Read Runyoro - rutooro Ezek 6 Bible Online

Ezek 6 - Runyoro - rutooro bible

Ezek 6

¹MUKAMA akangambira ati:

²Iwe omwana w'omuntu, ohange amaiso hansozi za Isirairi, kandi ozirangire ebirizigwera,

³ozigambire oti: Inywe ensozi za Isirairi, muhurre ekigambo kya MUKAMA Ruhanga! MUKAMA, ensozi n'obusozi, ebiinongoro n'ebihanga naabigambira ati: Muhurre, nyowe, nyowe nyenka, ninyija kubatematema, kandi ninyija kuhwerekereza ebiikaro byanyu ebikuru ebi muramizaamu.

⁴Amatambiro ganyu, galifooka bifuruka kandi amatambiro ganyu aganyakucumiikirirwaho obubbani, galiseeswa; emitumbi y'abantu banyu abaisirwe, ndigihungura omumaiso g'ebisisani byanyu.

⁵Emitumbi ey'abantu ba Isirairi, ndigyara omumaiso g'ebisisani by'embandwa zaabo; amagufa ganyu, ndiganaga orubaju n'orubaju, nyehingulirize amatambiro ganyu.

⁶Hoona ha murakaikaraga, embuga ziraafokaga bitongo, kandi ebiikaro byanyu ebikuru biraahwerekerezibwaga amatambiro ganyu nukwo gabe bitongo gaseeswe ebisisani byanyu bitemwetemwe bicwekerezibwe, ebi mwakozire byona bimalirweho kimu

⁷Abarukwitwa baligwa hagati yanyu nubwo mulimanya nkooku ndi MUKAMA.

⁸Baitu nabwo, abamu omuli inywe, ndibaleka bali boomeezi. Obu muliba omumahanga n'abantu abamu abaakizire empirima, kandi inywe obu muliba murarangire omunsi,

⁹Obu, abamu omuli inywe abaatabukire, nubwo balinyijukira omu mahanga aga baliba banyagiirwemu, mmazire kubacwamu omutima gwabo ogw'obusiihani ogwandugireho, mbaigaire amaiso agaikaraga nigaligira ebisisani byabo; balyenoba habw'ebibi byona ebi baliba bakozire habw'engeso zaabo embi

¹⁰kandi nubwo balimanya nkooku ndi MUKAMA, obu nagambire nti ndibakora akabi kanu, eki ntakigambire busa.

¹¹MUKAMA akagamba ati: “Teera enkwakwa kandi oteere omulindi, ogambe oti: Mahano! Habw'obubi bwona n'ebintu ebibi ebyakozirwe enju ya Isirairi; habwokuba, nibaija kwitwa: empirima, kiihe, n'endwara.

¹²Kandi ogu owaliba atabukire, aliitwa kiihe. Abantu abo, nukwo ndibeemarraho nti ekiniga.

¹³Emitumbi yabo obu erigarangatana hagati y'ebisisani by'embandwa zaabo okwehinguliriza amatambiro gaabo, ha busozi bwona oburaihire, ha mitwe y'ensozi zoona, hansi y'emiti embisi, hansi y'omuhomozi gwona ogunyakujumbire hoona ha baakahongerraga embandwa zaabo ebintu ebirukuboya, nubwo mulimanya nkooku ndi MUKAMA.

¹⁴Ndigorra omukono mbarwanise, ensi ngifoole kitongo etali y'okwikarwamu, mmarreho kimu ebiikaro byabo byona, okurugirra ha irungu okugarukira Rribbula, obu nubwo balimanya nukwo bamanye nkooku ndi MUKAMA.”