Read Runyoro - rutooro Dan 1 Bible Online

Dan 1 - Runyoro - rutooro bible

Dan 1

¹Omu mwaka ogwa kasatu ogw'engoma ya Yehoyakimu omukama wa Yuda, Nebbukadaneeza omukama wa Babbulooni, nubwo yaseesiire orubuga Yerusaalemu yarugota.

²Kandi MUKAMA akamuha okusingura omukama wa Yuda Yehoyakimu, omukama wa Yuda yanyaga ebimu ha bikwato eby'enju ya Ruhanga; yabitwara omunju y'embandwa ye nuho yabita.

³Nubwo omukama yaragira Asipenazi omukonwa omukuru aleete abamu ha bantu ba Isirairi, ab'orulyo rw'omukama n'abarangwa, ibara,

⁴abasigazi abataina kamogo, abasemiire abasobora kukora buli kintu, abanyakwina amagezi, obwetegereza abasobora kwega kandi abasemeriire kuheereza omu kikaali ky'omukama, abeegese eby'amagezi n'engamba ey'Abakaludaaya.

⁵Omukama yabaha omugabo ogwa buli kiro, habyokulya ebirungi ebiyalyaga n'amaarwa agayanywaga. Bakacwerwa okumara emyaka esatu nibeegesibwa; obu erimara kuhwaho, nubwo baleetwe omumaiso g'omukama.

⁶Omu bantu abo abaakomerwe, nuho hakaba hali: Daneeri, Hananiya, Misaheeri, n'Azaliya ow'oruganda rwa Yuda.

⁷Omugaragara omukuru, yabaruka amabara: Daneeri, yamuruka Beriteesaza, Hananiya yamweta Saduraaka, Misaheeri yamweta Mesaaka, kandi Azaliya yamweta Abedeneego.

⁸Baitu Daneeri akacwamu ngu tarukwija kwesiisa n'ebyokulya ebirungi n'amarwa eby'omukama; nukwo kugambira omukuru w'abakonwa atamwikiriza kwesiisa.

⁹Ruhanga akaha mukuru w'abagaragara oli, omutima ogw'okukorra Daneeri eby'embabazi n'ogw'okuganyira;

¹⁰nukwo kugambira Daneeri ati: “Wewe nintiina mukama wange Rukiraabasaija omukama; ayaragiire ebyokulya ebi oraalyaga n'amarwa ag'oranywaga, taikara kukurora oli muceke okukira abasigazi abandi aborukwingana nabo. Eki kakuba kibaho buli wannaga omu kabi ak'okwitwa omukama.”

¹¹Nubwo Daneeri yagambiire omukeeto mukuru w'abagaragara ou akaba akomere kumurolerra, kurolerra Hananiya, Misaheeri, n'Azaliya ati:

¹²“Lengesa itwe abairu bawe okumara ebiro ikumi, otuhe emikubi hataroho nyama niyo tulye, n'amaizi ag'okunywa.

¹³Hanyuma orole enzooka yaitu n'ey'abasigazi abarukulya ebyokulya by'omukama ebirungi; eky'oraarora, nikyo oraasigikiraho kukorra abaheereza bawe.”

¹⁴Omukeeto akahurra eki baamugambiire, yabalengesa okumara ebiro ikumi.

¹⁵Ebiro ikumi obu byahoireho bakaba nibazooka kurungi kandi bagomokere, okukira bali abalyaga ebyokulya by'omukama ebirungi.

¹⁶Habweki omukeeto na bali abalyaga ebyokulya ebirungi kandi abanywaga amarwa nukwo kubibaihaho, yatandika kubaha emikubi omukiikaro kyabiri omukama ebi akaba aragiire.

¹⁷Abasigazi abbana abo, Ruhanga akabaha amagezi, baasobora ebyokwega n'eby'amagezi byona, kandi Daneeri akahebwa okwetegereza ebyokwolekwa byona n'okusoborra amakuru g'ebirooto.

¹⁸Akasumi ak'okutendeka aboojo, omukama aka yataireho obu kaahoireho, omukuru w'abagaragara, yabatwara hali omukama Nebbukadaneeza.

¹⁹Omukama yabaza nabo, baitu omuli bo boona, hatazookemu n'omu arukusisana Daneeri, Hananiya, Misaheeri n'Azaliya, nukwo kutandika kuheereza omukama.

²⁰Buli kintu kyona eky'amagezi rundi eky'okwetegereza, omukama eki yabakaguzaaga, akarora nkooku barukukira muno abaraguzi boona abakaba bali omu bukama bwe.

²¹Daneeri akaikara omu kikaali ky'omukama okuhika omu mwaka ogw'okubanza ogw'omukama Siraasi.