Read Runyoro - rutooro Dan 2 Bible Online

Dan 2 - Runyoro - rutooro bible

Dan 2

¹Omu mwaka ogwa kabiri ogw'okulema kwa Nebbukadaneeza, Nebbukadaneeza akaroota ebirooto, omwoyo gwamusarra, n'oturo twamuhwaho n'okugwijagira.

²Nubwo omukama yaragiire beete: abakozi b'amasano, abaraguzi, abarogo, n'Abakaludaaya, baije basoborre amakuru ag'ebirooto by'omukama.

³Obu baizire baayemerra omumaiso ge, yabagambira ati ndaire ndoosire ekirooto omutima gwansarra omunda ninyenda kumanya amakuru g'ekirooto eki.

⁴Nubwo Abakaludaaya baamugambira bati: “Hangiriza agutamba, ebiro byona! Tugambire eky'oroosire, tukusoborre amakuru gakyo.”

⁵Omukama yabagarukamu ati: “Kakuba mulemwa kummanyisa ekirooto mukansoborra n'amakuru gaakyo, ninyija kubataagataagura n'amaju gaanyu ngaseese.

⁶Baitu obu murammanyisa ekirooto mukansoborra n'amakuru gaakyo nyowe ndaabahaga ebisembo bingi, empeera n'ekitiinisa. Hati nu mungambire ekirooto n'amakuru gaakyo.”

⁷Baamugarukamu obwakabiri bati “Agutamba, tugambire eki oroosire, tukusoborre amakuru gaakyo.”

⁸Omukama yagarukamu ati: ningumya nimwenda kutunga omwanya, habwokuba mwetegeriize ekigambo kyange nkooku kiri ky'amazima:

⁹nkooku ngambire nti obu muraalemwa kummanyisa ekirooto eki, ninyija kubaha ekifubiro kimu mwikirranize kungambira ebisuba nukwo akasumi kahingule. Habweki, mummanyise ekirooto, nubwo ndaagumya nti muransoborra kwo amakuru gaakyo.

¹⁰Abakaludaaya baagarukamu omukama bati: Agutamba, busaho muntu omunsi yoona asobora kukukorra eky'orukwenda; habwokuba, tihakabahoga mukama ow'ekitiinisa kandi ow'obusobozi, arakagwize omukozi w'amasano, omufumu, rundi Omukaludaaya ekintu nk'eki.

¹¹Ekintu eky'orukukaguza, kigumire muno, tiharoho muntu n'omu asobora kukikugarukamu okwihaho embandwa ezitaikara n'abantu.

¹²Omukama obu yahuliire eki, yakwatwa ekiniga, nukwo kuragira ati: Abantu ab'amagezi aba Babbulooni boona, babaite;

¹³nukwo kuturukya ekiragiro ekirukugamba kiti abantu ab'amagezi boona baitwe, Daneeri n'abanywani be batabuziremu,

¹⁴nubwo Daneeri yagarukiremu Alyoki, engabwa y'ihe eryalindaga omukama, ow'akaba atumirwe kwita abantu ab'amagezi aba Babbulooni, mpora n'obwegendereza ati:

¹⁵“Wewe ngamba y'omukama, kiki ekyaturukisize omukama ekiragiro eky'ekiniga ekirukwingana aho?” Alyoki yasoborra Daneeri ekyabaireho.

¹⁶Daneeri yagenda mb'omukama yamwesengereza muno, amuhe akasumi, nukwo amusoborre amakuru ag'ekirooto eki yaroosire.

¹⁷Hanyuma Daneeri yataaha omuka ye, eki yakimanyisa bagenzi be Hananiya, Misaheeri, n'Azaliya,

¹⁸yabagambira ati: Mwesengereze Ruhanga ow'omwiguru abagirre embabazi, kandi bamusabe abasoborre ensita egi, nukwo Daneeri baleke kwitwa n'abantu abandi ab'amagezi aba Babbulooni.

