Read Runyoro - rutooro Dan 10 Bible Online

Dan 10 - Runyoro - rutooro bible

Dan 10

¹Omu mwaka ogwa kasatu ogw'obulemi bw'omukama Siraasi, owa Paasa Daneeri, kandi anyakwetwa Beriteesaza, akasuukulirwa ekigambo. Eki yagambiirwe, kikaba ky'amazima, kandi kikabamu empaka ezitagambwa. Ekigambo eki akakimanya, kandi yayetegereza eki yayolekerwe.

²Omu kasumi ako, nyowe Daneeri, nkaba ndi omu bujune okumara wiiki isatu

³ntarukulya kookulya akanuzire, ntarukukwataho nyama, ntarukunywaho twarwa, rundi kwesiiga akagita n'akatoito kati; okumarra kimu wiiki isatu ezi.

⁴Ha kiro eky'amakumi abiri na bbina eky'okwezi okw'okubanza, obu nkaba nyemeriire ha musa gw'ekisaaru ekikooto, ibara lyakyo Hidekeeri Tiguliisi,

⁵naimukya amaiso narora omusaija ajwaire engoye za kitaani ayeteegere orukoba orwa zaabbu eya Ufaazi.

⁶Omubiri gwe gukaba nigusisana ibaale ery'omuhendo eryetwa berulo, ha maiso naayengeengeta nk'omurabyo, amaiso ge nigasisana ebimuli by'omurro, emikono ye, n'amaguru nibimasamasa nk'omulinga ogwokiibwe, obu yabaga naabaza, iraka lye lyasisanaga nk'ery'abantu abaingi.

⁷Nyowe nyenka Daneeri, ninyowe naboine ekintu eki ekyayolekerwe, baitu abasaija abankaba nyinabo, batakibone, habwokuba akatukumo kakaba kali k'okubaita, bairuka kwesereka.

⁸Nyowe nasigara nyenka, narora ekikuru eki ekyayolekerwe, amaani gampwamu; ha maiso nambere haamasamasaga, haahindukira kimu, hakaba hataroho muntu asobora kummumanyirra.

⁹Hanyuma namuhurra naabaza, obu nahuliire iraka lye, nayeteera hansi ntakyakenga, naikaraho njuumaire.

¹⁰Nubwo omuntu yankwasireho yanyimukya yanyemereza nintukumira,

¹¹yangambira ati: “Wewe Daneeri, iwe enganzi mali, imuka oyemerre, kandi otege okutu, ohurre ebigambo ebi ndukwija kukugambira, habwokuba ntumirwe kwija nambere oli.” Obu akaba naakyambaliza ekigambo eki, nayemerra ninkyatukumira.

¹²Aho yangambira ati: “Daneeri otatiina habwokuba okuruga ha kiro eky'okubanza eki wacweriiremu okwebundaaliza Ruhanga, nukwo okenge kukiraho, akahurra ebigambo byawe, kandi eki nikyo kindeesire.

¹³Omukuru owa Paasa, andwanisiize ebiro amakumi abiiri na kimu; Mikairi omu habamalaika abakuru, aizire kunyirukirra, namusigayo ali hamu na malaika owa Paasa,

¹⁴naija kukumanyisa ekirigwera abantu bawe, omu biro eby'omumaiso. Habwokuba okwolekwa kunu nikukwataho ebiro eby'omumaiso.”

¹⁵Obu yangambiire ebigambo ebi, nainamirra, ntaina n'eki ndaagamba.

¹⁶Kandi dora ogu arukusisana nk'abaana b'abantu, yankora ha minwa; nayesama nabaza. Namugambira ow'akaba ayemeriire nti: “Waitu, okwolekwa kundeetiire obusaasi, tinyina maani.

¹⁷Nyowe omwiru wa MUKAMA, nsobora nta kubaza na iwe MUKAMA wange? Ninsisana nk'omwiru ayemeriire omumaiso ga MUKAMA we.”

¹⁸Ogu arukusisana nk'omuntu, yagaruka yankwataho, nahurra nagarukwamu amaani okukira nkooku mbaire.

¹⁹Yangambira ati: “Muntu iwe, enganzi mali, otatiina, obusinge bube na iwe, ba manzi kandi guma.” Obu yambaliize, nagarukwamu amaani, nagamba nti: “Mukama wange, baza, omazire kungarramu amaani.”

²⁰Hanyuma yankaguza ati: “Omanyire ekindeesire nambere oli? Hati, ka ngarukeyo, ndwanise malaika wa Paasa; obu ndaamusingura, malaika wa Bugiriki nubwo araija.

²¹Baitu ka nkugambire ekyahandiikirwe omu kitabu eky'amazima; busaho n'omu asobora kunkoonyera, okwihaho Mikairi malaika wanyu.”