Read Runyoro - rutooro Dan 11 Bible Online

Dan 11 - Runyoro - rutooro bible

Dan 11

¹Nyowe, omu mwaka ogw'okubanza ogw'okulema kwa Daliyo Omumeedi, nkeemerra, mmugumye kandi mmugarremu amaani.

²“Hati, nkugambire amazima. Omu Paasa, haliimukamu abakama abandi basatu; abo balikuratwa owa kana, ow'aliba muguuda okukira abandi boona; obu alimara kuba w'amaani habw'itungo lye, aliimukiriza boona kurwanisa obukama obwa Bugiriki.

³Nubwo haliimuka omukama ow'amaani, ow'aliremesa obusobozi obutagambwa, kandi akole nkooku arukwenda.

⁴Obu alimara kwimuka, obukama bwe bulicweka, bugabanwe omu miyaga ena ey'iguru baitu tibuligabanwa baijukuru be kandi tibalirema nkooku uwe yalemaga habwokuba bulicweka, butwarwe abandi, abatali abo.

⁵“Kandi omukama owa habukiizi bw'obulyo, aliba w'amaani, baitu omu ha ngabwa ze, alimukira amaani, kandi obulemi bwe, buliba bw'ekitiinisa.

⁶Obu halihinguraho emyaka nke, balyeteerana, muhara w'omukama owa ha bukiizi obw'obulyo aligenda mb'omukama owa ha bukiizi obw'emoso, kusaba obusinge; baitu talisigaza maani g'omukono gwe, kandi omukama ogu n'oruzaaro rwe, taliikaraho; baitu omwisiki ogu, abaheereza be, omwana we n'ogu ayamusagikaga, abo boona baliitwa.

⁷“Omu busumi obu, haliimukaho itaagi eririruga omu mihama y'omwisiki ogu, niryo ligaruke omu kiikaro kya iba ogu nuwe aliramagira ihe, ataahe ekigo eky'omukama owa habukiizi obw'emoso, abasingule kandi abaleme.

⁸Kandi alitwara bacweezi baabo ebisisani byabo ebyagiibwe, n'ebikwato byabo eby'omuhendo, eby'efeeza n'ebya zaabbu, omunsi Misiri; alimara emyaka ataseesiire omukama owa ha bukiizi bw'emoso.

⁹Hanyuma owa kabiri, aliramagira obukama obw'omukama owa ha bukiizi obw'obulyo, baitu aligaruka omunsi ye yonyini.

¹⁰Batabani be, balicwa obulemu, basorooze enkumbutiiti y'amahe ag'amaani, agaliseesa gakamooma nk'amaizi oku gaasandaara, gakarabamu, kandi baligaruka bacwe obulemu okuhikira kimu ha bigo bye.

¹¹Hanyuma omukama ow'omu Masirimuka, ekiniga kiraaliire kumwita aliseesa, arwanise omukama ow'omu Matemba, ow'alizinisa ihe eritabarwa, baitu ihe eri, omukama ow'omu Masirimuka alirisingura.

¹²“Ihe eri obu lirihambwa, alyenyumiza muno, aliita enkumi n'enkumi z'abantu, baitu talisingura.

¹³Habwokuba, omukama ow'omu Matemba aligaruka azinise ihe eritabarwa okukira ery'okubanza, emyaka nke obu erihinguraho, aligaruka n'ihe ery'amaani, n'ebintu ebitabarwa.

¹⁴Omu busumi obu, baingi balyeemera omukama ow'omu Masirimuka; kandi abasaija emanzi omu bantu baawe boonyini, baliimuka, nukwo bahikirize ekyayolekerwe; baitu baliremwa.

¹⁵Omukama ow'omu Matemba nubwo aliija, agote orubuga oru oruzitiriirwe kurungi. Kandi amahe ag'omukama ow'omu Masirimuka, nobwakubaire amahe ge amatongole, tigalyemerra omumaiso ge.

¹⁶Baitu ogu ow'alimuseesira, eki alikikora nkooku arukugonza, tihalibaho n'omu amuhakaniza; alyeemerra omunsi ey'ekitiinisa, kandi yoona eriba omubusobozi bwe.

¹⁷Alitegeka kwiija n'amaani ag'obukama bwe bwoona, alireeta ebigambo eby'obusinge, kandi, alibikorakwo. Aliha muhara we omukama ow'omu Masirimuka amuswere; baitu entegeka terihikirra, kandi terimugasira.

¹⁸Hanyuma, alikubuutukira ensi eza ha mikungu, kandi alihamba nyingi hali zo; baitu engabwa ey'abanyamahanga, erimumaramu ihoole; mananukwo alimumaarramu kimu ihoole, nukwo aleke kugaruka kwendereza.

¹⁹Hanyuma, nubwo alikubuutukira ebigambo eby'ensi ye yonyini; baitu alitabaijuka agwe, ahweerekerre.

²⁰Hanyuma, omu kiikaro kye, haliimukiramu omukama ondi, ow'alituma omunyoro ow'alibonesa abantu n'abahaisa omusoro, nukwo akanyise obuguuda obw'obukama bwe: baitu halihinguraho akasumi kake, omukama ogu aitwe, baitu taliitwa abantu boona nibarora, kandi taligwa omu bulemu.

²¹“Omu kiikaro kye, haliimukiramu omuntu arukugaya, ow'atarahairwe ekitiinisa ky'obukama; aliija ataraganiize atwale obukama naabaza eby'akanwekonweko.