¹⁹Omu bwire bw'ekiro eki kyonyini ensita egi yayolekwa Daneeri, Daneeri nukwo kuhaisaniza Ruhanga ow'omwiguru

²⁰naagamba ati: “Ibara lya Ruhanga lihaisanizibwege ebiro byona, Ogu MUKAMA w'amagezi n'amaani

²¹nuwe ahingisa obusumi n'emyaka, nuwe aihaho abakama kandi nuwe ataho bandi; nuwe aha abagezi amagezi, kandi nuwe aha abeetegereza okumanya;

²²amanya ebintu ebigumire kandi ebitarukwetegerezibwa; amanya ebinyakuli omu mwirima, kandi nuwe kyererezi.

²³Ai Ruhanga owa baisenkuru nyowe ninkusiima kandi ninkukugiza, habw'okuba niwe wampaire amagezi n'amaani wammanyisa eki twakukagwize habw'okuba niiwe watumanyisize eky'okugarukamu omukama.”

²⁴Habweki Daneeri akagenda omba Alyoki omukama ou akaba akomere kwita abantu abanyamagezi aba Babbulooni; akagenda yamugambira ati: “Otaita abantu ab'amagezi aba Babbulooni; mpikya omu mabone g'omukama, mmusoborre amakuru ag'ekirooto eki yaroosire.”

²⁵Nubwo Alyoki yahikize bwango Daneeri omumaiso g'omukama yamugambira ati: “Omu bantu enzaahisibwa abaarugire mboinemu omuntu arukusobora kukusoborra amakuru ag'ekirooto eki waroosire.”

²⁶Omukama nubwo yakagwize Daneeri, kandi ayayetwaga n'erya Beriteesaza ati: ngu weza, osobora kummanyisa ekirooto eki naroosire, okansoborra n'amakuru gaakyo?

²⁷Daneeri yagarukamu omukama ati: “Busaho bantu abanyamagezi busaho bafumu, busaho abakozi b'amasano rundi abaraguzi rundi abecumitiriza eby'enyunyuuzi abasobora kumanyisa omukama ensita egi ei yakagwize,

²⁸baitu haroho Ruhanga ow'omwiguru, anyakusuukura ensita, kandi nuwe amanyisize omukama Nebbukadaneeza ebiribaho omu biro eby'omumaiso.

²⁹Ganu nugo amakuru ag'ekirooto waroosire, n'omutwe gwawe ebi gwakwolekere, obyamire omu kitabu kyawe, okaroota eby'omumaiso, kandi Ruhanga anyakusukurra ensita, nuwe akumanyisize ebirukwija kubaho.

³⁰Baitu nyowe nkasuukulirwa ensita enu, tihali habw'okuba n'amagezi agarukukira ag'abantu boona, baitu nukwo nsobole kukusoborra, omanye ebiteekerezo eby'omutima gwawe.

³¹“Mwebingwa, omu kwolekwa kwawe, okarora ekisisani ekikooto muno ekirukwengeengeta kandi ekirukumasamasa, omuntu eki akaba atarukusobora kugumyaho eriiso.

³²Omutwe gwakyo gukaba guli gwa zaabbu enungi, ekifuba n'emikono yakyo ekozirwe omu feeza enungi, n'emikono yakyo ekozirwe omu feeza, enda n'ebibero bikozirwe omu mulinga,

³³amaguru gaakyo gakaba gali g'ekyoma, ebigere byakyo, ekicweka ekimu ky'ekyoma, ekicweka ekindi ky'ibumba.

³⁴Obu wabaga okihangire amaiso hakaija ibaale erikooto lyacweka ha mwandara, hataroho muntu alikwasireho, lyateera ebigere byakyo ebyakozirwe ekicweka ky'ekyoma, ekicweka ky'ibumba lyabisaasangura;

³⁵nubwo ekyoma, ibumba, omulinga, efeeza, na zaabbu, byaasasangukiire kimu, byaasisana nk'omusunga ogwa ha mbuga ezihulirwaho omu kasumi k'ekyanda omuyaga gwabihuuhuura gwabitwara hara muno, kigumu kumanya nambere omuyaga gwabitomeseze. Baitu ibaale eryatiire ekisisani kiri, likafooka rusozi orukooto, orurukumaraho ensi yoona.

