihe; kimu kya kasatu ekindi, kiriitwa empirima; kimu kya kasatu ekisigaireho, ndikirarangya omu nsonda zoona ez'ensi, nsomole empirima nkikuraatire.

¹³“Aho, nuho ekiniga kirimpwera, kandi ndimarraho obukaya; obu, nyowe MUKAMA nkooku nabalize nyina ekiniga, obu nabamaliireho obukaya.

¹⁴Kandi ekindi, ndikufoora kitongo kandi kintu eky'okusekwa omu mahanga agakwehinguliriize, n'abantu boona abahinguzi abaraakuroraga.

¹⁵Oraajumwaga, oraagaywaga, oraahaburaga kandi oraatiinisaaga amahanga agakwehinguliriize, obu ndikucwera omusango mbiihiirwe kandi nyina obukaya, obu ndikuha ebifubiro eby'amaani; ebi bigambirwe nyowe MUKAMA.

¹⁶Ndikeehya ebyokulya byawe, nkuleke oitwe enjara olihurra obusaalizi obw'amaani ag'ekiniga kyange, nibucumita nk'emisogi enyakurasirwe kuhwerekereza.

¹⁷Ndireeta kiihe n'enyamaiswa ez'omwirungu, ebi birikunyagaho abaana bawe; ndireeta endwara, ebintu ebigumire, n'obulemu, bikwate ninyowe MUKAMA, ninyowe ngambire.”