²²Omuntu ogu, alihweerekereza amahe agaatangule, ateho n'omubiito ow'endagaano.

²³Okuruga omu kasumi ak'okweteerana na uwe, aliikara naakora eby'obucwangya; noobu aliba naalema ihanga eritoito, aligenda naayeyongera amaani.

²⁴Aliija omu bicweka eby'isaaza ebirukukirra kimu byona obuguuda ataraganiize, kandi alikora, ba ise, rundi ba isenkuru ebi batarakozire, naararangya omu bicweka ebi emyaayo, eminyago n'ebintu ebindi. Alicwa amagezi ag'okuseesira ebigo ebigumire, baitu akasumi ke kalimuhwaho bwango, eki atakakikozire.

²⁵Aliimuka n'obusobozi n'amaani ge goona, azinise ihe ery'amaani arwanise omukama owa ha bukiizi obw'obulyo; omukama ogu na uwe, alizinisa ihe ery'amaani kandi ery'obusobozi ayerwaneho; baitu talisobora, habwokuba aliba aliirainwe.

²⁶Nangwa n'abo abaalyaga na uwe ebyokulya ebirungi, nubo balimwita; ihe rye liribingwa, abaingi ha baserikale be baliitwa.

²⁷Kandi abakama bali ababiri, emitima yabo erihwera ha kukora eby'itima; balikarra ha meeza emu babaze eby'ebisuba baitu ebisuba byabo tibirigira mugaso; habwokuba akasumi ak'empero akaatairweho kaliba katakahikire.

²⁸Aligaruka owabu aina ebintu bingi ebi anyagire, kandi amaliire okuhwerekereza ediini ey'abantu ba Ruhanga alikora eki arukwenda, nukwo agaruke omunsi ye.

²⁹“Obu halihinguraho akasumi aligaruka aije ha bukiizi obw'obulyo, lero obu, ebintu birimugendera kundi.

³⁰Abarooma balireetwa emeeri, baije bamurwanise, alitiina airuke, agarukeyo ekiniga kiraliire kumwita, alengeho kuhwerekereza ediini ey'abantu ba Ruhanga.

³¹Amahe ge galiija gasiise Enju ya Ruhanga n'ekigo, balidibya ebyonzira eby'okwokya ebya butoosa. Balikora ebintu ebibi ebireeta okuhwerekerra.

³²Alisendasenda abo abaacwire endagaano, naababaliza eby'akanwekonweko, baitu abantu abanyakumanyire Ruhanga wabo, tibalitengeeta, balikora eby'obumanzi.

³³Kandi abanyamagezi abalisangwa omu bantu abo, noobu balibaisa empirima, noobu balibookya n'omurro, n'obu balibanyaga, noobu balibasahura, eki bakakikora okumara akasumi balireetera baingi okwetegereza.

³⁴Omu kasumi k'okufa, baraakoonyerwaga kake. Kandi abantu baingi, balibeeteranizaaho nibabasiigasiiga.

³⁵N'abamu hali abanyamagezi abo, balifa, baitu okufa kwabo, kulireetera abantu kusemezibwa kandi balyezibwa, okuhika ha kasumi ak'empero, habwokuba akasumi akaatairweho tikakahikire.

³⁶“Omukama ogu alikora nkooku arukwenda; alyenyumiza ayekize abacweezi abandi boona, kandi Ruhanga ow'abacweezi, alimubazaaho ebintu ebitagambwa.

³⁷Abacweezi ba isenkuru aba baaheerezaaga n'abacweezi abanyakugonzibwa abakazi, atabagayuke; taligira Ruhanga ou aligayuka, habwokuba aliteekereza ati; naabakira boona.

³⁸Omu kiikaro ky'abo, alinyumiza embandwa anyakulinda ebigo, embandwa ba isenkuru ou bataramanyire nuwe alinyumiza, naamurabuka; zaabbu, efeeza, amabaale ag'omuhendo, n'ebisembo eby'omuhendo.

³⁹Ebigo bye araabirindisaaga abantu abanyakuramya embandwa ow'abanyamahanga; abo abanyakumwikiriza nkooku ali mulemi alibakuza, nubo alita omu biikaro ebya haiguru, kandi alibaheera ensi.

⁴⁰“Akasumi ak'empero obu kalihika, omukama owa ha bukiizi bw'emoso alimuseesira; baitu omukama owa ha bukiizi bw'emoso alirwana obucweka ihembe, naayekoonyeza ebigaali, abatembi b'embaraasi, na meeri nyingi; aliramagira ensi nyingi, amoome kandi arabemu.

⁴¹Noobwakubaire ensi Erukwera, nayo aligiramagira, aite obukumi n'obukumi, baitu ensi Edomu, Mowabbu n'ekicweka ekisigaireho eky'Amoni, ezi iritabuka.

⁴²Kandi obu aliseesira ensi ezi zoona, obu Misiri nayo terirutonda.

⁴³Obuguuda bwona, zaabbu n'efeeza, n'ebintu ebindi eby'omuhendo Abanyamisiri ebi baaserekere, alibyetwarra. Alisingura Libbiya na Sudaani.

⁴⁴Baitu amakuru aga Burugaizooba n'aga ha bukiizi obw'emoso, galimutuntuza, galimutiinisa nukwo agende arwane obwitane ahwerekereze baingi.

⁴⁵Aliteera eheema ze ez'ekitiinisa hagati y'enyanja n'orusozi rw'ekitiinisa orurukwera; baitu alifa ataina muntu n'omu ow'okumukoonyera.