³⁶“Ekirooto nikyo eki; hati ka nkusoborre amakuru gaakyo.

³⁷Iwe omukama, omukama w'abakama, Ruhanga ow'omwiguru ou yahaire obukama, obusobozi, amaani, n'ekitiinisa,

³⁸ou yakwasize abaana b'abantu ebisoro eby'omu kisaka n'enyonyi ez'omu mwanya, yakufoora mulemi w'ebi byona, hoona nambere bikaikara-niiwe mutwe ogwa zaabbu.

³⁹Iwe obw olirugaho, haliimuka obukama obundi, obutarukwingana n'obwawe ekitiinisa, kandi haliimuka obukama obwa kasatu obw'omulinga, obu nubwo bulirema ensi yoona.

⁴⁰Kandi halibaho obukama obwa kana obw'amaani nk'ekyoma, habwokuba ekyoma nikyo kisaasangura kandi kibberengura ebintu byona; kandi nk'ekyoma oku kibberengura, obukama obu nabwo bulibberengura kandi busaasangule amakama agandi agalibwebembera.

⁴¹Nkooku waboine ebigere n'ebyara byabyo ekicweka ky'ibumba, ekicweka ky'ekyoma, eki nikimanyisa obukama obu bulibaganizibwamu; baitu bulikiraho amaani nk'ag'ekyoma, habwokuba, ekyoma kikajwanganizibwa omu ibumba.

⁴²Ebyaara ekicweka kuba ky'ekyoma, ekicweka kuba ky'ibumba eki nikimanyisa obukama obu buliba bw'amaani kandi buliba buceke.

⁴³Kandi okabona ekyoma kitabwirwemu ibumba. Eki nikimanyisa: abalemi ab'obukama obu, balirengaho okuteeraniza enganda zaabo nibaswerrana baitu tibalisobora, nkooku ekyoma kitasobora kutaburwa n'ibumba.

⁴⁴Omu bulemi bw'abakama abo, Ruhanga ow'omwiguru aliimukya obukama obw'okwikaraho ebiro byona kandi obusobozi bwabwo tibuliheebwa ihanga erindi. Obukama obu bulisaasangura amakama agandi goona bugahwerekereze, kandi buliikaraho ebiro byona;

⁴⁵nkooku warozire ibaale eryatemerwe ha rusozi hataroho muntu alitemere, nkooku lyasaasangwire ekisisani ekyakozirwe omu kyoma, omu mulinga, omu ibumba, omu feeza n'omu zaabbu; Ruhanga ow'ekitiinisa akumanyisize ebiribaho omu biro eby'omumaiso. Ekirooto waroosire ky'amazima, kandi amakuru gaakyo tigali g'okuguragurukya.”

⁴⁶Omukama Nebbukadaneeza ajuumaire omumaiso ga Daneeri, yaragira bamuhongere ekihongwa bamucumikirre n'obubbani.

⁴⁷Omukama yagambira Daneeri ati: “Mazima kwo, Ruhanga wawe nuwe Ruhanga w'abaruhanga kandi nuwe MUKAMA w'abakama, kandi nuwe asukurra ensita, kinu nkimanyisiibwe, iwe habw'okusobora kusoborra ensita enu.”

⁴⁸Hanyuma yamuha ekiikaro eky'ekitiinisa n'ebisembo ebirungi bingi, yamufoora mulemi w'isaza lyona erya Babbulooni, yamufoora mukuru arukurolerra abantu abanyamagezi boona aba Babbulooni.

⁴⁹Daneeri akasaba omukama, omukama yakoma Saduraaka, Mesaaka, n'Abedeneego, nubo babe n'omulimo ogw'okurolerra, ebintu ebirukufa hali Babbulooni, baitu uwe yasigara omu kikaali ky'omukama.