Read Runyoro - rutooro Dan 12 Bible Online

Dan 12 - Runyoro - rutooro bible

Dan 12

¹“Omu kasumi ako Mikairi malaika omukuru anyakurolerra abantu bawe, alyemerra agambe ati: Halibaho akasumi ak'omuhito ogutakabahoga, amahanga gaakaba kuhangwa; baitu omu kasumi ako, abantu bawe boona abaliba bahandiikirwe omu kitabu kya Ruhanga balijunwa.

²Kandi abaingi omuli abo abaagwijagiire ira balisisiimuka, abamu balihumbuukira omu bwomeezi obw'obusinge, abandi bahumbuukire okuswazibwa n'okugayara okw'ebiro byoona.

³Abanyamagezi balyangasana nk'omwanya gw'iguru; n'abo abaayegeseze abantu okukora ebirungi, balyengeengeta nk'enyunyuuzi ebiro byona.

⁴Baitu iwe Daneeri, ebigambo ebi otalibigamba, kandi ekitabu okiteho emanyiikirizo okuhika ha kasumi ak'empero. Baingi balitoma kunu na kuli n'amagezi galyeyongera.”

⁵Nyowe Daneeri, nubwo namagamagire, narora abantu babiri beemeriire, omu ayemeriire harubaju rumu orw'ekisaaru, ondi ayemeriire ha rubaju orundi.

⁶Nakaguza omusaija ow'akaba ajwaire engoye za kitaani ow'akaba ali ha maizi eruguru nti: “Ebintu ebirukuhuniriza binu birihwaho di?”

⁷Omusaija ogu anyakujwaire ebya kitaani ow'akaba ali ha maizi eruguru, yaimukya omukono gwe ogw'obulyo n'ogw'emoso, yagyoleka haiguru; namuhurra naarahira, naarahira Ogu anyakubaho ebiro byona ati: “Eki kiritwara emyaka esatu n'ekicweka kandi ati: Okwihaho abantu abarukwera obusobozi obu bulihwaho, ebintu ebi byona nubwo birihikirra.”

⁸Nkahurra eki yagambire baitu ntakenge. Nubwo nakagwize nti: “Mukama wange, ebintu ebi birizaara ki?”

⁹Yangarukamu ati: “Daneeri, wegendere, habwokuba ebigambo ebi nibiikara biri by'ensita kandi bitairweho emanyikirizo.

¹⁰Baingi balisemezebwa, bataba n'akamogo nukwo babe barungi; baitu ababi balyeyongera okukora ebibi; busaho n'omu hali bbo ow'alikenga, abanyamagezi bonka nubo balikenga.

¹¹Okuruga ha kasumi ebihongwa eby'okwokya ebya butoosa aka birihirwaho, hakaimuka okukora ebibi kahwerekereza, halihinguraho ebiro orukumi rumu, ebikumi bibiri n'ekyenda.

¹²W'omugisa omuntu ogu, ow'aliikara ali mwesigwa, okuhika ebiro ebi obu birihwaho.

¹³Iwe Daneeri wegendere, oikale oli mwesigwa okuhika ha mpero. Hanyuma nubwo olifa, baitu ebiro ebi obu birihwaho, olihumbuuka otunge empeera yawe.”