Read Runyoro - rutooro Ezek 9 Bible Online

Ezek 9 - Runyoro - rutooro bible

Ezek 9

¹Hanyuma nubwo nahuliire Ruhanga naayamirra ati: “Inywe abarukwija kucwekereza orubuga, mwirre haihi, buli muntu aije akwasire eby'okurwanisa bye eby'okwisa.”

²Ahonaaho, haija abasaija mukaaga, nibaruga omwirembo ery'eruguru ery'obukiizi bw'emoso, buli omu akwasire ekyokurwanisa kaita, kandi omuli bo, hakaba harumu omusaija anyakujwaire engoye za kitaani ahagatiire esanduuko enyakurumu ebintu ebirukwetagwa ha kuhandiika. Baataaha, baayemerra haihi n'itambiro ery'omulinga.

³Omu kasumi ako ekitiinisa kya Ruhanga owa Isirairi, kikaba kirugireho omukerubbi nambere kyaikaraga bigenzire ha kiti ky'omulyango gw'enju yayamirra omusaija ow'akaba ajwaire engoye eza kitaani, ow'akaba ahagatiire esanduuko ey'ebintu ebirukwetaagwa ha kuhandiika.

⁴MUKAMA yamugambira ati: “Genda orabanganemu orubuga orabanganemu Yerusaalemu yoona, ote akarorwaho ha buso bwabantu abarukuteera ebiikoohi kandi abarukusinda habw'ebintu ebibi, ebinyakukolerwamu.”

⁵Kandi namuhurra naagambira abandi ati: “Raba omu rubuga ohondere omusaija oli, oite; otaganyira omuntu n'omu; otagirra embabazi omuntu n'omu;

⁶mwitire kimu abasaija abakuru abasigazi, abaisiki, abaana abato n'abakazi, baitu omuntu anyakwina akarorwaho, mutalimukwataho. Mutandikire ha nju yange.” Baatandikiraho abagurusi, abakaba bali omumaiso g'enju.

⁷Hanyuma yabagambira ati: “Musiise Enju, kandi mugigalike omu zigati. Muturuke mugende.”

⁸Obu bakaba nibakyaita abantu, nyowe nsigaire nyenka, najuumara nateera omuranga nti: “Ai MUKAMA Ruhanga! Noija kuhwerekereza boona abaasigaireho omu Isirairi, habw'okubiihirirwa muno Yerusaalemu?”

⁹Nubwo yangarukiremu ati: “Omusango ogw'enju ya Isirairi n'eya Yuda, guhinguraine; baisire abantu omunsi egi yoona, kandi orubuga rurumu okuhenderra kwingi, habwokuba nibagamba bati: ‘MUKAMA ensi akagihwamu kandi tarukurora.’

¹⁰Tindiganyira kandi tindigira mbabazi, ndibakorra nkooku baakoliire abandi.”

¹¹Omu kasumi ako, omusaija oli ow'akaba ajwaire engoye za kitaani ahagatiire esanduuko enyakurumu ebirukwetaagwa ha kuhandiika, nubwo yaizire naagamba ati: “Ekyondagiire nkikozire.”