Read Runyoro - rutooro Ezek 7 Bible Online

Ezek 7 - Runyoro - rutooro bible

Ezek 7

¹MUKAMA akangambira ati:

²“Iwe omwana w'omuntu, Binu nibyo MUKAMA arukugambira abantu ba Isirairi: Empero, empero ehikire ha mbaju zoona ez'ensi.

³Hati empero ekuhikiire ninyija kukwoleka ekiniga kyange, nkucwere omusango nindorra ha mirwa yaawe kandi ninyija kukufubira habw'ebintu ebibi byona ebi wakozire.

⁴Tindukwija kukuganyira rundi kukugirra embabazi; baitu ninyija kukufubira habw'engeso zawe, kandi ebikorwa byawe ebibi birizooka omuli iwe obu nubwo mulimanya nkooku ndi MUKAMA.

⁵MUKAMA Ruhanga naagamba ati: Akabi nikakuratwa akandi! Nkako nikaija!

⁶Empero izire; empero yonyini izire; muhoire. Empero iziire inywe abantu abanyakwikara omunsi. Nginu ehikire.

⁷Iwe omuntu anyakwikara omunsi, okufa kwawe kuhikire; akasumi kahikire, ekiro kiri haihi, ekiro eky'obwogo, ekitali eky'okutokera hansozi n'okusemererwa.

⁸Hati, ninyija kukwoleka obukaya bwange, nkumarreho ekiniga, nkucwere omusango nindorra ha ngeso zawe; kandi ninyija kukufubira habw'ebintu ebibi ebiwakozire.

⁹Tindukwija kukuganyira rundi kukugirra embabazi; obworaaba nookyakora ebintu ebibi, ninyija kukufubira ha ngeso zawe hagati y'ebinugwa byawe obu nubwo olimanya nkooku ndi MUKAMA anyakufubira.

¹⁰“Dora, ekiro kihikire! Ego, kiizire! Okuhwerekerra kwawe kwizire, okuhenderra kwakize okwekuliiriza kusumikire.

¹¹Obukatuzi bweyongiire bufookere omwigo gw'obubi; busaho kintu kyabo na kimu ekirisigaraho. Tihalisigaraho itungo lyabo, oburungi bwabo n'ekitiinisa kyabo.

¹²Akasumi kahikire, ekiro nikirra haihi. Omuguzi aleke kwesiima, kiguza aleke kuganya, habwokuba Ruhanga, abantu boona naija kubafubirra hamu.

¹³“Habwokuba obu baliba bakyaikaire, kiguza, talyegarurra eki yagulize; habwokuba ekiniga kya Ruhanga kirihikaho abantu boona; tikirigaruka enyuma; kandi omuntu weena habw'obubi bwe, talitabura bwomeezi bwe.

¹⁴“Haligamba engwara, nukwo abantu boona beeteekanize; baitu tihalibaho n'omu ow'aligenda ha bulemu, habwokuba ekiniga kya Ruhanga boona kiribakoraho omu mulingo gumu.

¹⁵Okurwana kuli omu nguudo, kandi endwara n'enjara nibyo biri omu maka; owaliba omu musiri, aliitwa empirima; kandi ow'aliba omurubuga ogu aliitwa kiihe n'endwara.

¹⁶Kandi obu halibaho abasigaireho baraikaraga hansozi nk'amaiba ag'omu bihanga, buli omu naaganya habw'ebibi bye.

¹⁷Emikono yabo yoona eriteba, amaju gabu galitukumira

¹⁸Balijwara ebitengo obutiini bulirarra kubaita, ensoni ziryenda kubakabya, kandi balicwekwa empara.

¹⁹Efeeza yabo baligihungura omu nguudo, kandi zaabbu yabo eriba nk'ekintu ekinugwa ha kiro MUKAMA eki alyolekeraho obukaya, efeeza n'ezaabbu yabo, tibirisobora kubajuna; ebi tibalisobora kubirya bakaiguta, bakeejuna enjara. Habwokuba ebi nibyo byabanagire omu kibi.

²⁰Baagonzaaga muno amabaale gaabo ag'omuhendo amarungi, nugo baakoziremu ebisisani byabo ebibi n'abacwezi, hati nikyo ndukwendera kubibanobesa.

²¹MUKAMA naagamba ati: ndiikiriza abanyamahanga bagaibe, kandi abantu ababi baganyage bagasiise.

²²Enju yange enyakurumu eby'obuguuda obu eriba neegaywa, abanyagi obu baligitaaha bakagisiisa, tindigamba kantu.

²³“Habwokuba, ensi ijwire abaisi b'abantu, kandi orubuga rwijwire obuhoogozi,

²⁴ndireeta abanyamahanga abarukukirra kimu boona obubi, nubo baije batwale amaju gaabo; ndimaraho obusobozi bwabo obunyakubeehuliza, kandi ebiikaro byabo ebi baramizaamu, birisiiswa.

²⁵Obu haliija omuhito, baliserra obusinge, baitu tibalibubona.

²⁶Akabi akamu kalikuratwa akandi, orugambo tirulicwekera. Balihambiriza omurangi abagambire ekyaliranga, nyakatagara taligira biragiro, kandi abakuru tibaligira magezi ag'okuhabura abantu.

²⁷Omukama omubiito alihwa amasiko, emikono y'abantu ab'omunsi, obutiini buligirwaza entengera, nkooku baakozire nukwo ndibakora, nkooku baayecweriiremu, na nyowe nukwo ndibacwera; nukwo balimanya nkooku ndi MUKAMA.”